ທຸກພາກສ່ວນ ເພີ່ມທະວີຕິດຕາມກວດກາ ແລະຮັບມືໄຟໄໝ້ປ່າ

ໃນຊ່ວງລະດູແລ້ງເປັນໄລຍະທີ່ມີສະຖິິຕິການເກີດໄຟໄໝ້ປ່າຫຼາຍກວ່າໄລຍະອື່ນເນື່ອງຈາກສະພາບອາການແຫ້ງແລ້ງ, ລົມພັດແຮງປະກອບກັບຕົ້ນໄມ້ໃຫຍ່ຈໍານວນຫຼາຍມີໃບຫຼົ່ນ, ຫຍ້າແຫ້ງຕາຍໂດຍອີງຕາມຂໍ້ມູນການຄາດດະເນສະພາບອາກາດໄລຍະ 3 ເດືອນຕົ້ນປີ (ມັງກອນ-ມີນາ 2020) ຂອງກົມອຸຕຸນິຍົມ ແລະ ອຸທົກກະສາດ ພົບວ່າປີນີ້ຈະມີສະພາບທີ່ແຫ້ງແລ້ງກວ່າປີຜ່ານມາ, ສະນັ້ນມີຄວາມສ່ຽງຈະເກີດບັນຫາໄຟໄໝ້ປ່າລຸກລາມລວມທັງໄຟໄໝ້ປ່າສະໜາມຂີ້ເຫຍື້ອຄືໃນປີຜ່ານມາໄດ້ເກີດເຫດການໄຟໄໝ້ປ່າເປັນບໍລິເວນກວ້າງຢູ່ບັນດາແຂວງພາກເໜືອ ແລະນະຄອນຫຼວງວຽງຈັນ ເປັນສາເຫດພາໃຫເກີດມີມົນລະພິດທາງອາກາດເປັນຕົ້ນແມ່ນ: ຝຸ່ນລະ ອອງຂະໜາດໜ້ອຍ (PM 2.5) ຊຶ່ງໄດ້ສົ່ງຜັນກະທົບບໍ່ໜ້ອຍຕໍ່ສຸຂະພາບຂອງປະຊາຊົນ ແລະເຮັດໃຫ້ສັງຄົມມີຄວາມກັງວົນ.

  ເມື່ອວັນທີ 20 ມັງກອນຜ່ານມາກະຊວງຊັບພະຍາກອນທໍາມະຊາດ ແລະສິ່ງແວດລ້ອມໄດ້ອອກແຈ້ງການກ່ຽວກັບການເພີ່ມທະວີິຕິດຕາມກວດກາ, ເຝົ້າລະວັງການປ້ອງກັນ ແລະຮັບມືສະພາບໄຟໄໝ້ປ່າ ແລະໄຟໄໝ້ສະໜາມຂີ້ເຫຍື້ອເພື່ອຫຼຸດຜ່ອນຜົນກະທົບຕໍ່ສິ່ງແວດລ້ອມ ແລະສັງຄົມໂດຍມີເນື້ອໃນລະບຸວ່າ: ໃຫ້ກະຊວງກະສິກໍາ ແລະປ່າໄມ້ ປະຕິບັດ ຕາມແຜນປ້ອງກັນ, ສະກັດກັ້ນ ແລະຮັບ ມືໄຟໄໝ້ປ່າຂອງກະຊວງ ໂດຍໃຫ້ມີແຈ້ງ ການເພີ່ມທະວີການຕິດຕາມ ແລະເຝົ້າ ລະວັງການຈູດປ່າເຮັດໄຮ່, ຈູດຕໍເຟືອງເພື່ອເຮັດນາຂອງປະຊາຊົນ ແລະບັນຫາໄຟໄໝ້ປ່າທີ່ເກີດຂຶ້ນໂດຍທໍາມະຊາດ, ພ້ອມທັງມີມາດຕະການປ້ອງກັນ ແລະມາດຕະການຄວບຄຸມກໍລະນີ້ເກີດໄຟໄໝ້,ໃຫ້ກະຊວງໂຍທາທິການ ແລະຂົນສົ່ງຊີ້ນໍາການເກັບກໍາ ແລະກວດກາສະໜາມຂີ້ເຫຍື້ອຂອງບັນດາເມືອງ ແລະບັນດາແຂວງໃນຂອບເຂດທົ່ວປະເທດ, ພ້ອມທັງເພີ່ມທະວີການຕິດຕາມ ແລະເຝົ້າລະວັງການຈູດຂີ້ເຫຍື້ອຊະຊາຍ ແລະການເກີດແກ໊ດເມຕານ, ໄບໂອແກ໊ດຈາກ ການໝັກ ແລະການຍ່ອຍສະຫຼາຍຂອງສານອິນຊີໃນຂີ້ ເຫຍື້ອ, ພ້ອມທັງສົ່ງເສີມໃຫ້ມີການແຍກຂີ້ເຫຍື້ອ ແລະສ້າງສະໜາມຂີ້ເຫຍື້ອທີ່ໄດ້ມາດຕະຖານ, ພ້ອມນີ້ໃຫ້ຈໍາກັດການນໍາໃຊ້ລົດທີ່ບໍ່ໄດ້ຄຸນນະພາບ ແລະນໍ້າມັນທີ່ບໍ່ໄດ້ມາດຕະຖານຊຶ່ງເປັນສາເຫດໜຶ່ງທີ່ສ້າງຜົນກະທົບຕໍ່ຄຸນນະພາບອາກາດ.

 ນອກນີ້ມອບໃຫ້ກະຊວງຖະແຫຼງຂ່າວ, ວັດທະນະທໍາ ແລະທ່ອງທ່ຽວໂຄສະນາເຜີຍແຜ່ຜ່ານສື່ຕ່າງໆໃຫ້ສັງຄົມຮັບຮູ້ກ່ຽວກັບສາເຫດ ແລະອັນຕະລາຍຂອງໄຟປ່າ ແລະສະໜາມຂີ້ເຫຍື້ອເພື່ອໃຫ້ຄວາມຮ່ວມມືໃນການປ້ອງກັນ ແລະເຝົ້າລະວັງ, ມີສ່ວນຮ່ວມໃນການຢຸດຕິການຈູດຂີ້ເຫຍື້ອຊະຊາຍໂດຍສະເພາະຢູ່ໃນຕົວເມືອງ, ພ້ອມທັງປົກປັກຮັກສາຊັບພະຍາກອນທໍາມະຊາດ ແລະສິ່ງແວດລ້ອມໃຫ້ມີຜົນ.

  ມອບໃຫ້ກະຊວງສາທາລະນະສຸກຕິດຕາມຜົນກະທົບຕໍ່ສຸຂະພາບແນະນໍາວິທີການປ້ອງກັັນ ແລະປິ່ນປົວເມື່ອໄດ້ຮັບຜົນກະທົບ, ໃຫ້ກະຊວງອຸດສາຫະກໍາ ແລະການຄ້າ ເປັນເຈົ້າການໃນການເກັບກໍາ ແລະຂຶ້ນບັນຊີບັນດາໂຮງງານອຸດສາຫະກໍາ, ພ້ອມທັງເພີ່ມທະວີໃນການຕິດຕາມກວດກາການປ່ອຍມົນລະພິດອອກຈາກໂຮງງານຢ່າງເປັນປົກກະຕິ ແລະບໍ່ໃຫ້ເອົາສິ່ງເສດເຫຼືອຈາກການຜະລິດອຸດສາຫະກໍາໄປຖິ້ມປະປົນກັບສິ່ງເສດເຫຼືອທົ່ວໄປ ແລະມີມາດຕະການຄຸ້ມຄອງທີ່ໄດ້ມາດຕະຖານ.

 ສ່ວນກະຊວງຊັບພະຍາກອນທໍາມະຊາດ ແລະສິ່ງແວດລ້ອມໃຫ້ສົມທົບກັບພາກສ່ວນກ່ຽວຂ້ອງຈັດສັນ ແລະຊອກຫາແຫຼ່ງງົບປະມານເພື່ອຕິດຕັ້ງເຄື່ອງວັດແທກຄຸນນະ ພາບອາກາດໃນເຂດທີ່ມີຄວາມສ່ຽງ ແລະ ລາຍງານສະພາບອາກາດ ແລະ ຄຸນນະພາບອາກາດຢ່າງເປັນປົກກະຕິພ້ອມທັງສ້າງນິຕິກໍາ, ຄູ່ມືເພື່ອປົກປ້ອງ, ຫຼຸດຜ່ອນຜົນກະທົບ, ມອບໃຫ້ນະຄອນຫຼວງວຽງຈັນ ແລະບັນດາແຂວງໃຫ້ຄວາມຮ່ວມມືໃນການຕິດຕາມ, ເຝົ້າລະວັງ ແລະຈັດຕັ້ງປະຕິບັດມາດຕະການປ້ອງກັນ ແລະ ກວດແຫຼ່ງ ທີ່ມາຂອງມົນລະພິດ ແລະມີມາດຕະການຕໍ່ຜູ້ລະເມີດຢ່າງເຂັ້ມງວດ.

____________

ຂຽນໂດຍ: ວົງມະນີ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์