ບຸນປະເພນີໄຂປະຕູເລົ້າ ສວນຜູ້ໄທທີຣະ ຈະຈັດຂຶ້ນໄວໆນີ້

  ສວນຜູ້ໄທທີຣະຈະຈັດງານບຸນປະເພນີໄຂປະຕູເລົ້າ ຫຼືບຸນປີໃໝ່ຜູ້ໄທຂຶ້ນໃນວັນທີ 1 ກຸມພາ 2020 ດ້ວຍຫຼາຍກິດຈະກໍາໜ້າທ່ຽວຊົມແນໃສ່ເປັນການອະນຸຮັກຮັກສາ ແລະສືບສານວັດທະນະທຳຮີດຄອງປະເພນີອັນດີງາມຂອງເຜົ່າຜູ້ໄທໃຫ້ມີຄວາມຍືນຍົງຕະຫຼອດໄປ.

 ງານບຸນປະເພນີໄຂປະຕູເລົ້າ ຫຼືບຸນປີໃໝ່ຜູ້ໄທທີ່ສວນຜູ້ໄທທີຣະຖະໜົນ 450 ປີ ບ້ານໜອງແປນເໜືອ ເມືອງຫາດຊາຍຟອງ ນະຄອນຫຼວງວຽງຈັນ ຈັດຂຶ້ນເລີ່ມແຕ່ປີ 2018 ເປັນຕົ້ນມາ, ສະເພາະປີ 2020 ເປັນປີທີສາມຂອງການຈັດງານບຸນດັ່ງກ່າວຊຶ່ງຈະຈັດຂຶ້ນວັນທີ 1 ກຸມພາ 2020 ໂດຍເລີ່ມເວລາ 14:00 ໂມງ ເຕົ້າໂຮມຂະບວນແຫ່ຂອງແຕ່ລະພາກສ່ວນ 15:00 ໂມງ ເລີ່ມພິທີແຫ່ບຸນໄຂປະຕູເລົ້າ ແລະ 16:00 ໂມງເປັນຕົ້ນໄປເຂົ້າສູ່ພິທີສູດຂວັນເຂົ້າ, ກິນເຂົ້າພາແລງ ແລະ ຊົມການສະແດງສິລະປະດົນຕີຜູ້ໄທຈາກທ້ອງຖິ່ນຕ່າງໆ, ນອກນັ້ນຍັງມີງານວາງສະແດງສິນຄ້າຫັດຖະກຳ, ກະສິກຳພື້ນບ້ານຕະຫຼາດນັດ, ຮ້ານອາຫານ, ກີລາພື້ນບ້ານ, ສວນເດັກຫຼິ້ນ, ຊົມສວນດອກໄມ້ທົ່ງນາ, ສວນຜັກ, ເຮືອນຊົງລາວແບບຜູ້ໄທ, ເຄື່ອງໃຊ້ເກົ່າແກ່ແບບບູຮານ ແລະອື່ນໆ.

  ສະນັ້ນຂໍເຊີນຊວນປະຊາຊົນບັນດາເຜົ່າຊາວນະຄອນຫຼວງວຽງຈັນ ນັກທ່ອງທ່ຽວແຂກພາຍໃນ ແລະຕ່າງປະເທດພ້ອມກັນເຂົ້າມາທ່ຽວຊົມງານບຸນດັ່ງກ່າວເພື່ອເປັນ ການສຶກສາຮຽນຮູ້ວັດທະນະທຳ ແລະວິຖີການດຳລົງຊີວິດຂອງຊົນເຜົ່າຜູ້ໄທ ໂດຍສະເພາະແມ່ນການນຸ່ງຖືການໃຊ້ພາສາປາກເວົ້າ ແລະອື່ນໆທັງນີ້ກໍເພື່ອເປັນການອະນຸ ຮັກຮັກສາ ແລະສືບສານວັດທະນະທຳຮີດຄອງປະເພນີອັນດີງາມຂອງເຜົ່າຜູ້ໄທໃຫ້ມີຄວາມຍືນຍົງຕະຫຼອດໄປ.

___________

ໜັງສືພິມເສດຖະກິດ-ສັງຄົມ

แชร์