ເມືອງຊຽງຮ່ອນ ເປີດໜ່ວຍບໍລິການຜ່ານປະຕູດຽວ

   ເມືອງຊຽງຮ່ອນ ແຂວງໄຊຍະບູລີ ໄດ້ເປີດໜ່ວຍບໍລິການເສຍຄ່າທຳນຽມຜ່ານປະຕູດຽວໃນວັນ ທີ 16 ມັງກອນຜ່ານມາໂດຍການເປັນປະທານຂອງທ່ານ ກົງທອງ ສິດທິໄຊ ຮອງເຈົ້າເມືອງໆຊຽງຮ່ອນ, ມີທ່ານ ສາຍສະໝອນ ພົມມະຂັນ ຮອງພະແນກພາຍໃນ ແຂວງໄຊຍະບູລີ ມີບັນດາທ່ານຫົວໜ້າຫ້ອງການ ແລະພະນັກງານວິຊາ ການພາກສ່ວນທີ່ກ່ຽວຂອງເຂົ້າຮ່ວມ.

 ທ່ານ ພັນເລົ່າ ຫົວໜ້າຫ້ອງການພາຍໃນເມືອງໄດ້ຜ່ານຂໍ້ຕົກລົງວ່າການອະນຸມັດສ້າງຕັ້ງໜ່ວຍ ງານກົນໄກການເກັບຄ່າທຳນຽມຜ່ານປະຕູດຽວ,ຂໍ້ລົງຕົກລົງວ່າດ້ວຍການແຕ່ງຕັ້ງບັນຈຸຊັບຊ້ອນ ບຸກຕະລາກອນເຂົ້າປະຈຳການຢູ່ໜ່ວຍງານ ແລະຜ່ານຂໍ້ຕົກລົງ ວ່າດ້ວຍການເກັບຄ່າທຳນຽມ, ຄ່າບໍລິການ ແລະຄ່າແບບຟອມເອກກະສານຂອງກົນໄກການບໍລິ ການຜ່ານປະຕູດຽວ ໂດຍປະຕິບັດ ຕາມຄຳສັ່ງນາຍົກລັດຖະມົນຕີ ສະບັບເລກທີ 09/ນຍ ລົງວັນທີ 28 ມັງກອນ 2013 ວ່າດ້ວຍການ ເພີ່ມທະວີການຈັດຕັ້ງປະຕິບັດ ກົນໄກການບໍລິການຜ່ານປະຕູດຽວໃນຂອບເຂດທົ່ວປະເທດພ້ອມທັງຊຸກຍູ້ຂອດການຈັດຕັ້ງປະຕິບັດໃຫ້ສອດຄ່ອງການຈັດເກັບລາຍຮັບໃຫ້ລວມສູນ ແລະສະກັດກັ້ນການຮົ່ວໄຫຼດ້ານລາຍຮັບງົບປະມານ, ຊຶ່ງໜ້າວຽກຂອງໜ່ວຍງານບໍລິການຜ່ານປະຕູດຽວປະກອບມີ 9 ວຽກງານຄື: 1 ວຽກງານແຈ້ງພາສີ-ອາກອນ, 2 ວຽກງານອະນຸຍາດຈົດທະບຽນວິສາຫະກິດ, 3 ວຽກງານຄຸ້ມຄອງນຳ ໃຊ້ທີ່ດິນ, 4 ວຽກງານຄຸ້ມຄອງນຳໃຊ້ຊັບພະຍາກອນປ່າໄມ້, 5 ວຽກງານຄຸ້ມຄອງການຂົນສົ່ງພາຫະນະ ແລະການປຸກສ້າງ, 6 ວຽກງານວິທະຍາສາດ ແລະເຕັກໂນ ໂລຊີ, 7 ວຽກງານພາຍໃນ, 8 ວຽກງານຖະແຫຼງຂ່າວວັດທະນະທຳ ແລະທ່ອງທ່ຽວ, 9 ວຽກ ງານພະລັງງານ ແລະບໍ່ແຮ່.

  ຕອນທ້າຍ ທ່ານ ກົງທອງ ສິດທິໄຊ ໄດ້ໃຫ້ກຽດໂອ້ລົມເພື່ອເຮັດໃຫ້ການບໍລິການຂອງລັດໃນການອະນຸຍາດຕ່າງໆໃຫ້ນັກທຸລະກິດຜູ້ປະກອບການພໍ່ຄ້າຊາວຂາຍ ແລະປະຊາຊົນມີຄວາມສະດວກ ແລະວ່ອງໄວບໍ່ຜ່ານຫຼາຍຂັ້ນຕອນ ຫຼາຍຂອດ ແລະສັບສົນໃຫ້ຜູ້ມາ ບໍລິການ ແລະເປັນການສ້າງໃຫ້ ຂະແໜງການມີຄວາມໜັກແໜ້ນເຂັ້ມແຂງມີຄວາມໂປ່ງໃສຕ້ານການສໍ້ລາດບັງຫຼວງກາຍອົງການບໍລິການປະຊາຊົນທີ່ດີ ແລະ ທ່ານຍັງໄດ້ຮຽກຮ້ອງໃຫ້ຄະນະຮັບຜິດຊອບ ແລະ ພະນັກງານໜ່ວຍງານການບໍລິການຜ່ານປະຕູດຽວຕ້ອງໄດ້ເອົາໃຈໃສ່ໂຄສະນາເຜີຍແຜ່ແນະນຳນິຕິກຳຕ່າງໆທີ່ພົວພັນເຖິງການຄຸ້ມຄອງສິນຄ້າ ແລະການບໍລິການຜ່ານປະຕູດຽວໃຫ້ພາກລັດ, ເອກກະຊົນ ແລະປະຊາຊົນໄດ້ຮັບ ແລະຮູ້ເຂົ້າໃຈພ້ອມທັງເອົາໃຈໃສ່ປະຕິບັດຫຼັກການ ແລະແບບແຜນວິທີເຮັດວຽກບົນພື້ນຖານລວມສູນປະຊາທິປະໄຕແບ່ງງານໃຫ້ບຸກຄົນຮັບ ຜິດຊອບມີການກວດກາຕິດຕາມຊຸກຍູ້ຢ່າງເປັນປົກກະຕິ.

 --------------

ຂຽນໂດຍ: ດອນ ຂຽວພະນາ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์