ໂຮມຊຸມນຸມສະຫຼອງວັນສ້າງຕັ້ງກອງທັບ ປະຊາຊົນລາວ ຄົບຮອບ 71 ປີ

   ວັນທີ 20 ມັງກອນ 2020 ທີ່ກະຊວງປ້ອງກັນປະເທດໄດ້ຈັດພິທີໂຮມຊຸມນຸມສະເຫຼີມສະຫຼອງລະນຶກວັນສ້າງຕັ້ງກອງທັບປະຊາຊົນລາວຄົບຮອບ 71 ປີ (20/1/ 1949-20/1/2020) ໂດຍການເຂົ້າຮ່ວມຂອງທ່ານ ພົນເອກ ຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດ, ມີຮອງລັດຖະມົນຕີ, ຫົວໜ້າກົມ, ຮອງກົມ, ຫ້ອງການ, ກົມກອງ, ພະນັກງານປະຕິວັດອາວຸໂສບໍານານຕະຫຼອດພະນັກງານ-ນັກຮົບເຂົ້າຮ່ວມ.

 ທ່ານ ພົນເອກ ຈັນສະໝອນ ຈັນຍາລາດ ກ່າວວ່າ: ຕະຫຼອດໄລຍະ 71 ປີຜ່ານມາ, ພັກເຮົາໄດ້ເອົາໃຈໃສ່ນໍາພາ ແລະສຶກສາອົບຮົມກໍ່ສ້າງກອງທັບເຮົາ,ວາງແນວທາງຍຸດທະສາດ, ຍຸດໂທບາຍຢ່າງປະດິດສ້າງທີ່ສອດຄ່ອງກັບສະພາບການໃນແຕ່ລະໄລຍະແທດເໝາະກັບເງື່ອນໄຂຈຸດພິເສດຂອງກອງທັບເຮົາ,ຕາມແນວທາງການທະຫານ ຂອງພັກ,ອັນສໍາຄັນແມ່ນໄດ້ວາງຍຸດທະສາດການຕໍ່ສູ້ຢ່າງຖືກຕ້ອງ ແລະຍຸດໂທບາຍທີ່ຄ່ອງແຄ່ວ, ມີໄຫວພິກ, ນໍາໃຊ້ ແລະ ສົມທົບບັນດາຮູບການຕໍ່ສູ້ຢ່າງຊໍານິຊໍານານ, ພວກເຮົາເອກອ້າງທະນົງໃຈທີ່ເຫັນວ່າພາຍໃຕ້ການນໍາພາຂອງພັກ, ພະນັກງານ-ນັກຮົບໃນກອງທັບປະຊາຊົນລາວໄດ້ເສີມຂະຫຍາຍມູນເຊື້ອຕໍ່ສູ້ເດັດດ່ຽວ, ພິລາດອາດ ຫານບໍ່ຍອມຈໍານົນເຖິງຈະເສຍສະຫຼະກໍບໍ່ຫວາດຫວັ່ນ, ຍາມໃດກໍຕອບສະໜອງຕາມຄວາມຮຽກຮ້ອງ ຂອງພັກດ້ວຍຄວາມຈົງຮັກພັກດີ, ຊື່ສັດບໍລິສຸດ ແລະ ເດັດດ່ຽວໜຽວແໜ້ນ,ຍາມໃດກໍອີງໃສ່ປະຊາຊົນ, ເຮັດທຸກສິ່ງທຸກຢ່າງເພື່ອຜົນປະໂຫຍດຂອງປະຊາຊົນດ້ວຍຄວາມບໍລິສຸດໃຈ, ຍ້ອນແນວນັ້ນຈຶ່ງໄດ້ຮັບຄວາມເອົາໃຈໃສ່ເບິ່ງແຍງ, ຖະໜອມຫອມຮັກ ແລະ ອູ້ມຊູຊ່ວຍເຫຼືອຈາກປະຊາຊົນບັນດາເຜົ່າອັນໄດ້ເປັນບໍ່ເກີດຂອງກໍາລັງແຮງທີ່ບໍ່ເຫືອດແຫ້ງຈັກເທື່ອ “ກອງທັບປະຊາຊົນລາວສົມແລ້ວທີ່ເປັນກອງທັບວິລະຊົນຂອງຊາດລາວ” ກາຍເປັນກອງທັບປະຕິວັດ,ມີແບບແຜນ ແລະທັນສະໄໝ,ປະກອບສ່ວນຢ່າງຕັ້ງໜ້າເຂົ້າໃນພາລະກິດປົກປັກຮັກສາ ແລະ ສ້າງສາພັດ ທະນາປະເທດຊາດກ້າວຂຶ້ນຕາມເສັ້ນທາງສູ່ຈຸດໝາຍສັງຄົມນິຍົມຢ່າງໜັກແໜ້ນ.

  ກ່ອນໜ້ານີ້ 71 ປີ ຄືວັນທີ 20 ມັງກອນ 1949 ກອງທັບລາວອິດສະຫຼະຊຶ່ງແມ່ນຕົ້ນກໍາເນີດຂອງກອງທັບປົດປ່ອຍໃນເມື່ອກ່ອນ ຫຼືກອງທັບປະຊາຊົນລາວໃນປະຈຸ ບັນໄດ້ຮັບການສ້າງຕັ້ງຂຶ້ນຢູ່ເຂດທີ່ໝັ້ນຕາແສງລາວຮຸ່ງ-ພຽງສາ, ເມືອງຊຽງຄໍ້ ແຂວງຫົວພັນ ໂດຍແມ່ນປະທານ ໄກສອນ ພົມວິຫານ ເປັນຜູ້ປະກາດສ້າງ ຕັ້ງ ແລະບັນຊາໂດຍກົງນັ້ນເປັນເຫດການສໍາຄັນອັນໜຶ່ງ, ເປັນບາດລ້ຽວທີ່ເປັນລັກສະນະຕັດສິນໃນພາລະກິດຕໍ່ສູ້ປົດປ່ອຍຊາດພາຍໃຕ້ການນໍາພາຂອງພັກເຮົາ, ພາຍຫຼັງໄດ້ຮັບການສ້າງຕັ້ງຂຶ້ນກອງທັບເຮົາກໍໄດ້ຜະເຊີນໜ້າກັບສັດຕູໂຕຮ້າຍກາດທີ່ມີກໍາລັງແຮງເໜືອກວ່ານັບທັງດ້ານກຳລັງພົນອາວຸດຍຸດໂທປະກອນທີ່ທັນສະໄໝກວ່າແຕ່ດ້ວຍນໍ້າ ໃຈຮັກຊາດອັນສູງສົ່ງ ແລະການສືບທອດມູນເຊື້ອພິລາດອາດຫານບໍ່ຍອມຈໍານົນຂອງບັນພະບູລຸດ ແລະຊົນເຊື້ອຊາດລາວກອງທັບເຮົາໄດ້ດໍາເນີນການຕໍ່ສູ້ຢ່າງພິລາດອາດ ຫານ ແລະຍາດໄດ້ໄຊຊະນະເປັນກ້າວໆມາ, ຜ່ານການຝຶກຝົນຫຼໍ່ຫຼອມ ແລະ ທົດສອບໃນແປວໄຟສົງຄາມຕໍ່ສູ້ເພື່ອຍາດເອົາເອກະລາດແຫ່ງຊາດ, ໃນສະພາບແວດລ້ອມ ແລະເງື່ອນໄຂຫຍຸ້ງຍາກລໍາບາກທີ່ສຸດນັ້ນກອງທັບເຮົາໄດ້ສ້າງວີລະກຳອັນລໍ້າເລີດຫຼາຍປະການ, ສ້າງປະຫວັດສາດຍຸກໃໝ່ ແລະ ມູນເຊື້ອວິລະຊົນຂອງຊາດລາວຢ່າງສະ ຫງ່າງາມ.

______________

ຂຽນໂດຍ: ວົງມະນີ        
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์