ອົງການອະນາໄມໂລກ ບິນດ່ວນໄປຈີນຍອດຜູ້ເສຍຊີວິດເພີ່ມ 80 ຄົນ

 ຜູ້ອຳນວຍການອົງການອະນາໄມໂລກຢ້ຽມຢາມນະຄອນຫຼວງປັກກິ່ງເພື່ອປຶກສາຫາລືການແຜ່ລະບາດຂອງໄວຣັສໂຄໂຣນ່າສາຍພັນໃໝ່ຂະນະຍອດຜູ້ເສຍຊີວິດເພີ່ມເປັນ 80 ຄົນ ສ່ວນຜູ້ຕິດເຊື້ອ 2.744 ຄົນ

  ທ່ານໝໍເທດຣອສ ແອດນາຮອມ ເກເບຣເຍຊຸສ ຜູ້ອຳນວຍການອົງການອະນາໄມໂລກ(WHO)ເປີດເຜີຍເມື່ອວັນທີ 26 ມັງກອນ ຢູ່ລະຫວ່າງການເດີນທາງໄປນະ ຄອນຫຼວງປັກກິ່ງເພື່ອເສີມສ້າງເປັນພັນທະມິດກັບລັດຖະບານຈີນເພື່ອສະໜັບສະໜູນການປ້ອງກັນໂລກລະບາດທັງນີ້ອົງການອະນາໄມໂລກຍັງບໍ່ປະກາດໃຫ້ສະຖານະ ການແຜ່ລະບາດຂອງເຊື້ອໄວຣັສໂຄໂຣນາສາຍພັນໃໝ່ຊຶ່ງມີແຫຼ່ງກຳເນີດທີ່ເມືອງອູ່ຮັ່ນ ໃນມົນທົນຫູເປີ່ຍເປັນພາວະສຸກເສີນດ້ານສາທາລະນະສຸກລະຫວ່າງປະເທດແຕ່ເຕືອນວ່າສະຖານະການໃນຈີນຢູ່ໃນຂັ້ນວິກິດ

  ໃນວັນດຽວກັນນີ້ຄະນະກຳມາທິການສາທາລະນະສຸກແຫ່ງຊາດຂອງຈີນລາຍງານຈຳນວນຜູ້ເສຍຊີວິດຈາກເຊື້ອໄວຣັສໂຄໂຣນ່າສາຍພັນໃໝ່ນັບຕັ້ງແຕ່ຕົ້ນເດືອນທັນວາປີທີ່ແລ້ວເຖິງວັນທີ 26 ມັງກອນທີ່ຜ່ານມາວ່າຢູ່ທີ່ຢ່າງໜ້ອຍ 80 ຄົນ ແລະຈຳນວນຜູ້ຕິດເຊື້ອສະສົມສະເພາະໃນຈີນຢູ່ທີ່ຢ່າງໜ້ອຍ 2.744 ຄົນ ໂດຍສູນກາງຂອງໂລກຍັງແມ່ນມົນທົນຫູເປີ່ຍຊຶ່ງພົບຜູ້ເສຍຊີວິດຢ່າງໜ້ອຍ 24 ຄົນສະເພາະເມື່ອວັນອາທິດ

  ສ່ວນສະຖິຕິຜູ້ຕິດເຊື້ອສະສົມໃນຕ່າງປະເທດທີ່ບໍ່ແມ່ນຮົງກົງ ມາເກົ໊າ ແລະ ໄຕ້ຫວັນ ສປ ຈີນ ພົບການຕິດເຊື້ອຢ່າງໜ້ອຍ 11 ປະເທດຄື: ໄທ, ຍີ່ປຸ່ນ, ສ. ເກົາຫຼີ, ອາເມລິກາ, ການາດາ, ຝຣັ່ງ, ມາເລເຊຍ, ສສ ຫວຽດນາມ, ສິງກະໂປ, ອົດສະຕຣາລີ ແລະເນປານ.  

___________

ໜັງສືພິມເສດຖະກິດ-ສັງຄົມ

 

แชร์