ນາຍົກ ສັ່ງປັບປຸງສິ່ງກີດຂວາງການລົງທຶນ ແລະດຳເນີນທຸລະກິດ

 ເພື່ອຜັນຂະຫຍາຍເນື້ອໃນຂອງກົດໝາຍວ່າດ້ວຍການສົ່ງເສີມການລົງທຶນ ແລະກົດໝາຍກ່ຽວຂ້ອງໃຫ້ຖືກຈັດຕັ້ງປະຕິບັດຢ່າງວ່ອງໄວ ແລະຈະແຈ້ງໂດຍສະເພາະການປັບປຸງລະບົບບໍລິການໆລົງທຶນປະຕູດຽວ ແລະການດໍາເນີນທຸລະກິດໃຫ້ມີຄວາມວ່ອງໄວ, ໂປ່ງໃສ ແລະເປັນເອກະພາບ, ທ່ານ ທອງລຸນ ສີສຸລິດ ນາຍົກລັດຖະມົນຕີອອກຄໍາສັ່ງເລກທີ 03/ນຍ ລົງວັນທີ 21 ມັງກອນ 2020 ໂດຍໃຫ້ກະຊວງ, ອົງການລັດທຽບເທົ່າກະຊວງ ແລະ ອົງການປົກຄອງທ້ອງຖິ່ນໃນທົ່ວປະເທດທີ່ກ່ຽວຂ້ອງກັບວຽກງານດັ່ງກ່າວຮີບຮ້ອນແກ້ໄຂບັນດາຂອດຂັ້ນກໍານົດເວລາ ແລະສິ່ງຂີດຂວາງທີ່ເປັນອຸປະສັກແກ່ການອະນຸຍາດລົງທຶນ ແລະການດໍາເນີນທຸລະກິດຢູ່ ສປປ ລາວ.

  ອີງຕາມຄໍາສັ່ງນາຍົກລັດຖະມົນຕີວ່າດ້ວຍການປັບປຸງວຽກງານການບໍລິການໆອອກໃບອະນຸຍາດລົງທຶນ ແລະການອອກໃບອະນຸຍາດດໍາເນີນທຸລະກິດໄດ້ລະບຸໃຫ້ພາກ ສ່ວນກ່ຽວຂ້ອງປະຕິບັດມີຄື: 1) ມອບໃຫ້ຂະແໜງແຜນການ ແລະການລົງທຶນປັບປຸງການບໍລິການໆລົງທຶນປະຕູດຽວເປັນກົນໄກອໍານວຍຄວາມສະດວກໃຫ້ນັກລົງທຶນ ໂດຍການສະໜອງຂໍ້ມູນ, ການອອກໃບອະນຸຍາດ, ໃບສົ່ງເສີມ ແລະອື່ນໆ; ພາຍຫຼັງໄດ້ຮັບເອກະສານຂໍລົງທຶນແລ້ວຫ້ອງການບໍລິການໆລົງທຶນປະຕູດຽວສົ່ງເອກະສານໄປຂໍຄໍາເຫັນນໍາຂະແໜງການກ່ຽວຂ້ອງພາຍໃນກໍານົດ 2 ວັນ ແລະເມື່ອໄດ້ຮັບຄໍາເຫັນຕອບຄືນແລ້ວຕ້ອງນໍາສະເໜີຕໍ່ຄະນະກໍາມະການສົ່ງເສີມ ແລະຄຸ້ມຄອງການລົງ ທຶນເພື່ອພິຈາລະນາ, ສ່ວນການຍື່ນຄໍາຮ້ອງຂໍລົງທຶນໃນກິດຈະການສໍາປະທານ ແລະຄວບຄຸມແມ່ນໃຫ້ຍື່ນຜ່ານຫ້ອງການບໍລິການການລົງທຶນປະຕູດຽວຂັ້ນສູນກາງຕັ້ງຢູ່ກົມສົ່ງເສີມການລົງທຶນ, ຂັ້ນແຂວງຕັ້ງຢູ່ພະແນກແຜນການ ແລະການລົງທຶນ; ສ້າງລະບົບເອເລັກໂຕຣນິກເພື່ອເຊື່ອມຕໍ່ຂໍ້ມູນລະຫວ່າງຂະແໜງແຜນການ, ອຸດສາ ຫະກໍາ, ການເງິນ ແລະຂະແໜງການກ່ຽວຂ້ອງໃຫ້ເປັນຖານຂໍ້ມູນດຽວ; ເປັນເຈົ້າການສັງລວມບັນຊີຜະລິດຕະພັນສໍາເລັດຮູບ ແລະເຄິ່ງສໍາເລັດຮູບຈາກຂະແໜງກ່ຽວ ຂ້ອງເພື່ອເປັນບ່ອນອີງໃນການພິຈາລະນາໃຫ້ນະໂຍບາຍ ດ້ານພາສີ-ອາກອນ.

 2) ມອບໃຫ້ຂະແໜງອຸດສາຫະກໍາ ແລະການຄ້າອອກໃບທະບຽນວິສາຫະກິດສໍາລັບກິດຈະການຄວບຄຸມ, ສ່ວນກິດຈະການທີ່ບໍ່ນອນໃນບັນຊີຄວບຄຸມໃຫ້ປະຕິບັດຕາມຂໍ້ຕົກລົງສະບັບເລກທີ 0023/ອຄ.ກຄທວ ລົງວັນທີ 9 ມັງກອນ 2019; ເປັນເຈົ້າການປະສານສົມທົບຂະແໜງການກ່ຽວຂ້ອງໃນການປັບປຸງອອກໃບອະນຸຍາດດໍາເນີນທຸລະກິດ ແລະປັບປຸງອອກໃບທະບຽນວິສາຫະກິດໃຫ້ວ່ອງໄວຂຶ້ນ. 3) ມອບໃຫ້ຂະແໜງການເງິນແກ້ໄຂການນໍາເອົາແຜນນໍາເຂົ້າປະຈໍາປີ (Master List) ເຂົ້າລະບົບການແຈ້ງພາສີປະຕູດຽວແຫ່ງຊາດໂດຍໄວພາຍຫຼັງຂໍ້ຕົກລົງຈາກຂະແໜງແຜນການ ແລະ ການລົງທຶນຮັບຮອງແລ້ວ; ປັບປຸງການອອກໃບທະບຽນອາກອນໃຫ້ວ່ອງໄວ ແລະຈັດສັນງົບປະມານສະໜອງແກ່ການສ້າງລະບົບເອເລັກໂຕຣນິກເພື່ອເຊື່ອມຕໍ່ຂໍ້ມູນລະຫວ່າງຂະແໜງການກ່ຽວຂ້ອງ.

  4) ມອບໃຫ້ກະຊວງ,ອົງການລັດທຽບເທົ່າກະຊວງ, ແຂວງນະຄອນຫຼວງຮີບຮ້ອນສ້າງຕັ້ງໜ່ວຍປະສານງານບໍລິການການລົງທຶນປະຕູດຽວປະຈໍາຂະແໜງການຂອງຕົນຂຶ້ນ; ໃຫ້ມີການກໍາ ນົດລະບຽບ ແລະເວລາໃນການຄົ້ນຄວ້າເພື່ອປະກອບຄໍາເຫັນພາຍຫຼັງໄດ້ຮັບເອກະສານຄໍາຮ້ອງຂໍລົງທຶນຈາກຫ້ອງການບໍລິການການລົງທຶນປະຕູດຽວ; ສ້າງບັນຊີຮຽການລົງທຶນທີ່ປະກອບດ້ວຍຂໍ້ມູນພື້ນຖານສໍາຄັນເຊັ່ນ: ຊື່ໂຄງການ, ຈຸດປະສົງ, ທີ່ຕັ້ງ, ມູນຄ່າ, ຕະຫຼາດຈໍາໜ່າຍ, ນະໂຍບາຍພາສີ-ອາກອນແລະອື່ນໆ ເພື່ອອໍານວຍຄວາມສະດວກໃຫ້ແກ່ນັກລົງທຶນໃນການສຶກສາເບື້ອງຕົ້ນ; ສ້າງລາຍການເອກະສານທີ່ຕ້ອງການໃຫ້ນັກລົງທຶນປະກອບໃນເວລາຍື່ນຄໍາຮ້ອງຂໍລົງທຶນແລ້ວສະໜອງໃຫ້ຫ້ອງການບໍລິການການລົງທຶນປະຕູດຽວເພື່ອເປັນຂໍ້ມູນແນະນໍານັກລົງທຶນໃນເວລາປະກອບຄໍາຮ້ອງ;ໃຫ້ມີການປັບປຸງ ແລະທົບທວນບັນຊີກິດຈະການຄວບຄຸມຄືນໃໝ່ຕາມດໍາລັດຂອງທ່ານນາຍົກລັດຖະມົນຕີສະບັບເລກທີ 03/ນຍ ລົງວັນທີ 10 ມັງກອນ 2019; ໃຫ້ກະຊວງ, ອົງການລັດທຽບເທົ່າກະຊວງກໍານົດແບ່ງຄວາມຮັບຜິດຊອບໃນການອະນຸຍາດດໍາເນີນທຸລະກິດລະຫວ່າງສູນກາງ ແລະທ້ອງຖິ່ນ ແລະສ້າງນິຕິກໍາສະເພາະກ່ຽວກັບການອອກໃບອະນຸຍາດດໍາເນີນທຸລະກິດໃນຂະແໜງການຂອງຕົນ; ໃຫ້ສັງລວມລາຍການກິດຈະການທີ່ຕ້ອງການອອກໃບອະນຸຍາດດໍາເນີນທຸລະກິດໂດຍໃຫ້ໃສ່ລະຫັດ LSIC ໃນແຕ່ລະກິດຈະການໃຫ້ຖືກ ຕ້ອງຊັດເຈນ.

5) ການຈັດຕັ້ງເຄື່ອນໄຫວຂອງຄະນະກໍາມະການສົ່ງເສີມ ແລະຄຸ້ມຄອງການລົງທຶນຂັ້ນສູນກາງ, ແຂວງ ແລະນະຄອນຫຼວງແມ່ນໃຫ້ດໍາເນີນການຈັດກອງປະຊຸມຢ່າງ ນ້ອຍ 2 ຄັ້ງຕໍ່ເດືອນເພື່ອພິຈາລະນາບັນຫາກ່ຽວຂ້ອງແລ້ວລາຍງານຕໍ່ທ່ານນາຍົກລັດຖະມົນຕີ, ເຈົ້າ ແຂວງ ຫຼືເຈົ້ານະຄອນຫຼວງເພື່ອຊາບ. 6) ມາດຕະການຈັດຕັ້ງປະຕິບັດໂຄສະນາເຜີຍແຜ່ໃຫ້ຂະແໜງການ, ທ້ອງຖິ່ນ ແລະນັກລົງທຶນໃຫ້ມີຄວາມເຂົ້າໃຈ ແລະ ຈັດຕັ້ງປະຕິບັດຢ່າງເຂັ້ມງວດ; ມອບໃຫ້ຂະແໜງແຜນການເປັນເຈົ້າ ການຕິດຕາມປະເມີນຄວາມຄືບໜ້າ ແລະສະຫຼຸບລາຍງານລັດຖະບານຢ່າງເປັນປະຈໍາ; ມອບໃຫ້ຂະແໜງອຸດສາຫະກໍາ ແລະ ການຄ້າເປັນເຈົ້າການຕິດຕາມການປັບປຸງຂອດຂັ້ນ ແລະກໍານົດເວລາໃນການອອກໃບອະນຸຍາດ; ໃຫ້ບັນດາກະຊວງ, ອົງການລັດທຽບເທົ່າກະຊວງ, ອົງການປົກຄອງທ້ອງຖິ່ນແລະພາກສ່ວນກ່ຽວຂ້ອງຈົ່ງຮັບຮູ້ໃຫ້ການຮ່ວມມື ແລະຈັດຕັ້ງປະຕິບັດຢ່າງເຂັ້ມງວດ.

______________

ຂຽນໂດຍ: ແປ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์