ຊົນເຜົ່າກຶມມຸ ບ້ານຫຼັກ 10 ເມືອງໄຊ ສະຫຼອງບຸນປີໃໝ່

 ບຸນປີໃໝ່ຂອງປະຊາຊົນ ເຜົ່າກຶມມຸ ບ້ານຫຼັກ 10 ເມືອງໄຊ ແຂວງອຸດົມໄຊປະຈໍາປີ  2020  ໄດ້ຈັດຂຶ້ນໃນລະຫວ່າງວັນທີ 13-18 ມັງກອນ ທີ່ບ້ານດັ່ງກ່າວ ໂດຍການ ເຂົ້າຮ່ວມຂອງທ່ານ ພອນສະຫວັນ ພັນທະວິຈິດ ຫົວໜ້າພະແນກຖະ ແຫຼງຂ່າວວັດທະນະທໍາ ແລະທ່ອງ ທ່ຽວແຂວງອຸດົມໄຊ, ມີບັນດາ ການນໍາແຂວງ, ເມຶືອງໄຊ, ຄະນະບ້ານຕະຫຼອດຮອດພໍ່ແມ່ປະຊາຊົນ ພາຍໃນບ້ານຫຼັກ 10 ແລະບ້ານ ອ້ອມຂ້າງເຂົ້າຮ່ວມ.

ການຈັດງານສະເຫຼີມສະຫຼອງ ບຸນປີໃໝ່ຂອງຊົນເຜົ່າກຶມມຸທີ່ບ້ານ ຫຼັກ 10 ນີ້ກໍເພື່ອເປັນການຊຸກຍູ້ ສົ່ງເສີມວຽກງານການທ່ອງທ່ຽວ ຂອງແຂວງ, ເພື່ອສ້າງບ້ານຫຼັກ 10 ໃຫ້ການເປັນບ້ານວັດທະນະທຳທ່ອງທ່ຽວທາງດ້ານຊົນເຜົ່າ, ເປັນການອະນຸລັກ, ຮັກສາ ແລະ ເສີມຂະຫຍາຍຮີດຄອງປະເພນີອັນ ດີງາມຂອງຊົນເຜົ່າກຶມມຸໃຫ້ຍືນ ຍົງ, ເປັນການຜູກແໜ້ນຄວາມສາ ມັກຄີຂອງປະຊາຊົນກັບພັກລັດ, ນັກທຸລະກິດ ແລະນັກທ່ອງທ່ຽວ, ລວມທັງເປັນການໂຄສະນາ, ເຜີຍ ແຜ່ວັດທະນະທໍາ, ຮີດຄອງປະເພນີ, ວັນນະຄະດີ, ຜະລິດຕະພັນ, ສີໄມ້ລາຍມື, ອາຫານພື້ນເມືອງທີ່ເປັນເອກະລັກຂອງຊົນເຜົ່າກຶມມຸ ໃຫ້ສັງຄົມ, ນັກທ່ອງທ່ຽວທັງພາຍ ໃນ  ແລະຕ່າງປະເທດໄດ້ຮັບຮູ້ຢ່າງກວ້າງຂວາງ.

ບ້ານຫຼັກ 10 ຕັ້ງຢູ່ລຽບເສັ້ນ ທາງເລກທີ 13 ເໜືອ ຫ່າງຈາກ ເທສະບານແຂວງ 10 ກິໂລແມັດ ລວມມີ 155 ຫຼັງຄາເຮືອນ, 177 ຄອບຄົວ, ມີພົນລະເມືອງລວມທັງ ໝົດ 878 ຄົນ, ຍິງ 409 ຄົນ,ປະກອບມີ 4 ເຜົ່າ ທີ່ດຳລົງຊີວິດຢູ່ຮ່ວມກັນເຊັ່ນ: ເຜົ່າລາວ, ກຶມມຸ, ມົ້ງ ແລະເຜົ່າພູນ້ອຍ, ອາຊີບຕົ້ນຕໍ ຂອງປະຊາຊົນແມ່ນຖືເອົາການ ປູກຝັງ, ລ້ຽງສັດນ້ອຍ ແລະຄ້າ ຂາຍບໍລິການຕ່າງໆ ໃນນັ້ນເດັ່ນກວ່າໝູ່ແມ່ນການປູກຜັກປອດສານພິດໃນເຮືອນຮົ່ມສະເລ່ຍລາຍຮັບ ຂອງບ້ານໄດ້  2,60  ຕື້ກວ່າກີບຕໍ່ປີ, ສະເລ່ຍໃສ່ພົນລະເມືອງໄດ້ເກືອບ 3 ລ້ານກີບຕໍ່ຄົນຕໍ່ປີ.

  ພາຍໃນງານມີກິດຈະກໍາສໍາ ຄັນຫຼາຍຢ່າງເຊັ່ນ: ການສະແດງສິ ລະປະ-ວັນນະຄະດີຂອງຊາວໜຸ່ມ, ເຍົາວະຊົນ, ເຖົ້າແກ່ແນວໂຮມ,ນັກຮຽນພາຍໃນບ້ານ ແລະໂຮງ ຮຽນບ້ານອ້ອມຂ້າງເຊັ່ນ: ການ ຂັບ, ລໍາ, ເຕີມ, ເປົ່າປີ່, ເປົ່າແຄນ, ຟ້ອນທັ່ງບັ້ງ ແລະການເຕັ້ນຄຣຽບ, ລວມທັງການແຂ່ງຂັນກີລາພື້ນ ເມືອງຂອງຊົນເຜົ່າກຶມມຸເຊັ່ນ:ຂຶ້ນເສົານໍ້າມັນ, ດຶງເຊືອກ, ແລ່ນເປົ໋າ, ຕຳເຂົ້າ, ການປະກວດສາວງາມ ຂອງເຜົ່າກຶມມຸປະຈຳແຂວງ, ປະກວດນັກຮ້ອງສຽງດີ, ປະກວດຂັບ ລຳ, ປະກວດເດີນແບບອາພອນ ຂອງເຜົ່າກຶມມຸ, ທ່ຽວຊົມງານຕະ ຫຼາດນັດ ແລະອື່ນໆ, ນອກຈາກນີ້ ຍັງມີການບາສີສູ່ຂວັນໃຫ້ກັບການ ນໍາແຂວງ, ເມືອງໄຊ ແລະຜູ້ເຂົ້າ ຮ່ວມຕາມຮີດຄອງປະເພນີ ແລະທ່ຽວຊົມກິດຈະກຳທີ່ຕິດພັນກັບວິ ຖີຊີວິດເປັນຕົ້ນແມ່ນຕູບ, ເຮືອນ ບູຮານ, ເຄື່ອງມືຮັບໃຊ້ໃນຊີວິດປະຈຳວັນຂອງປະຊາຊົນໃນເມື່ອ ກ່ອນພ້ອມທັງຊີມອາຫານທີ່ເປັນເອກະລັກພື້ນເມືອງຂອງຊົນເຜົ່າ ກຶມມຸທີ່ປະຊາຊົນໄດ້ກະກຽມ ແລະ ນຳມາຈັດວາງໄວ້.

------

ໂດຍ: ນໍ້າເໝີຍ

แชร์