ສກຈຮ ຈໍາປາສັກ ໜ່ວຍບໍລິການເຊກອງເນັ້ນ 3 ມາດຖານ ຊຸ້ຍູ້ທຸລະກິດເຂັ້ມແຂງ

 ໄປໄດ້ງາມຫຼາຍສໍາລັບໜ່ວຍບໍລິການສະຖາບັນການເງິນຈຸລະພາກທີ່ຮັບເງິນຝາກຈໍາປາສັກ ພາຍຫຼັງທີ່ລອງໃຫ້ບໍລິການພຽງເຄິ່ງປີກໍສາມາດດຶງດູດລູກຄ້າເງິນກູ້ໄດ້ເຖິງ 2 ພັນກວ່າຄົນຫຼ້າສຸດໄດ້ເປີດໜ່ວຍບໍລິການຢ່າງເປັນທາງການແລ້ວທີ່ແຂວງເຊກອງເພື່ອຂັບເຄື່ອນການບໍລິການທາງດ້ານການເງິນທີ່ວ່ອງໄວໂປ່ງໃສ ແລະເປັນທໍາໃຫ້ກັບລູກຄ້າສາມາດເຂົ້າມາໃຊ້ບໍລິການໃຫ້ມີຄວາມສະດວກສະບາຍຍິ່ງຂຶ້ນ.

  ພິທີເປີດໜ່ວຍບໍລິການດັ່ງກ່າວໄດ້ມີຂຶ້ນໃນວັນທີ 25 ມັງກອນ 2020 ທີ່ແຂວງເຊກອງ, ໂດຍການເຂົ້າຮ່ວມຂອງ ທ່ານ ເຫຼັກໄຫຼ ສີວິໄລ ຮອງເຈົ້າແຂວງໆເຊກອງ, ທ່ານ ນວນຕາ ແກ້ວມະນີ ຫົວໜ້າທະນາຄານ ແຫ່ງ ສປປ ລາວ ປະຈໍາທີ່ແຂວງພາກໃຕ້, ທ່ານນາງ ພະນົມຮັກ ເຂັມມາລາ ຮອງປະທານສະພາບໍລິຫານສະຖາບັນການເງິນຈຸລະພາກ-ພາກໃຕ້,ທ່ານ ໜູເຄືອບ ສິດທິເດດ ຜູ້ອໍານວຍການສະຖາບັນການເງິນຈຸລະພາກທີ່ຮັບເງິນຝາກຈໍາປາສັກຈໍາກັດ (ສກຈຮ) ພ້ອມດ້ວຍບັນດາແຂກຜູ້ໃຫຍ່ພາຍໃນແຂວງ ແລະບັນພະນັກງານ, ວິຊາການພາຍໃນສະຖາບັນເຂົ້າຮ່ວມ.

  ໃນພິທີ ທ່ານ ອາລຸນໂນໄທ ສຸລິເມືອງຈັນ ຮອງຜູ້ອໍານວຍການສະຖາບັນການເງິນຈຸລະພາກທີ່ຮັບເງິນຝາກຈໍາປາສັກ ໄດ້ກ່າວວ່າ: ນັບແຕ່ກາງປີ 2019 ທີ່ສະຖາບັນໄດ້ຮັບອະນຸຍາດຈາກທະນາຄານ ແຫ່ງ ສປປ ລາວ ປະຈໍາພາກໃຕ້ທີ່ ແຂວງຈໍາປາສັກ ໃຫ້ດໍາເນີນທຸລະກິດໜ່ວຍບໍລິການຢູ່ແຂວງເຊກອງຢ່າງເປັນທາງການ, ຊຶ່ງຜ່ານການດໍາເນີນທຸລະກິດໄດ້ມີການຂະຫຍາຍຕົວດີຂຶ້ນເປັນລະດັບໃນການບໍລິການສິນເຊື່ອຂະໜາດນ້ອຍ ໃຫ້ແກ່ປະຊາຊົນໃນແຂວງເຊກອງ,ຊຶ່ງມາຮອດທ້າຍເດືອນມັງກອນ 2020 ມີລູກຄ້າເງິນກູ້ທັງໝົດ 2.154 ຄົນ, ມີຍອດເຫຼືອເງິນກູ້ຢູ່ 39 ຕື້ກວ່າກີບ.

 ປະຈຸບັນ ສະຖາບັນການເງິນຈຸລະພາກທີ່ຮັບເງິນຝາກຈໍາປາສັກຈໍາກັດ, ມີໜ່ວຍບໍລິການກວມຢູ່ 10 ເມືອງໃນແຂວງຈໍາປາສັກ ແລະມີໜ່ວຍບໍລິການຢູ່ແຂວງເຊກອງ, ສາລະວັນ ແລະອັດຕະປື, ໂດຍໃນປີ 2020 ສກຈຮ ຈໍາປາສັກ ໄດ້ວາງເປົ້າໝາຍໃນການດໍາເນີນງານ ໄວ້ 3 ດ້ານຄື: ດ້ານທີໜຶ່ງ:ແມ່ນຂະຫຍາຍຖານລູກຄ້າເງິນຝາກແລະຍອດເຫຼືອເງິນກູ້ຢ່າງມີຄຸນນະພາບ, ສອງ: ແມ່ນຈະປັບປຸງລະບົບການດໍາເນີນງານພາຍໃນເພື່ອຈໍາກັດຄວາມສ່ຽງ ແລະເພີ່ມປະສິດທິພາບ ແລະ ສາມ: ແມ່ນຈະມີການເພີ່ມ ແລະປັບທັກສະນະຂອງພະນັກງານຢ່າງເປັນລະບົບເພື່ອສົ່ງເສີມໃຫ້ເກີດການປ່ຽນແປງທີ່ສ້າງສັນ.

___________

ຂຽນໂດຍ: ໂພທິຣາຊ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์