ສກຈຮ ຈໍາປາສັກເປີດໜ່ວຍບໍລິການທີ່ເຊກອງ

  ວັນທີ 25 ມັງກອນ 2020 ສະຖາບັນການເງິນຈຸລະພາກທີ່ຮັບເງິນຝາກຈໍາປາສັກ ຈໍາກັດ ຫຼື ສກຈຮ ຈໍາປາສັກ ໄດ້ຈັດພິທີເປີດໜ່ວຍບໍລິການຢູ່ແຂວງເຊກອງຢ່າງເປັນທາງການໂດຍເຂົ້າຮ່ວມມີທ່ານ ເຫຼັກໄຫຼ ສີວິໄລ ຮອງເຈົ້າແຂວງເຊກອງ, ທ່ານ ນວນຕາ ແກ້ວມະນີ ຫົວໜ້າສາຂາທະນາຄານ ແຫ່ງ ສປປ ລາວ ພາກໃຕ້ທີ່ແຂວງຈໍາ ປາສັກ, ທ່ານນາງ ພະນົມຮັກ ເຂັມມາລາ ຮອງປະທານສະພາບໍລິຫານສະຖາບັນການເງິນຈຸລະພາກ-ພາກໃຕ້ ແລະທ່ານ ໜູເຄືອບ ສິດທິເດດ ຜູ້ອໍານວຍການສະ ຖາບັນການເງິນຈຸລະພາກທີ່ຮັບເງິນຝາກຈໍາປາສັກ ຈໍາກັດ, ພ້ອມນີ້ກໍມີບັນດາ ພະແນກ, ຫ້ອງການ ແລະບັນດາສາຂາທະນາຄານໃນທົ່ວແຂວງເຊກອງເຂົ້າຮ່ວມ.

  ທ່ານ ອາລຸນໂນໄທ ສຸລິເມືອງຈັນ ຮອງຜູ້ອໍານວຍການສະຖາບັນການເງິນຈຸລະພາກ ທີ່ຮັບເງິນຝາກ ຈໍາປາສັກຈໍາກັດ ໄດ້ເວົ້າວ່າ: ນັບແຕ່ວັນທີ 6 ມິຖຸນາ 2019 ທີ່ໄດ້ຮັບອະນຸຍາດຈາກສາຂາທະນາຄານແຫ່ງ ສປປ ລາວ ພາກໃຕ້ທີ່ແຂວງຈໍາປາສັກ ໃຫ້ດຳເນີນທຸລະກິດໜ່ວຍບໍລິການຢູ່ແຊວງເຊກອງຢ່າງເປັນທາງການຊຶ່ງການເນີນທຸລະກິດໄດ້ມີການຂະຫຍາຍຕົວດີຂຶ້ນເປັນລໍາດັບໃນການບໍລິການສິນເຊື່ອຂະໜາດນ້ອຍໃຫ້ແກ່ປະຊາຊົນພາຍໃນແຂວງເຊກອງໂດຍມາຮອດທ້າຍເດືອນມັງກອນ 2020 ມີລູກຄ້າເງິນກູ້ທັງໝົດ 2.154 ຄົນ, ມີຍອດເຫຼືອເງິນກູ້ຢູ່ 39 ຕື້ກວ່າກີບ.

  ສະຖາບັນການເງິນຈຸລະພາກທີ່ຮັບເງິນຝາກຈໍາປາສັກ ຈໍາກັດ ມີໜ່ວຍບໍລິການກວມ 10 ເມືອງຂອງແຂວງຈໍາປາສັກ ແລະມີໜ່ວຍບໍລິການຢູ່ແຂວງເຊກອງ, ສາລະວັນ ແລະແຂວງອັດຕະປື. ໂດຍໃນປີ 2020 ສະຖາບັນການເງິນຈຸລະພາກທີ່ຮັບເງິນຝາກຈໍາປາສັກ ຈໍາກັດ ໄດ້ວາງເປົ້າໃນການດຳເນີນງານໄວ້ 3 ດ້ານທີ່ສໍາຄັນຄື: ອັນທີໜຶ່ງແມ່ນຂະຫຍາຍຖານລູກຄ້າເງິນຝາກ ແລະຍອດເຫຼືອເງິນກູ້ຢ່າງມີຄຸນນະພາບ; ສອງປັບປຸງລະບົບການດຳເນີນງານພາຍໃນເພື່ອຈໍາກັດຄວາມສ່ຽງ ແລະເພີ່ມປະ ສິດທິພາບ ແລະອັນສຸດທ້າຍແມ່ນມີການເພີ່ມ ແລະ ປັບທັກສະພະນັກງານຢ່າງເປັນລະບົບເພື່ອສົ່ງເສີມໃຫ້ເກີດການປ່ຽນແປງທີ່ສ້າງສັນ.

__________

ຂຽນໂດຍ: ສັນຍາ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์