ເຕັກນິກການປູກໝາກເລັ່ນ

  ໝາກເລັ່ນ ເປັນພືດທີ່ນິຍົມປູກ ແລະບໍລິໂພກຫຼາຍໂດຍນຳໃຊ້ໝາກປະກອບເປັນອາຫານໄດ້ຫຼາຍຢ່າງ ຫຼືບໍລິໂພກສົດໂດຍກົງກໍໄດ້ນອກຈາກນີ້ຍັງສາມາດນຳໃຊ້ເປັນວັດ ຖຸດິບປ້ອນໂຮງງານອຸດສາຫະກຳແປຮູບໄດ້ຫຼາຍຊະນິດເຊັ່ນ: ເຮັດນໍ້າໝາກເລັ່ນ, ໝາກເລັ່ນດອງ ແລະອື່ນໆ, ໝາກເລັ່ນສາມາດຈະເລີນເຕິບໂຕໄດ້ໃນດິນເກືອບທຸກຊະ ນິດ, ແຕ່ດິນທີ່ເໝາະສົມຄວນເປັນດິນຊາຍແກມຕົມມີການລະບາຍນໍ້າດີເປັນພືດມັກແສງອຸ່ນນະພູມຂອງອາກາດທີ່ເໝາະສົມລະຫວ່າງ 15 ຫາ 25 ອົງສາ.

  ອີງຕາມຄູ່ມືການປູກຝັງໃຫ້ຮູ້ວ່າ: ໝາກເລັ່ນທີ່ນິຍົມປູກຢູ່ບ້ານເຮົາມີ 2 ປະເພດຄື: ພັນໝາກໃຫຍ່ ແລະພັນໝາກນ້ອຍ; ພັນໝາກເລັ່ນໃຫຍ່ນິຍົມໃຊ້ເຮັດຍໍາສະຫຼັດ ແລະປະດັບຈານອາຫານ, ເວລາສຸກແດງເຂັ້ມ ຊີ້ນໜາ ເປືອກບໍ່ ໜຽວ; ສ່ວນພັນໝາກນ້ອຍມີລົດ ຊາດສົ້ມສ່ວນຫຼາຍແມ່ນພັນພື້ນ ເມືອງປູກໄດ້ທຸກລະດູການສໍາລັບ ການກຽມດິນປູກ; ໝາກເລັ່ນເປັນພືດທີ່ລະບົບຮາກເລິກຄວນໄຖຂຸດ ດິນໃຫ້ເລິກປະມານ 30 ຫາ 40 ຊັງຕີແມັດ ຕາກດິນໄວ້ 7 ຫາ 10 ວັນ, ໃສ່ຝຸ່ນຄອກ ຫຼືຝຸ່ນບົ່ມໃຫ້ ຫຼາຍເພື່ອປັບປຸງສະພາບດິນໃຫ້ດິນມີອິນຊີວັດຖຸສູງມີການລະບາຍນໍ້າໄດ້ດີ, ຈາກນັ້ນໃຫ້ເຮັດຮ່ອງເປັນແຖວໆເລິກປະມານ 1 ຊັງຕີແມັດ, ຫ່າງກັນແຖວລະ 10 ຊັງຕີແມັດ ໂຮຍເມັດລົງຕາມຮ່ອງແລ້ວກົບດ້ວຍຝຸ່ນຄອກ ຫຼືຝຸ່ນບົມປົກດ້ວຍເຟືອງ ຫຼືຫຍ້າແຫ້ງຫົດນໍ້າໃຫ້ຊຸ່ມ; ຫຼັງຈາກເມັດງອກເປັນເບ້ຍປະມານ 10 ວັນ ບ່ອນໃດມີຕົ້ນເບ້ຍໜາແໜ້ນໃຫ້ຖອນແຍກອອກໃຫ້ເຫຼືອຫ່າງກັນຕົ້ນລະປະມານ 2 ຫາ 3 ຊັງຕີແມັດ, ເມື່ອອາຍຸໄດ້ 25 ຫາ 30 ວັນ ມີໃບແທ້ 3 ຫາ 4 ໃບ ກໍແຍກເອົາໄປປູກໄດ້ຄວນເລືອກຕົ້ນທີ່ໆງາມ ແລະບໍ່ຄວນໃຊ້ເບ້ຍທີ່ມີອາຍຸເກີນ 35 ວັນ ປູກເພາະຈະແກ່ເກີນໄປ, ການຖອນເບ້ຍໄປປູກຄວນໃຫ້ມີດິນຕິດຮາກໄປນຳ ແລະກ່ອນປູກຕັດໃບແທ້ 2 ໃບທຳອິດອອກເພື່ອໃຫ້ຕົ້ນເບ້ຍໄດ້ຕັ້ງໂຕໄວຕັ້ງ ເບ້ຍໃຫ້ຊື່ຖົມດິນຮອບຕົ້ນໃຫ້ແໜ້ນແລ້ວຫົດນໍ້າໃຫ້ຊຸ່ມໃຊ້ເຈ້ຍ ຫຼືໃບຕອງບັງແດດໃນໄລຍະ 3 ຫາ 4 ວັນ.

 ດ້ານການບົວລະບັດຮັກສາໝາກເລັ່ນເປັນພືດຕ້ອງການຝຸ່ນພໍສົມຄວນ, ດັ່ງນັ້ນການກຳນົດຝຸ່ນເພື່ອນຳໃຊ້ແມ່ນມີຄວາມຈຳເປັນໃຫ້ຖືກຕ້ອງແນໃສ່ການຫຼຸດຕົ້ນທຶນການຜະລິດ ແລະໃຫ້ມີປະສິດຕິຜົນສູງທາງດ້ານການຈະເລີນເຕີບໂຕການອອກດອກ ແລະຈັບໝາກ,ດັ່ງນັ້ນ,ຈຶ່ງແນະນຳໃຫ້ໃຊ້ຝຸ່ນຄອກ ແລະຝຸ່ນບົ່ມເພື່ອປັບປຸງດິນເຮັດໃຫ້ດິນມີຄວາມອຸດົມສົມບູນດີທາງດ້ານອາຫານ; ການໃຫ້ນໍ້າຄວນໃຫ້ພຽງພໍແຕ່ຢ່າໃຫ້ປຽກເກີນໄປໃຫ້ເບີ່ງຄວາມຊຸ່ມຊື່ນໃນໜານປູກ, ການພວນດິນກຳຈັດຫຍ້າຄວນເຮັດໃນໄລຍະທຳອິດເພື່ອເຮັດໃຫ້ດິນລຸລ່ວງຜຸຜົງລະບາຍອາກາດ ແລະນໍ້າໄດ້ດີພ້ອມກັບກຳຈັດຫຍ້າໄປພ້ອມໆກັນ, ເມື່ອຕົ້ນພືດມີໃບປົກຄຸມດິນແລ້ວບໍ່ຈຳເປັນເຮັດເລີຍ.

  ການປັກຄ້າງ: ໝາກເລັ່ນພັນຟຸ່ມຖ້າຫາກປູກໃນລະດູແລ້ງແມ່ນ ບໍ່ຈຳເປັນປັກຄ້າງແຕ່ວ່າພັນເຄືອຈຳເປັນຕ້ອງມີຄ້າງທັງແລ້ງ ແລະຝົນ, ໂດຍໃຊ້ໄມ້ໄຜ່ ຫຼືໄມ້ອື່ນໆ ຍາວປະມານ 1,50 ແມັດ ປັກໃຫ້ແໜ້ນບໍ່ໃຫ້ລົ້ມໃນເວລາໝາກເລັ່ນເປັນໝາກ;ສ່ວນການເກັບກ່ຽວ: ໝາກເລັ່ນແຕ່ພັນມີອາຍຸການເກັບກ່ຽວແຕກຕ່າງກັນ, ໂດຍທົ່ວ ໄປ ແລ້ວໝາກເລັ່ນຈະສຸກແກ່ເປັນເກັບກ່ຽວໄດ້ເມື່ອອາຍຸປະມານ 80 ຫາ 90 ວັນ ຫຼັງຈາກຍ້າຍປູກ, ຖ້າປູກໝາກເລັ່ນເພື່ອສົ່ງຕະຫຼາດປະເພດໝາກສົດຄວນເລືອກໝາກທີ່ປ່ຽນສີຈາກສີຂຽວເປັນສີບົວບໍ່ຄວນປ່ອຍໄວ້ຈົນເປັນສີແດງສຸກຄາຕົ້ນເພາະຈະເຮັດໃຫ້ມີບັນຫາໃນການຂົນສົ່ງ ແລະເສຍຄຸນນະພາບເວລາເຖິງຈຸດໝາຍຈຳໜ່າຍ, ການເກັບໝາກເລັ່ນນີ້ສາມາດເກັບໄດ້ຫຼາຍເທື່ອຕິດຕໍ່ກັນໄດ້ເຖິງ 30 ວັນ.

__________

ຂຽນໂດຍ: ແປ 
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์