ສຳເລັດກອງປະຊຸມສະພາບໍລິຫານ ທຫລ ປີ 2019

  ກອງປະຊຸມສະພາບໍລິຫານທະນາຄານແຫ່ງ ສປປ ລາວ ໄດ້ຈັດຂຶ້ນໃນວັນທີ 20 ມັງກອນ 2020 ທີ່ຫ້ອງປະຊຸມທະນາຄານແຫ່ງ ສປປ ລາວ ໂດຍໃຫ້ກຽດເປັນປະ ທານຂອງທ່ານ ສົມດີ ດວງດີ ຮອງນາຍົກລັດຖະມົນຕີ,ລັດຖະມົນຕີກະຊວງການເງິນ, ປະທານສະພາບໍລິຫານທະນາຄານແຫ່ງ ສປປ ລາວ; ພ້ອມນີ້, ກໍມີທ່ານ ສອນໄຊ ສິດພະໄຊ ຜູ້ວ່າການທະນາຄານແຫ່ງ ສປປ ລາວ, ຮອງປະທານສະພາບໍລິຫານ-ບັນດາຄະນະກໍາມະການສະພາບໍລິຫານ ແລະ ບັນດາຫົວໜ້າກົມທີ່ກ່ຽວຂ້ອງເຂົ້າ ຮ່ວມ.

  ກອງປະຊຸມຄັ້ງນີ້; ທ່ານ ເພັດສະຖາພອນ ແກ້ວວົງວິຈິດ ຫົວໜ້າຫ້ອງການທະນາຄານແຫ່ງ ສປປ ລາວ ໄດ້ລາຍງານການເຄື່ອນໄຫວວຽກງານປີ 2019 ແລະ ທິດ ທາງປີ 2020 ທຫລ ໃນປີ 2019 ແລະທິດທາງແຜນການປີ 2020 ຊຶ່ງປະກອບມີການຈັດຕັ້ງປະຕິບັດແຜນເງິນຕາ; ການຈັດຕັ້ງປະຕິບັດແຜນງົບປະມານການ ປະຕິບັດລາຍຮັບ-ລາຍຈ່າຍ, ການກໍ່ສ້າງພື້ນຖານໂຄງລ່າງ ແລະປະກອບວັດຖຸ-ເຕັກນິກ ແລະທ່ານ ພານຸສັກ ແກ່ນວົງພະຈັນ ຫົວໜ້າກົມຈັດຕັ້ງ ແລະ ພະນັກງານກໍ່ໄດ້ນຳສະເໜີລະບຽບການພາຍໃນການປະຕິບັດນະໂຍບາຍຂອງທະນາຄານແຫ່ງ ສປປ ລາວ ຈາກນັ້ນ, ຜູ້ແທນເຂົ້າຮ່ວມໃນກອງປະຊຸມກໍ່ໄດ້ມີປະກອບຄໍາຄິດ-ຄໍາເຫັນໃສ່ບັນດາເອກະສານດັ່ງກ່າວຢ່າງກົງໄປກົງມາ ແລະພິຈາລະນາຮັບຮອງເອົາເອກະສານສຳຄັນດັ່ງກ່າວ.

  ໃນໂອກາດນີ້; ທ່ານ ສົມດີ ດວງດີ ຮອງນາຍົກລັດຖະມົນຕີ, ປະທານສະພາບໍລິຫານທະນາຄານແຫ່ງ ສປປ ລາວ ກໍ່ໄດ້ຕີລາຄາສູງຕໍ່ຜົນງານ ແລະ ການເຄື່ອນໄຫວຂອງວຽກງານທະນາຄານແຫ່ງ ສປປ ລາວ ທີ່ຍາດມາໄດ້ໃນ 1 ປີ ຜ່ານມາແລະໃຫ້ສືບຕໍ່ເສີມຂະຫຍາຍຜົນງານດັ່ງກ່າວໃຫ້ດີຂຶ້ນກ່ວາເກົ່າ ແລະ ພ້ອມນີ້ທ່ານຍັງຮຽກ ຮ້ອງໃຫ້ມີການປັບປຸງແກ້ໄຂບາງບັນຫາທີ່ຕິດພັນກັບການປະຕິບັດມາດຕະການ ແລະ ນະໂຍບາຍໃນການຮັກສາສະຖຽນລະພາບເງິນຕາແຫ່ງຊາດແນໃສ່ຮັບປະກັນໃຫ້ການຈັດຕັ້ງປະຕິບັດແຜນເງິນຕາກໍ່ຄືວຽກງານຂະແໜງການທະນາຄານມີບາດກ້າວຫັນປ່ຽນໃໝ່ທີ່ຕັ້ງໜ້າ, ພ້ອມນີ້ກໍ່ໃຫ້ພິຈາລະນາແຜນງົບປະມານ ທຫລ ໃຫ້ຮັບ ປະກັນການເຄື່ອນໄຫວເພື່ອຮັບໃຊ້ໜ້າທີ່ການເມືຶອງໃຫ້ດີ ແລະ ໃຫ້ຮັບປະກັນການຈັດຕັ້ງປະຕິບັດການຮັກສາສະຖຽນລະພາບໃຫ້ໝັ້ນທ່ຽງ.  

___________

ຂຽນໂດຍ: ຣັດສະໝີ ດວງສັດຈະ  
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์