ທູດລາວ ຍື່ນສານຕາຕັ້ງຕໍ່ ເລຂາທິການໃຫຍ່ ອົງການ ສປຊ

  ໃນຕອນບ່າຍຂອງວັນທີ 28 ມັງກອນ 2020, ທີ່ສຳນັກງານໃຫຍ່ ອົງການ ສປຊ   ທີ່ ນິວຢອກ, ສະຫະລັດອາເມລິກາ, ທ່ານ ອານຸພາບ ວົງໜໍ່ແກ້ວ, ໄດ້ຍື່ນສານຕາຕັ້ງ ຕໍ່ພະນະທ່ານ ແອນໂຕນີໂອ ກູເຕີເຣັດສ໌ (Antonio Guterres), ເລຂາທິການໃຫຍ່ ອົງການ ສະຫະປະຊາຊາດ, ເພື່ອດຳລົງຕຳແໜ່ງເປັນເອກອັກຄະລັດ ຖະທູດ ວິສາມັນຜູ້ມີອຳນາດເຕັມ ແຫ່ງ ສປປ ລາວ, ທັງເປັນຜູ້ຕາງໜ້າຖາວອນ ແຫ່ງ ສປປ ລາວ ຄົນໃໜ່ ປະຈຳອົງການ ສປຊ.

 

  ໃນໂອກາດດັ່ງກ່າວ, ພະນະທ່ານ ເລຂາທິການໃຫຍ່ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍ ທ່ານເອກອັກຄະລັດຖະທູດ ທີ່ໄດ້ຖືກແຕ່ງຕັ້ງມາດຳລົງແໜ່ງ ເປັນຜູ້ຕາງໜ້າຖາວອນ ແຫ່ງ ສປປ ລາວ ປະຈຳອົງການ ສປຊ, ພ້ອມທັງຊົມເຊີຍ ລັດຖະບານ ແຫ່ງ ສປປ ລາວ ທີ່ໄດ້ມີຄວາມຄືບຫນ້າໃຫ້ການພັດທະນາປະເທດ, ສາມາດຜ່ານຜ່າຄວາມຫຍຸ້ງຍາກໃນອາດີດ ແລະ ມີຄວາມໝາຍໝັ້ນໃນການຫຼຸດພົ້ນອອກຈາກສະຖານະພາບປະເທດທີ່ດ້ອຍພັດທະນາ ພ້ອມກັນນັ້ນ, ພະນະທ່ານ ເລຂາທິການໃຫຍ່ ຍັງໃຫ້ຄຳໝັ້ນສັນຍາວ່າ ອົງການ ສປຊ ຈະສືບຕໍ່ໃຫ້ການສະໜັບສະໜູນຊ່ວຍເຫລືອ ສປປ ລາວ ໃນການຈັດຕັ້ງເປົ້າໝາຍການພັດທະນາແບບຍືນຍົງ ແລະ ຍັງໄດ້ກ່າວເຖິງທ່າແຮງທາງດ້ານທຳມະຊາດ ແລະ ວັດທະນາທຳອັນດີງາມ ທີ່ຄັ້ງຫນຶ່ງໃນຫລາຍປີຜ່ານມາພະນະທ່ານເລຂາທິການໃຫຍ່ໄດ້ມີໂອກາດສຳພັດ ແລະ ມີຄວາມປະທັບໃຈຈາກການເດີນ ທາງທ່ອງທ່ຽວແຕ່ຊາຍແດນສາມຫຼ່ຽມຄຳ ຈົນຮອດສີ່ພັນດອນ.

ທ່ານ ເອກອັກຄະລັດຖະທູດ ອານຸພາບ ວົງໜໍ່ແກ້ວ ກໍ່ໄດ້ສະແດງຄວາມຂອບໃຈຢ່າງຈິງໃຈ ຕໍ່ການຕ້ອນຮັບອັນອົບອຸ່ນ ພ້ອມທັງໄດ້ນໍາເອົາຄວາມຢື້ຢາມຖາມຂ່າວອັນອົບອຸ່ນ ຈາກການນຳຂອງ ສປປ ລາວ ມາຍັງພະນະທ່ານ ເລຂາທິການໃຫຍ່. ພ້ອມດຽວກັນນັ້ນ, ທ່ານເອກອັກຄະລັດຖະທູດ ກໍໄດ້ຢ້ຳຄືນຄວາມໝາຍໝັ້ນ ຂອງລັດຖະບານ ໃນການຈັດຕັ້ງປະຕິບັດບັນດາເປົ້າໝາຍດ້ານການພັດທະນາຂອງສາກົນ ໂດຍສະເພາະເປົ້າຫມາຍການພັດທະນາແບບຍືນຍົງ ລວມທັງເປົ້າຫມາຍທີ 18: ຊີວິດທີ່ປອດໄພຈາກລະເບີດບໍ່ທັນແຕກ ກໍຄືືສືບຕໍ່ຄວາມພະຍາຍາມເພື່ອຫລຸດພົ້ນອອກຈາກສະຖານະພາບປະເທດດ້ອຍພັດທະນາໃນຊຸມປີຕໍ່ຫນ້າ. ໃນໂອກາດດຽວກັນນີ້, ທ່ານ ຍັງໄດ້ສະແດງຄວາມຂອບໃຈ ຕໍ່ອົງການ ສປຊ ທີ່ໄດ້ໃຫ້ການສະໜັບສະໜູນຊ່ວຍເຫລືອ ສປປ ລາວ ຕະຫລອດໄລຍະຜ່ານມາ, ເຊີ່ງເປັນການປະກອບສ່ວນອັນສຳຄັນ ໃນການພັດທະນາເສດຖະກິດ-ສັງຄົມຂອງ ສປປ ລາວ.  

  ປີ 2020 ເປັນປີທີ່ມີຄວາມຫມາຍສຳຄັນ ໃນການສະເຫຼີມສະຫຼອງວັນສ້າງຕັ້ງອົງການສະຫະປະຊາຊາດ ຄົບຮອບ 75 ປີ (24 ຕຸລາ 1945) ແລະ ການເຂົ້າເປັນສະມາຊິກອົງການສະຫະປະຊາຊາດຂອງປະເທດລາວ ຄົບຮອບ 65 ປີ (14 ທັນວາ 1955).

___________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์