ບຸນກອງເຂົ້າໃຫຍ່ເມືອງສັງທອງ ມີຫຼາຍກິດຈະກໍາໃຫ້ທ່ຽວຊົມ

 ເມືອງສັງທອງ ນະຄອນ ຫຼວງວຽງຈັນ (ນວ) ຈັດງານບຸນ ກອງເຂົ້າໃຫ່ຍ ແລະງານຕະຫຼາດນັດຂາຍສິນຄ້າ ປະຈໍາປີ 2020 ຂຶ້ນໃນວັນທີ 16 ມັງກອນ ໂດຍມີ ຂະບວນຄາຣາລົດທ່ອງທ່ຽວຈາກ ນວ ແລະຂະແໜງການກ່ຽວຂ້ອງ ເກືອບ 100 ຄັນ, ຊຶ່ງນໍາພາໂດຍ ທ່ານ ສີຫຸນ ສິດທິລືໄຊ ຮອງເຈົ້າ ຄອງນະຄອນຫຼວງວຽງຈັນ, ທ່ານ ນາງ ຈັນເພັດ ຄໍາຟອງ ຫົວໜ້າກົມວັດທະນະທໍາມະຫາຊົນກະຊວງຖະແຫຼງຂ່າວວັດທະນະທໍາ ແລະທ່ອງທ່ຽວ.

  ທ່ານ ດາວເພັດ ອາລຸນ ເຈົ້າ ເມືອງສັງທອງ ກ່າວເປີດງານວ່າ:ໄລຍະຜ່ານມາການຈັດງານບຸນກອງເຂົ້າແມ່ນໄດ້ຈັດຢູ່ບ້ານໃຫຍ່ນາຈະເລີນແຕ່ເນື່ອງດ້ວຍສະຖານ ທີ່ຄັບແຄບສະນັ້ນອົງການປົກຄອງ ເມືອງຈຶ່ງໄດ້ຕົກລົງເປັນເອກະພາບຖືເອົາບ້ານເພຍລາດ ຊຶ່ງເປັນບ້ານ ເທສະບານເມືອງຈັດງານໃນຄັ້ງນີ້, ບຸນກອງເຂົ້າແມ່ນຮີດຄອງປະເພນີອັນດີງາມຂອງຊາດຂອງເຜົ່າຊຶ່ງ ແມ່ນມູນມໍລະດົກອັນລໍ້າຄ່າຂອງບັນພະບູລຸດຂອງຊາດລາວໄດ້ປະຕິບັດສືບທອດກັນມາຫຼາຍຍຸກສະໄໝ ຫຼາຍເຊັ່ນຄົນພໍຮອດເດືອນຍີ່ປະຊາຊົນຊາວພຸດໄດ້ສໍາເລັດໃນການເກັບກູ້ຜົນຜະລິດໃນລະດູຝົນ,ຈາກນັ້ນ ຈຶ່ງໄດ້ພ້ອມພຽງຮຽງໜ້າເຮັດບຸນ ກອງເຂົ້າເພື່ອເປັນການລ້ຽງເຈົ້າຖິ່ນເຈົ້າຖານຜູ້ປົກປັກຮັກສາໄຮ່ນາ ຮົ້ວສວນຕາມຄວາມເຊື່ອຖື, ຈຸດປະສົງລວມກໍເພື່ອຍົກລະດັບຊີວິດ ການເປັນຢູ່ຂອງປະຊາຊົນໃຫ້ດີຂຶ້ນ, ຊຶ່ງໃນປີຜ່ານມາການຜະລິດ ເຂົ້ານາແຊງ ແລະນາປີໄດ້ທັງໝົດ 198.574 ໂຕນ, ໄດ້ຊຸກຍູ້ສົ່ງເສີມ ປະຊາຊົນປູກເຂົ້າອິນຊີ ຫຼື ເຂົ້າ ຫອມສັງທອງໃນຈໍານວນ 10 ກຸ່ມ ມີທັງໝົດ 282 ຄອບຄົວທີ່ຜະລິດ ເປັນສິນຄ້າ.

 ອີກດ້ານໜຶ່ງກໍເພື່ອເປັນການສືບສານຕໍານານຮີດຄອງປະເພນີ ອະນຸຮັກສາວັດທະນະທໍາອັນເກົ່າແກ່ເປັນການສຶກສາອົບຮົບປູກຈິດ ສໍານຶກໃນຖັນແຖວຊາວໜຸ່ມເຍົາວະ ຊົນອະນຸຊົນໃຫ້ມີຄວາມສາມັກຄີ ມີນໍ້າໃຈຮັກເຊື້ອແພງຊາດຮັກບ້ານ ເກີດເມືອງນອນຮັບຮູ້ເຂົ້າໃຈກ່ຽວ ກັບແບບແຜນການດໍາລົງຊີວິດ ຂອງປະຊາຊົນບັນດາເຜົ່າໃນເມື່ອ ກ່ອນ ໂດຍມີການສົມທຽບກັບປະຈຸບັນຢ່າງສ້າງສັນຈາກບົດຮຽນ ແລະປະສົບການໃນປີຜ່ານມາປີນີ້ ໄດ້ຍົກລະດັບຈາກຂັ້ນບ້ານມາເປັນຄວາມຮັບຜິດຊອບຂັ້ນເມືອງຮ່ວມ ກັບບັນດາອົງການປົກຄອງບ້ານ 35 ບ້ານ ແລະປະຊາຊົນບັນດາ ເຜົ່າຊາວເມືອງສັງທອງ ໄດ້ພ້ອມ ກັນສຸມໃສ່ສ້າງກອງເຂົ້າ 9 ກອງໃນນີ້ກອງໃຫຍ່ 1 ກອງ ຄວາມ ກວ້າງ 8 ແມັດ ສູງ 12 ແມັດ, ກອງນ້ອຍ 8 ກອງ ກວ້າງ 3 ແມັດ ສູງ 4,5 ແມັດ, ນອກນັ້ນຍັງມີວັດ ຖຸອຸປະກອນການຜະລິດຕ່າງໆ ຊຶ່ງ ເປັນເຄື່ອງມືການຜະລິດເປັນຫົວ ຄິດປະດິດສ້າງຂອງປະຊາຊົນລາວ ບັນດາເຜົ່າ.

  ພາຍໃນງານໄດ້ມີການສະແດງ ຜົນງານຂອງກົມກອງ ແລະຂາຍ ສິນຄ້າກະສິກໍາຫັດຖະກໍາມີການທ່ຽວຊົມກອງເຂົ້າໃຫຍ່ເຄື່ອງມືການຜະລິດວິຖີການດໍາລົງຊີວິດແບບ ດັ່ງເດີມເພື່ອມີການສົມທຽບໃນ ການຜະລິດປະຈຸບັນ ແລະມີການ ຄັດເລືອກອາຫານພື້ນບ້ານພ້ອມນັ້ນຍັງມີການຄັດເລືອກນາງສາວເຂົ້າຫອມ ແລະຕະຫຼອດໃນແຕ່ລະຄືນຈະໄດ້ທ່ຽວຊົມການສະແດງສິລະປະວັນນະຄະດີຈາກສູນກາງ 4 ລາຍການ,ນະຄອນຫຼວງ 4 ລາຍ ການ ແລເມືອງ22ລາຍການ, ພິເສດຍັງໄດ້ພົບກັບການສະແດງ ສົດດ້ານໜ້າເວທີຈາກໜ່ວຍສີລະປະໆເທດໃກ້ຄຽງ, ການວາງສະ ແດງ-ຂາຍສິນຄ້າເຄື່ອງອຸປະໂພກ-ບໍລິໂພກຕ່າງໆຕະຫຼອດ 8 ວັນ (16-23 ມັງກອນ2020)

แชร์