ຫກປຊ ຈະສ້າງລາຍຮັບໃຫ້ໄດ້ 1,8 ພັນຕື້ກີບປີແລ້ວປະຕິບັດໄດ້ 91%

 ຫ້ອງການກອງທຶນປະກັນສັງຄົມແຫ່ງຊາດ (ຫກປຊ) ຄາດຄະເນຈະສ້າງລາຍຮັບໃນປີ 2020 ນີ້ ໃຫ້ໄດ້ທັງໝົດ 1,8 ພັນຕື້ກີບ ແລະລາຍຈ່າຍບໍ່ໃຫ້ເກີນ 1,6 ພັນຕື້ກີບ, ຂະນະທີ່ການຈັດຕັ້ງປະຕິບັດຕົວເລກລາຍຮັບໃນປີຜ່ານມາໄດ້ພຽງ 91% ຂອງແຜນການປີ.

 ອີງຕາມຂໍ້ມູນຈາກບົດສະຫຼຸບ ການຈັດຕັ້ງປະຕິບັດວຽກງານໃນປີ 2019 ຂອງຫ້ອງການກອງທຶນ ປະກັນສັງຄົມແຫ່ງຊາດໃຫ້ຮູ້ວ່າ: ກອງທຶນປະກັນສັງຄົມແຫ່ງຊາດ (ກປຊ) ແມ່ນກອງທຶນສະສົມເງິນ ສົມທົບຂອງລັດຖະບານ, ຜູ້ໃຊ້ ແຮງງານ, ຜູ້ອອກແຮງງານ, ຜູ້ປະ ກອບອາຊີບສ່ວນບຸກຄົນ ແລະຜູ້ ສະໝັກໃຈ, ເພື່ອນຳໃຊ້ເຂົ້າໃນການ ອຸດໜູນປະກັນສັງຄົມຕາມທີ່ໄດ້ກຳນົດ, ສ່ວນຫ້ອງການກອງທຶນປະ ກັນສັງຄົມແຫ່ງຊາດ (ຫກປຊ) ແມ່ນເຮັດໃຫ້ກອງທຶນດັ່ງກ່າວເຕີບ ໃຫຍ່ຂະຫຍາຍຕົວ, ມີຄວາມເຂັ້ມ ແຂງທາງດ້ານແຫຼ່ງເງິນ ແລະເປັນການສົ່ງເສີມການລົງທຶນທີ່ຈະເຮັດໃຫ້ສະຖານະພາບທາງດ້ານການເງິນມີຄວາມໝັ້ນຄົງ ແລະຍືນຍົງຍິ່ງຂຶ້ນເພື່ອສາມາດຮັບປະກັນການ ສະໜອງເງິນອຸດໜູນປະກັນສັງຄົມ ໃນກໍລະນີຜູ້ປະກັນຕົນ ຫຼື ສະມາ ຊິກຄອບຄົວເກີດເຫດການໃດໜຶ່ງ ທີ່ພາໃຫ້ມີຄວາມສ່ຽງຕໍ່ການມີລາຍຈ່າຍເພີ່ມ ແລະໃນເວລາຂາດ ລາຍຮັບເຊັ່ນ: ອຸດໜູນອຸບັດເຫດ ແຮງງານພະຍາດອາຊີບ ຫຼື ອຸບັດ ເຫດອື່ນທີ່ມີການເສຍອົງຄະ, ອຸດ ໜູນປິ່ນປົວສຸຂະພາບ, ອຸດໜູນອອກລູກ ຫຼື ຫຼຸລູກ, ອຸດໜູນປ່ວຍການ, ອຸດໜູນເສຍອົງຄະ, ອຸດໜູນບໍາ ນານ, ອຸດໜູນເສຍຊີວິດ, ອຸດໜູນສະມາຊິກຄອບຄົວຂອງຜູ້ເສຍຊີວິດ ແລະອຸດໜູນວ່າງງານ.

   ສໍາລັບການຈັດຕັ້ງປະຕິບັດຕົວເລກລາຍຮັບຂອງ ຫກປຊ ໃນປີ 2019 ແມ່ນປະຕິບັດໄດ້ທັງໝົດ 1.666 ຕື້ກີບ ເທົ່າກັບ 91% ຂອງແຜນການປີໃນນີ້ພາກລັດ 1.250 ຕື້ກີບ ເທົ່າກັບ 87%, ພາກວິສາຫະກິດ ແລະສະໝັກໃຈ 415,91 ຕື້ກີບ ເທົ່າກັບ 105%; ສ່ວນດ້ານລາຍຈ່າຍແມ່ນຢູ່ໃນລະດັບ 1.453 ຕື້ກີບ ເທົ່າ ກັບ 90% ຂອງແຜນການປີໃນນີ້ພາກລັດ 1.295 ຕື້ກີບ ເທົ່າກັບ 91%, ພາກວິສາຫະກິດ ແລະຜູ້ສະໝັກໃຈ 157,41 ຕື້ກີບ ເທົ່າກັບ 89%; ມີຍອດເຫຼືອລາຍຮັບ-ລາຍຈ່າຍໃນ ປີທັງໝົດ 213,13 ຕື້ກີບ ໃນນີ້ ພາກລັດຂາດດຸນ 45,36 ຕື້ກີບ, ພາກວິສາຫະກິດ ແລະສະໝັກໃຈມີສ່ວນເກີນ 258,49 ຕື້ກີບ; ປະຈຸບັນ ຫກປຊ ມີຍອດເງິນສະສົມລົງທຶນທັງໝົດ 1.590 ຕື້ກີບ ຊຶ່ງໄດ້ຝາກປະຈໍາຢູ່ບັນດາທະນາຄານທຸລະກິດ 1.488 ຕື້ກີບ ແລະຊື້ພັນທະບັດຄັງເງິນ 102 ຕື້ກີບ ແລະ ມີຜົນຮັບຈາກການລົງທຶນໃນປີທັງໝົດ 91,91 ຕື້ກີບ, ຊຶ່ງໃນ ປີຜ່ານມາ ຫກປຊ ໄດ້ພິຈາລະນາ ແລະ ຄິດໄລ່ເງິນອຸດໜູນປະເພດຕ່າງໆ ທັງໝົດ 89.909 ກໍລະນີ ເທົ່າກັບ 70% ຂອງແຜນການໃນນີ້ພາກລັດມີ 68.086 ກໍລະນີ ເທົ່າກັບ 77% ແລະພາກວິສາຫະກິດ 21.823 ກໍລະນີ ເທົ່າກັບ 55%.

  ສ່ວນທິດທາງແຜນການປີ 2020 ນີ້ຫ້ອງການກອງທຶນປະກັນສັງຄົມແຫ່ງຊາດຈະສູ້ຊົນສ້າງລາຍຮັບໃຫ້ໄດ້ທັງໝົດ 1.851 ຕື້ ກີບ ໃນນີ້ພາກລັດ 1.399 ຕື້ກີບ, ພາກວິສາຫະກິດ ແລະສະໝັກໃຈ 452,11 ຕື້ກີບ ແລະຄາດຄະເນລາຍຈ່າຍອຸດໜູນປະກັນສັງຄົມ ແລະບໍລິຫານຕ່າງໆບໍ່ໃຫ້ເກີນ 1.614 ຕື້ກີບ ຊຶ່ງພາກລັດມີລາຍ ຈ່າຍປະມານ 1.385 ຕື້ກີບ, ພາກວິສາຫະກິດ ແລະສະໝັກໃຈ 177,55 ຕື້ກີບ, ຄາດຄະເນພິຈາລະນາ ແລະຈ່າຍເງິນອຸດໜູນປະກັນສັງຄົມປະເພດຕ່າງໆທັງໝົດ 142.891 ຄົນ, ໃນນີ້ພາກລັດ 94.916 ຄົນ, ພາກວິສາຫະກິດ ແລະສະໝັກໃຈ 47.975 ຄົນ.

-----------------

ຂຽນໂດຍ: ກິ່ງລັດຕະນະ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์