ມາຮູ້ຈັກກັບສະຖານທີ່ທ່ອງທ່ຽວເຂດຊາຍແດນ 4.000 ຂຸມ

 ເມື່ອເວົ້າເຖິງສະຖານທີ່ທ່ອງທ່ຽວທຳມະຊາດຢູ່ໃນປະເທດເຮົາມີຫຼາຍແຫ່ງທີ່ໄດ້ຮັບການພັດທະນາດີພໍສົມຄວນແຕ່ເໜືອຕະຫຼອດໃຕ້ ເພື່ອຊຸກຍູ້ສົ່ງເສີມການທ່ອງທ່ຽວໃຫ້ແຂກທັງພາຍໃນ ແລະຕ່າງປະເທດເຂົ້າມາທ່ຽວລາວໃຫ້ຫຼາຍຂຶ້ນທັງເປັນການສ້າງລາຍຮັບໃຫ້ປະເທດຊາດ ແລະເສີມຂະຫຍາຍ ວັດທະນະທຳຮີດຄອງປະເພນີອັນດີງາມຂອງຄົນລາວກໍ່ຄືຊາດລາວ ໃຫ້ຄົງຢູ່ຄູ່ຄົນລາວຕະຫຼອດໄປ.

  ເຂດຊາຍແດນ 4.000 ຂຸມ ເປັນສະຖານທີ່ທ່ອງທ່ຽວແຫ່ງໜຶ່ງ ທີ່ສໍາຄັນຂອງບ້ານທ່າຄັນຊຸມຊົວ ເມືອງລະຄອນເພັງ ແຂວງສາ ລະວັນ; ມີເນື້ອທີທັງໝົດປະມານ 4 ກິໂລແມັດມົນທົນ, ເປັນເຂດຊາຍ ແດນຢູ່ແຄມແມ່ນໍ້າຂອງລະຫວ່າງ ໄທກັບລາວ ຊຶ່ງຢູ່ຝັ່ງຂອງເບື້ອງ ປະເທດໄທແມ່ນຂຶ້ນກັບບ້ານສອງຄອນ, ອໍາເພີໂພໄຊ, ຈັງຫວັດອຸ ບົນລາດສະຖານີ,ສ່ວນຢູ່ຝັ່ງປະເທດລາວເຮົາແມ່ນຂຶ້ນກັບບ້ານທ່າ ຄັນຊຸມຊົວ ເມືອງລະຄອນເພັງ ແຂວງສາລະວັນ, ເຂດຊາຍແດນ 4.000 ຂຸມໄດ້ມີເລື່ອງເລົ່າສູ່ກັນຟັງສຶບຕໍ່ຫຼາຍເຊັ່ນຄົນກ່ຽວກັບສະຖານທີ່ແຫ່ງນີ້ວ່າ: ມີຫຼາຍເຫດການ ແລະ ຫຼາຍເລື່ອງລາວທີ່ເກີດຂຶ້ນກ່ອນທີ່ສະຖານທີ່ແຫ່ງນີ້ຈະກາຍເປັນທົ່ງຫີນທີ່ກວ້າງໃຫຍ່ຊຶ່ງແນມສຸດສາຍຕາກໍ່ບໍ່ອາດຈະເຫັນໄດ້ໝົດເຊັ່ນ: ເລື່ອງຂົວນາງນີ, ງູຊວງ, ຄ້ອນໄມ້ໃຫຍ່, ຖໍ້າພະຍານາກ, ຮອຍເກີບສິນໄຊແລະອື່ນໆອັນໄດ້ກາຍມາເປັນຫີນເຖິງປະຈຸ ບັນນີ້, ຖ້າເບິ່ງໃນແງ່ຂອງວິທະຍາສາດທໍາມະຊາດຈະເຫັນວ່າສະຖານທີ່ແຫ່ງນີ້ໄດ້ຜ່ານວິວັດທະນາການ ຂອງທໍາມະຊາດມາຫຼາຍຮ້ອຍຫຼາຍ ພັນປີ ຈຶ່ງເຮັດໃຫ້ເປັນຂຸມ, ເປັນຮູບ ປະພັນທີ່ເກີດຈາກຫີນ ແລະເປັນ ຮອງຮອຍທີ່ຄ້າຍກັບວັດຖຸຫຼາຍ ຢ່າງ ໂດຍສະເພາະແມ່ນຂຸມນໍ້າ ໃນຫີນທີ່ມີລາກຫຼາຍຊະນິດແຕກ ຕ່າງກັນຈົນບໍ່ອາດນັບໄດ້ວ່າມີຈັກຂຸມກັນແທ້ນັ້ນເປັນທີ່ມາຂອງເຂດຊາຍແດນ 4.000 ຂຸມ ຊຶ່ງຢູ່ຝັ່ງ ຂອງປະເທດໄທກໍ່ມີລັກສະນະຄ້າຍ ຄືກັນເພີ່ນເອີ້ນວ່າ 3.000 ໂບກ.

   ທ່ານ ບຸນຈັນ ບາງແສງທອງ ຫົວໜ້າຫ້ອງການຖະແຫຼງຂ່າວວັດທະນະທໍາ ແລະທ່ອງທ່ຽວເມືອງລະຄອນເພັງ ກ່າວວ່າ: ເຂດຊາຍແດນ 4.000 ຂຸມໄດ້ພັດທະນາຂຶ້ນມາ ເປັນບ່ອນທ່ອງທ່ຽວ ແລະໄດ້ປະກາດເປັນແຫຼ່ງທ່ອງທ່ຽວຂອງເມືອງລະຄອນເພັງໃນປີ 2016 ຊຶ່ງແຕ່ລະປີຈະຈັດງານບຸນປີໃໝ່ລາວ ແລະບຸນອື່ນໆ ເພື່ອດຶງດູດນັກ ທ່ອງທ່ຽວທັງພາຍໃນ ແລະຕ່າງປະເທດເຂົ້າມາຫຼິ້ນ, ມາທ່ຽວຊົມປະມານ 1.000 ກວ່າຄົນ; ສະຖານທີ່ແຫ່ງນີ້ເປັນສະຖານທີ່ກວ້າງຂວາງ ຮອງຮັບຜູ້ຄົນ ແລະບ່ອນຈອດລົດ ໄດ້ສະດວກສະບາຍອາກາດຊົດຊື່ນອ້ອມຮອບດ້ວຍທຳມະຊາດປ່າໄມ້ຂຽວງາມ, ມີລົມພັດເຢັນສະບາຍໆ, ແນມເບິ່ງນໍ້າຂອງໄຫຼຜ່ານສາມາດສໍາພັດກັບວິຖີການດໍາລົງຊີວິດ ຂອງປະຊາຊົນ; ຍາມແລງຕາເວັນ ໃກ້ຈະລັບຂອບຟ້າເປັນເວລາທີ່ງາມຫຼາຍ,ຈາກເທສະບານເມືອງໄປປະມານ 10 ກວ່າກິໂລແມັດ ເທົ່ານັ້ນທາງທຽວສະດວກດີພ້ອມນີ້ຍັງສາມາດເດີນທາງດ້ວຍເຮືອຂ້າມ ນໍ້າຂອງໄປມາຫາສູ່ກັນທັງສອງ ຝັ່ງຂອງກໍ່ໄດ້ເຊັນກັນ, ຍ້ອນແນວ ນັ້ນອຳນາດການປົກຄອງພ້ອມດ້ວຍປະຊາຊົນ ຈຶ່ງໄດ້ພັດທະນາເຂດດັ່ງກ່າວເປັນແຫຼ່ງທ່ອງທ່ຽວ ທຳມະຊາດເພື່ອຮັກສາຮີດຄອງປະເພນີ, ຄວາມຮັກແພງສາມັກຄີຊ່ວຍເຫຼືອເຊິ່ງກັນ  ແລະກັນຂອງປະຊາຊົນໄວ້ໃຫ້ລູກຫຼານສຶບທອດຕໍ່ໄປ.

ທ່ານຍັງໄດ້ເຊື້ອເຊີນໄປຍັງບຸກຄົນ,ນິຕິບຸກຄົນທັງພາກລັດ ແລະເອກະຊົນທີ່ມີຈິດໃຈຢາກອຸປະຖໍາຊ່ວຍສະໜັບສະໜູນທຶນຮອນສ້າງສາພັດທະນາເຂດຊາຍແດນ 4.000 ຂຸມໃຫ້ເປັນແຫຼ່ງທ່ອງທ່ຽວທີ່ສວຍສົດງົດງາມ, ກາຍເປັນບ່ອນພັກຜ່ອນທີ່ສະດວກສະບາຍຂອງແຂກບ້ານແຂກເມືອງທີ່ໄດ້ມາຢ້ຽມຢາມຊຶ່ງຈະເປັນທ່າແຮງອັນໜຶ່ງໃນການພັດທະນາເຂດດັ່ງກ່າວໃຫ້ຈະເລີນກ້າວໜ້າ.

ສະນັ້ນ ຈຶ່ງຢາກຂໍເຊີນຊວນປະຊາຊົນຊາວລາວ ແລະແຂກຕ່າງປະເທດໃຫ້ມາທ່ຽວຊົມສະຖານທີ່ແຫ່ງນີ້ໃຫ້ນັບມື້ນັບຫຼາຍຂຶ້ນເພື່ອສ້າງລາຍຮັບໃຫ້ກັບປະຊາຊົນໃນ ທ້ອງຖິ່ນ ແລະເປັນການຊຸກຍູ້ສົ່ງ ເສີມການທ່ອງທ່ຽວຂອງລາວໃຫ້ ມີການຂະຫຍາຍຕົວຂຶ້ນເລື້ອຍໆ, ນອກຈາກສະຖານທີ່ແຫ່ງນີ້ເມືອງ ລະຄອນເພັງຍັງມີສະຖານທີ່ທ່ອງ ທ່ຽວອີກຫຼາຍແຫ່ງທີ່ໜ້າສົນໃຈ ເຊັ່ນ: ຫາດດອນຂຽວ, ພູທະແໜມ ແລະສະຖານທີ່ສັກກະລະບູຊາເປັນ ຕົ້ນພະເຈດີຫຼວງປູ່ໂຫທີ່ວັດໂພໄຊ ສີມຸງຄຸນ,ວັດພະບາດນາດູ່, ສາລາ ໂຮງຄໍາວັດບ້ານທ່າຄັນຊຸມຊົວ, ພະທາດເຈດີບ້ານໜອງແສງ ແລະ ຍັງມີບ່ອນອື່ນໆທີ່ໜ້າທ່ຽວຊົມ.

________

ໂດຍ: ມີນາ

แชร์