ປັກກິ່ງ ປິດ 3 ເມືອງຄວບຄຸມເຊື້ອໄວຣັສໂຄໂຣນ່າ

 ສຳນັກຂ່າວ CNN ລາຍງານໃນອາທິດຜ່ານມາວ່າລັດຖະບານປັກກິ່ງນະຄອນຫຼວງຂອງ ສປ ຈີນ ຕັດສິນໃຈຍົກເລີກການສະເຫຼີມສະຫຼອງບຸນປີໃໝ່ຈີນຢູ່ຕາມສະຖານ ທີ່ສາທາລະນະຫຼາຍແຫ່ງພາຍໃນເມືອງເຊິ່ງຈະເລີ່ມແຕ່ວັນທີ 25 ມັງກອນ ຫາວັນທີ 8 ກຸມພາ ເພື່ອຄວບຄຸມການແຜ່ລະບາດຂອງເຊື້ອໄວຣັສໂຄໂຣນ່າສາຍພັນໃໝ່ 2019 ທີ່ກຳລັງລະບາດໃນທົ່ວປະເທດຈົນເຮັດໃຫ້ມີຜູ້ເສຍຊີວິດແລ້ວຢ່າງໜ້ອຍ 80 ຄົນ.

  ກົມທ່ອງທ່ຽວ ແລະວັດທະນະທຳ ນະຄອນຫຼວງປັກກິ່ງ ລະບຸໃນຖະແຫຼງການວ່າ “ເພື່ອຄວບຄຸມການລະບາດເພື່ອປົກປ້ອງຊີວິດ ແລະສຸຂະພາບຂອງປະຊາຊົນເພື່ອ
ຫຼຸດຜ່ອນການລວມໂຕກັນເປັນຈຳນວນຫຼວງຫຼາຍ ແລະເພື່ອເຮັດໃຫ້ປະຊາຊົນມີບຸນປີໃໝ່ຈີນທີ່ສະຫງົບສຸກພວກເຮົາຈຶ່ງຕັດສິນໃຈຍົກເລີກທຸກໆເຫດການໃຫຍ່ໆ ລວມທັງງານບຸນວັດຢູ່ປັກກິ່ງນັບແຕ່ມື້ນີ້ເປັນຕົ້ນໄປ.”

 ການເຄື່ອນໄຫວລ້າສຸດແມ່ນເກີດຂຶ້ນຍ້ອນເຊື້ອໄວຣັສໂຄໂຣນ່າສາຍພັນໃໝ່ກຳລັງແຜ່ລະບາດຢູ່ຫຼາຍແຂວງໃນ ສປ ຈີນ ມາຮອດປະຈຸບັນນີ້ ມີ 80 ຄົນໄດ້ເສຍຊີວິດແລ້ວ ໂດຍວັນພະຫັດທີ່ຜ່ານມາເປັນຄັ້ງທຳອິດທີ່ພົບເຫັນຜູ້ເສຍຊີວິດຈາກໄວຣັສນີ້ຢູ່ນອກແຂວງຫູເປີ່ຍມີຜູ້ຕິດເຊື້ອຫຼາຍກວ່າ 2.744 ຄົນ.

ການແຜ່ລະບາດຢ່າງໜັກໄດ້ເຮັດໃຫ້ລັດຖະບານ ສປ ຈີນ ໂຈະການບໍລິການຂົນສົ່ງສາທາລະນະ ແລະປິດສະໜາມບິນສຳລັບຜູ້ໂດຍສານຂາອອກໃນ 3 ເມືອງຄື: ເມືອງ ອູ່ຮັ່ນ ເຊິ່ງເປັນສູນກາງ ແລະເຊື່ອກັນວ່າເປັນແຫຼ່ງທີ່ມາຂອງການລະບາດກັບ 2 ເມືອງໃກ້ຄຽງຄື: ເມືອງຫວງກັງ ແລະເມືອງເອີ້ໂຈ. ນອກຈາກນີ້, ຍັງມີອີກສອງເມືອງ ທີ່ການຂົນສົ່ງສາທາລະນະບາງສ່ວນຖືກໂຈະແມ່ນເມືອງຊຽນເຖົາແລະເມືອງຊື່ປີ່ເຊິ່ງທັງໝົດແມ່ນຢູ່ໃນແຂວງຫູເປີ່ຍ.

    ນອກຈາກຍົກເລີກການສະຫຼອງບຸນປີໃໝ່ຈີນຢູ່ນະຄອນຫຼວງປັກກິ່ງແລ້ວພິພິທະພັນເມືອງຕ້ອງຫ້າມຍັງໄດ້ປະກາດໃນວັນພະຫັດວ່າຈະປິດເມືອງຕ້ອງຫ້າມເຊິ່ງເປັນສະຖານທີ່ທ່ອງທ່ຽວຍອດນິຍົມຂອງປະເທດໃນວັນເສົາ (25 ມັງກອນ)ນີ້ເປັນຕົ້ນໄປຈົນກວ່າຈະມີແຈ້ງການປ່ຽນແປງເພື່ອປ້ອງກັນບໍ່ໃຫ້ເຊື້ອໄວຣັສແຜ່ລາມອອກຈາກການເຕົ້າໂຮມຂອງຄົນ.

_____________

ໜັງສືພິມເສດຖະກິດ-ສັງຄົມ

 

แชร์