ນາຍົກ ອອກດຳລັດສ້າງຕັ້ງອຸທິຍານແຫ່ງຊາດຫີນໜາມໜໍ່

  ທ່ານ ທອງລຸນ ສີສຸລິດ ນາຍົກລັດຖະມົນຕີອອກດໍາລັດວ່າດ້ວຍການສ້າງຕັ້ງອຸທິຍານແຫ່ງຊາດຫີນໜາມໜໍ່ ເມືອງບົວລະພາ ແຂວງຄໍາມ່ວນ ຊຶ່ງມີເນື້ອທີ່ 94.121 ເຮັກຕາ, ທັງນີ້ກໍເພື່ອແນໃສ່ຄຸ້ມຄອງ, ປົກປັກຮັກສາ ແລະພັດທະນາເຂດດັ່ງກ່າວຕາມທິດສີຂຽວ ແລະຍືນຍົງ.

 ດໍາລັດດັ່ງກ່າວແມ່ນສະບັບເລກທີ 70/ນຍ, ລົງວັນທີ 15 ມັງກອນ 2020 ໂດຍມີຈຸດປະສົງແນໃສ່ຄຸ້ມຄອງປົກປັກຮັກສາລັກສະນະທີ່ໂດດເດັ່ນທາງກາຍະພາບ,ຊີວະພາບ ແລະ ຖິ່ນທີ່ຢູ່ອາໃສຂອງພັນພືດ ແລະພັນສັດອະນຸລັກຮັກາໄວ້ຄວາມສວຍສົດງົດງາມຂອງທິວທັດທໍາມະຊາດ, ຮ່ອງຮອຍປະຫວັດສາດ, ວັດທະນະທໍາ, ທ່ອງທ່ຽວ ແລະສຶກສາຄົ້ນຄວ້າທາງດ້ານວິທະຍາສາດປະກອບສ່ວນເຂົ້າໃນການປັບປຸງຊີວິດການເປັນຢູ່ຂອງປະຊາຊົນ ແລະພັດທະນາເສດຖະກິດ-ສັງຄົມຕາມທິດສີຂຽວ ແລະ ຍືນຍົງ.

 ອຸທິຍານແຫ່ງຊາດຫີນໜາມໜໍ່ຕັ້ງຢູ່ເມືອງບົວລະພາ ແຂວງຄໍາມ່ວນ ມີເນື້ອທີ່ 94.121 ເຮັກຕາ, ຊຶ່ງຂອບເຂດອຸທິຍານດັ່ງກ່າວແມ່ນອີງໃສ່ແຜນທີ່ພູມີປະເທດມາດ ຕາສ່ວນ 1:100 000 ໂດຍຖືເອົາເສັ້ນແວງ ແລະເສັ້ນຂະໜານເປັນຫຼັກສົມທຽບໃສ່ພື້ນທີ່ຕົວຈິງເຊັ່ນ: ສັນພູ (ສັນປັນນໍ້າ), ຕີນພູ, ສາຍຫ້ວຍ, ແມ່ນໍ້າ, ເສັ້ນທາງເປັນຂີດໝາຍເພື່ອໃຫ້ອົງການປົກຄອງທ້ອງຖິ່ນຕະຫຼອດຮອດປະຊາຊົນບັນດາເຜົ່າໄດ້ຮັບຮູ້ ແລະໃຫ້ຄວາມຮ່ວມມືໃນການຄຸ້ມຄອງປົກປັກຮັກສາ ແລະພັດທະນາ.

 ສໍາລັບແຫຼ່ງທຶນທີ່ນໍາໃຊ້ເຂົ້າໃນການຄຸ້ມຄອງປົກປັກຮັກສາ ແລະພັດທະນາເຂດດັ່ງກ່າວປະກອບມີ: ງົບປະມານຂອງລັດ,ກອງທຶນພັດທະນາປ່າໄມ້ ແລະຊັບພະຍາກອນປ່າໄມ້, ກອງທຶນປົກປັກຮັກສາສິ່ງແວດລ້ອມ, ການປະກອບທຶນຂອງກິດຈະການ ຫຼື ໂຄງການທີ່ດໍາເນີນຢູ່ເຂດອຸທິຍານແຫ່ງຊາດ ຫຼືພື້ນທີ່ໃກ້ຄຽງທີ່ສົ່ງຜົນກະທົບຕໍ່ອຸທິຍານແຫ່ງຊາດ, ກອງທຶນທ່ອງທ່ຽວແຫ່ງຊາດ, ການປະກອບສ່ວນຂອງບຸກຄົນ ນິຕິບຸກຄົນ ແລະອົງການຈັດຕັ້ງຂອງລັດເອກະຊົນທັງພາຍໃນ ແລະ ຕ່າງປະເທດ ແລະແຫຼ່ງທຶນອື່ນໆອີກທີ່ຖືກຕ້ອງຕາມກົດໝາຍ,ຊຶ່ງການຈັດຕັ້ງປະຕິບັດແມ່ນກະຊວງກະສິກໍາ ແລະປ່າໄມ້ ແລະອົງການປົກຄອງທ້ອງຖິ່ນ,ດັ່ງນັ້ນບັນດາກະຊວງ, ອົງການ ແລະພາກສ່ວນຕ່າງໆທີ່ກ່ຽວຂ້ອງຈົ່ງຮັບຮູ້ໃຫ້ຄວາມຮ່ວມມື ແລະພ້ອມກັນຈັດຕັ້ງປະຕິບັດໃຫ້ໄດ້ຮັບຜົນເປັນຢ່າງດີ.

_____________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์