ຊາວນາ ບ້ານໄຊສີ ສໍາເລັດປັກດໍາເຂົ້ານາແຊງ

  ການປັກດໍາເຂົ້ານາແຊງຂອງປະຊາຊົນບ້ານໄຊສີ ເມືອງໄຊເສດຖາ ແຂວງອັດຕະປື ມາຮອດປະຈຸບັນແມ່ນສໍາເລັດແລ້ວ 100% ໃນເນື້ອທີ່ການຜະລິດ 62 ກວ່າເຮັກ ຕາ, ສ່ວນການປູກພືດລະດູແລ້ງອື່ນໆກໍໄດ້ຮັບການຈັດຕັ້ງປະຕິບັດຢ່າງມີຜົນສໍາເລັດໄດ້ຕາມແຜນການທີ່ວາງໄວ້. 

   ທ່ານ ສຸພີ ໄຊຍະແສງ ຮອງນາຍບ້ານໄຊສີ ທັງເປັນຫົວໜ້າກຸ່ມຜະລິດຂອງບ້ານໃຫ້ຮູ້ວ່າ: ການປູກພືດລະດູແລ້ງຂອງພໍ່ແມ່ປະຊາຊົນບ້ານໄຊສີ ແມ່ນດໍາເນີນມາແຕ່ເດືອນພະຈິກ 2019 ເປັນຂະບວນກວ້າງຂວາງ ແລະ ຟົດຟື້ນໂດຍສະເພາະການຜະລິດເຂົ້ານາແຊງຊຶ່ງມີເນື້ອທີ່ທັງໝົດ 62 ກວ່າເຮັກຕາ, ໃນນັ້ນເນື້ອທີ່ນາຢອດມີ 48 ກວ່າເຮັກຕາ, ເນື້ອທີ່ນາດຳ 13 ກວ່າເຮັກຕາ, ແນວພັນທີ່ໃຊ້ແມ່ນພັນເຂົ້າປັບປຸງຄາດວ່າສະມັດຖະພາບຜົນຜະລິດຈະບັນລຸ 3-4 ໂຕນຕໍ່ເຮັກຕາ,ມາຮອດປະຈຸບັນ ແມ່ນສໍາເລັດການປັກດໍາໄປແລ້ວ 100%.

 ສ່ວນພືດລະດູແລ້ງອື່ນໆກໍມີຄວາມຄືບໜ້າ ແລະສຳເລັດຕາມລຳດັບໃນນັ້ນມີໝາກແຕງ, ໝາກໂມ, ໝາກຖົ່ວຝັກຍາວ, ຜັກກາດ,ຜັກສະຫຼັດ, ຜັກຫອມປະເພດອື່ນໆ ຊຶ່ງໄດ້ປູກໃນເຂດໂຄງການຊົນລະປະທານມີ 47 ຄອບຄົວ ມີເນື້ອທີ່ 3 ເຮັກຕາກວ່າ, ປູກພືດນອກໂຄງການຊົນລະປະທານມີ 180 ຄອບຄົວ,ມີເນື້ອທີ່ 4 ເຮັກຕາກວ່າ, ປະຈຸບັນບາງຄອບຄົວກໍໄດ້ຂຸ້ນຂ້ຽວປູກ ແລະເກັບກ່ຽວຜົນຜະລິດສົ່ງຂາຍເປັນປະຈໍາວັນໃນທ້ອງຕະຫຼາດພາຍໃນແຂວງ ແລະ ເມືອງ. ທັງນີ້ກໍຍ້ອນຄວາມເອົາໃຈໃສ່ຂອງອຳນາດການປົກຄອງເມືອງ ແລະບ້ານໃນການຊຸກຍູ້ສົ່ງເສີມໃຫ້ປະຊາຊົນເຮັດການຜະລິດເພື່ອສ້າງລາຍຮັບເຂົ້າຄອບຄົວ.

--------------

ຂຽນໂດຍ: ກິ່ງລັດຕະນະ 
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์