ປູກໝາກໂມຂາຍເປັນສິນຄ້າພາຄອບຄົວພົ້ນທຸກ

  ໃນປະຈຸບັນການສ້າງເສດຖະກິດຄອບຄົວຂອງປະຊາຊົນຖືວ່າແມ່ນມີຫຼາຍທາງເລືອກຫຼາຍພໍສົມຄວນບໍ່ວ່າຈະເປັນການປູກຝັງ,ການລ້ຽງສັດຂໍພຽງແຕ່ມີຄວາມດຸໝັ່ນ, ຄວາມອົດທົນ, ກ້າຄິດ, ກ້າເຮັດ ແລະກ້າຕັດສິນໃຈລົງມືເຮັດແທ້ທຳຈິງ, ຊອກຮູ້ຮໍ່າຮຽນເຕັກນິກວິທີການຕ່າງໆເຂົ້າມາພັດທະນາຄອບຄົວຂອງຕົນເອງ ແລະຮູ້ໝູນໃຊ້ທ່າແຮງຕົນເອງທີ່ມີຢູ່ໃຫ້ເກີດຜົນປະໂຫຍດສູງສຸດກໍສາມາດນຳພາຄອບຄົວຫຼຸດພົ້ນອອກຈາກຄວາມທຸກຍາກໄດ້ແນ່ນອນຄືດັ່ງຄອບຄົວທ່ານ ທອງສຸກ ວິໄລວົງ ປະຊາຊົນບ້ານນາເຕີ້ ເມືອງວິລະບູລີ ແຂວງສະຫວັນນະເຂດ ທີ່ໄດ້ ສ້າງເສດຖະກິດຄອບຄົວດ້ວຍ ການປູກໝາກໂມເປັນສິນຄ້າມີ ລາຍຮັບເຂົ້າຄອບຄົວປີໜຶ່ງໄດ້ຫຼາຍສີບລ້ານກີບ.

  ທ່ານ ທອງສຸກ ວິໄລວົງ ໄດ້ໃຫ້ສຳພາດວ່າ:ພາຍໃນຄອບຄົວມີແຮງງານ 4 ຄົນ ຊຶ່ງກ່ອນໜ້ານີ້ຊີວິດການເປັນຢູ່ມີຄວາມຫຍຸ້ງຍາກຫຼາຍ,ອາຊີບຕົ້ນຕໍແມ່ນເຮັດນາປູກເຂົ້າ ແລະປູກຝັງ-ລ້ຽງສັດ ຂາຍພໍແຕ່ໄດ້ກຸ້ມຢູ່ກຸ້ມກິນມີຊີວິດ ໄດ້ຢູ່ລອດໄປແຕ່ລະວັນ, ພາຍຫຼັງ ໄດ້ເຮັດແບບເດີມໆມາຫຼາຍປີເຫັນວ່າຊີວິດການເປັນຢູ່ຂອງຄອບຄົວບໍ່ມີການພັດທະນາຫຍັງດີຂຶ້ນແຕ່ ກົງກັນຂ້າມຄ່າຄອງຊີບ, ຄ່າໃຊ້ຈ່າຍພາຍໃນຄອບຄົວພັດນັບມື້ເພີ່ມຂຶ້ນຈົນມາຮອດປີ 2017 ຕົນເອງຈຶ່ງໄດ້ປຶກສາຫາລືກັບຄອບຄົວເພື່ອຊອກຫາທາງອອກ, ເມື່ອເຫັນ ດີເປັນເອກະພາບກັນແລ້ວ ແລະ ກໍ່ໄດ້ລົງມືເຮັດໃນປີນັ້ນເລີຍໂດຍເລືອກເອົາການປູກໝາກໂມເພື່ອສ້າງລາຍຮັບເຂົ້າຄອບຄົວເນື່ອງຈາກວ່າຕົນເອງແມ່ນມີທ່າແຮງ, ມີມູນເຊື້ອ ແລະມີຄວາມມັກຮັກໃນ ດ້ານການປູກຝັງຢູ່ແລ້ວບວກກັບ ຕົ້ນທຶນກໍບໍ່ສູງຕະຫຼາດກໍມີຄວາມ ຕ້ອງການຫຼາຍທຳອິດປູກໃນເນື້ອທີ່ 1 ເຮັກຕາ, ລົງທຶນ 1,5 ລ້ານກີບ, ຂັ້ນຕອນໃນການປູກນັ້ນກ່ອນອື່ນ ແມ່ນໄດ້ໄຖພູນດິນເຮັດເປັນຄູຈາກ ນັ້ນແລ້ວຂຸດຂຸມໃສ່ຝຸ່ນຫຼັງຈາກກຽມດິນເປັນທີ່ຮຽບຮ້ອຍແລ້ວກໍ່ໄດ້ນຳເອົາແກ່ນໝາກໂມທີ່ໄດ້ກະກຽມໄວ້ມາປູກໃສ່ຕາມເຕັກນິກທີ່ ທາງຫ້ອງການກະສິກຳເພີ່ນແນະນຳ ແລະຫົດນໍ້າໃສ່ຝຸ່ນບົວລະບັດຮັກສາຈົນເຄືອໝາກໂມແຕກດອກ ອອກໝາກ ໂດຍໃຊ້ເວລາປະມານ ໜຶ່ງເດືອນຊ່ວງໄລຍະນີ້ແມ່ນຕ້ອງ ໄດ້ເອົາໃຈໃສ່ເປັນພິເສດຕ້ອງໄດ້ ເບິ່ງແຍງຮັກສາບໍ່ໃຫ້ແມງໄມ້ ແລະແມງເພ້ຍມາທຳລາຍໂດຍລວມ ແລ້ວ ຈະໃຊ້ເວລາປະມານສອງເດືອນປາຍກໍສາມາດເກັບຜົນຂາຍອອກໄດ້ໃນລາຄາເລາະຂາຍເອງໜ່ວຍນ້ອຍ 5 ພັນກີບ, ໜ່ວຍກາງ 10 ພັນກີບ ແລະໜ່ວຍໃຫຍ່ 20 ພັນກີບ ຕາມບ້ານ ແລະເມືອງທີ່ຢູ່ໃກ້ຄຽງເມື່ອສະເລຍແລ້ວປີໜຶ່ງສາມາດມີລາຍຮັບຈາກການຂາຍໝາກໂມປະມານ 20 ກວ່າລ້ານກີບ.

  ທ່ານຍັງໄດ້ກ່າວຕື່ມອີກວ່າ: ການປູກໝາກໂມນີ້ແມ່ນມີລາຍຮັບດີຂັ້ນຕອນໃນການປູກກໍ່ບໍ່ຫຍຸ້ງຍາກ ແລະຕະຫຼາດກໍມີຄວາມຕ້ອງການສູງດັ່ງນັ້ນ, ທາງຄອບຄົວຈຶ່ງໄດ້ຢຶດຖືເອົາການປູກໝາກໂມເປັນທ່າແຮງຫຼັກໃນການສ້າງລາຍຮັບ, ຖ້າທຽບໃສ່ໃນເມື່ອກ່ອນແມ່ນຊີ ວິດການເປັນຢູ່ມີການຫັນປ່ຽນ ຢ່າງຂາດຂັ້ນ, ເຮັດໃຫ້ຄອບຄົວມີຢູ່ມີກິນ, ໄດ້ຫຼຸດພົ້ນອອກຈາກຄວາມ ທຸກຍາກໄດ້ຢ່າງຊິ້ນເຊິງ, ສາມາດ ສ້າງເຮືອນຢູ່ຖາວອນໄດ້ 1 ຫຼັງ, ຊື້ລົດຈັກໄດ້ 2 ຄັນ, ລົດໄຖນາ 1 ເຄື່ອງ ມີເງິນສົ່ງເສີມລູກຮຽນ ໜັງສື, ມີເງິນທຶນໝູນວຽນຈໍານວນໜຶ່ງ, ໃນອະນາຄົດຂ້າງໜ້າແມ່ນຈະໄດ້ຂະຫຍາຍເນື້ອທີ່ປູກຕື່ມອີກ ແລະຈະປູກໝາກໂມຄວບຄູ່ກັບການເຮັດນາປູກເຂົ້າຕາມລະດູ ການ.

  ທ່ານ ຕື້ ແກ້ວຄຳມາ ຮອງນາຍບ້ານໆນາເຕີໄດ້ກ່າວຢັ້ງຢືນວ່າ: ທ່ານ ທອງສຸກ ວິໄລວົງ ແມ່ນຄອບຄົວໜຶ່ງທີ່ມີຄວາມດຸໝັ່ນຂະຫຍັນພຽນໃນການສ້າງເສດຖະກິດຄອບຄົວ ແລະກໍເປັນຄອບຄົວ ໜຶ່ງທີ່ມີຄວາມຕື່ນຕົວສູງເປັນເຈົ້າການໃນການພັດທະນາຊີວິດການເປັນຢູ່ຂອງຕົນຢ່າງບໍ່ຢຸດຢັ້ງຈົນໄດ້ກາຍເປັນຄອບຄົວຫຼຸດພົ້ນອອກຈາກຄວາມທຸກຍາກ ແລະກາຍເປັນຄອບຄົວຕົວແບບຂອງບ້ານ ນາເຕີ້ ເມືອງວິລະບູລີ ແຂວງສະຫວັນນະເຂດ ຂອງພວກເຮົາ.

__________

ຂຽນໂດຍ: ສ. ນາກກາລະສິນ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์