ລັດກູ້ເງິນສ້າງຂົວມິດຕະພາບລາວ-ໄທ ແຫ່ງທີ V

  ໃນວັນທີ 17 ມັງກອນ 2020 ທີ່ນະຄອນຫຼວງວຽງຈັນ, ລັດຖະບານແຫ່ງ ສປປ ລາວ ຕາງໜ້າໂດຍກະຊວງການເງິນ, ໄດ້ລົງນາມເຊັນສັນຍາເງິນກູ້ຢືມເງິນຈາກອົງການຮ່ວມມືພັດທະນາເສດຖະກິດກັບປະເທດເພື່ອນບ້ານ (NEDA) ແຫ່ງລາຊະອານາຈັກໄທ, ສຳລັບໂຄງການກໍ່ສ້າງຂົວຂ້າມນໍ້າຂອງມິດຕະພາບລາວ-ໄທແຫ່ງທີ V (ແຂວງບໍລິຄໍາໄຊ-ບຶງການ) ໃນມູນຄ່າ 1,38 ຕື້ກວ່າບາດ.

  ຕາງໜ້າລັດຖະບານແຫ່ງ ສປປ ລາວ ໂດຍແມ່ນທ່ານ ບຸນໂຈມ ອຸບົນປະເສີດ ຮອງລັດຖະມົນຕີກະຊວງການເງິນກັບທ່ານ ພິຣະເມດ ວຸດທິທອນເນຕິຣັກ ປະທານອົງ ການຮ່ວມມືພັດທະນາເສດຖະກິດກັບປະເທດເພື່ອນບ້ານ (NEDA) ແຫ່ງລາຊະອານາຈັກໄທ, ມີຄະນະນໍາຈາກກະຊວງໂຍທາທິການ ແລະຂົນສົ່ງ, ເອກອັກຄະລາຊະທູດໄທປະຈຳ ສປປ ລາວ, ຫົວໜ້າກົມ, ຮອງກົມ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

  ໂຄງການກໍ່ສ້າງຂົວຂ້າມນໍ້າຂອງມິດຕະພາບລາວ-ໄທ ແຫ່ງທີ V (ແຂວງ ບໍລິຄໍາໄຊ-ບຶງການ) ແມ່ນແຜນຍຸດທະສາດລະດັບຊາດ ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII (2016-2020) ຂອງ ສປປ ລາວ ພາຍໃຕ້ເປົ້າໝາຍເປີດກວ້າງການຮ່ວມ ມື ແລະເຊື່ອມຈອດກັັບພາກພື້ນ ແລະສາກົນ, ເນື່ອງຈາກຂົວຂ້າມນໍ້າຂອງມິດຕະພາບລາວ-ໄທແມ່ນຕັ້ງຢູ່ຈຸດທີ່ຕັ້ງຍຸດທະສາດທີ່ເຊື່ອມຈອດຕາມແລວທາງເສດຖະກິດຕາເວັນອອກ-ຕາເວັນຕົກທີ່ຜ່ານ ສປປ ລາວ ຕາມແລວປາກເຊ, ຜ່ານທາງຫຼວງແຫ່ງຊາດເລກທີ 8, ເຂົ້າສູ່ຫວຽດນາມໂດຍຜ່ານດ່ານນໍ້າພາວ-ເກົາແຈວ.

 ປັດຈຸບັນໂຄງການສ້າງຂົວຂ້າມນໍ້າຂອງມິດຕະພາບລາວ-ໄທ ແຫ່ງທີ V ໄດ້ມີການລົງນາມຮ່ວມມືກໍ່ສ້າງເປັນທີ່ຮຽບຮ້ອຍແລ້ວເມື່ອເດືອນມິຖຸນາ 2019 ຜ່ານມາ, ຊຶ່ງແຂວງບໍລິຄຳໄຊກຳລັງເລັ່ງຊຸກຍູ້ສົ່ງເສີມບັນດາໂຄງການລົງທຶນ ແລະນັກລົງທຶນທັງພາຍໃນ ແລະຕ່າງປະເທດສ້າງສິ່ງອຳນວຍຄວາມສະດວກຕ່າງໆ ລວມເຖິງການບໍລິ ການທີ່ຈະນຳມາຊຶ່ງຜົນປະໂຫຍດແກ່ປະເທດເຮົາກໍ່ຄື ແຂວງບໍລິຄຳໄຊເອງ.

  ໂຄງການກໍ່ສ້າງຂົວຂ້າມນໍ້າຂອງມິດຕະພາບລາວ-ໄທແຫ່ງທີ Vຈະສ້າງເຊື່ອມຕໍ່ກັນລະຫວ່າງເຂດບ້ານກ້ວຍອຸດົມຫາບ້ານຫາງຊີງສະຫວ່າງເມືອງປາກຊັນ ແຂວງບໍລິຄຳໄຊ ແລະເຂດບ້ານຫ້ວຍເຊືອມອຳເພີບຶງການປະເທດໄທມີຄວາມຍາວ1.300 ກວ່າແມັດ,ມີມູນຄ່າໃນການກໍ່ສ້າງທັງໝົດ 3.900 ລ້ານບາດ (ສະກຸນເງິນໄທ) ຄາດໃຊ້ເວລາການກໍ່ສ້າງ 3 ປີໃຫ້ສຳເລັດ.

______________

ຂຽນໂດຍ: ກະຊວງການເງິນ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์