ເປີດນຳໃຊ້ຕຶກປິ່ນປົວຕາໂຮງໝໍແຂວງຄຳມ່ວນ

 ພິທີມອບ-ຮັບ ແລະເປີດການນຳໃຊ້ຕຶກປິ່ນປົວ ແລະຮັກສາສຸຂະພາບຕາໂຮງໝໍແຂວງຄຳມ່ວນລະຫວ່າງບໍລິສັດຜູ້ຮັບເໝົາກໍ່ສ້າງກັບພະແນກສາທາລະນະສຸກ ແຂວງໄດ້ຈັດຂຶ້ນໃນວັນທີ 15 ມັງກອນ 2020 ເປັນ ກຽດເຂົ້າຮ່ວມຂອງທ່ານ ພາສຸກ ຄຳມະນີທອງ ຮອງຫົວໜ້າພະແນກສາທາລະນະສຸກແຂວງຄຳມ່ວນ, ມີຫົວໜ້າບໍລິສັດຈະເລີນພັດທະນາອິນ ເວັດສເມັນຈຳກັດໃນນາມຜູ້ຮັບເໝົາກໍ່ສ້າງ, ມີຕາງໜ້າມູນນິທິເຟຣດໂຣ ໂລອົດສະຕາລີໃນນາມຜູ້ສະໜັບສະໜູນທຶນ, ມີພາກສ່ວນຕ່າງໆທີ່ກ່ຽວຂ້ອງຕະຫຼອດເຖິງພະນັກງານແພດ-ໝໍເຂົ້າຮ່ວມ.

  ທ່ານ ອຸດົມພົງ ແກ້ວສີສະໂນ ປະທານທີ່ປຶກສາ ແລະບໍລິຫານໂຄງ ການໃຫ້ຮູ້ວ່າ: ການກໍ່ສ້າງແມ່ນໄດ້ເລີ່ມລົງມືໃນເດືອນມີນາປີ 2018 ແລະໄດ້ສຳເລັດໃນເດືອນມິຖຸນາ ປີ 2019 ໂດຍແມ່ນບໍລິສັດຈະເລີນພັດ ທະນາ ອິນເວັດສເມັນ ຈຳກັດເປັນຜູ້ຮັບເໝົາເຊິ່ງເປັນອາຄານ 2 ຊັ້ນ, ປະ ເພດ ເບຕົງເສີມເຫຼັກ, ມີຂະໜາດ 10x13,50 ແມັດ, ມຸງດ້ວຍຊີແຟັກ, ປະກອບມີຫ້ອງກວດ, ຫ້ອງແພດຍາມ, ຫ້ອງຜ່າຕັດ, ຫ້ອງຕັດແວ່ນຕາ, ຫ້ອງນອນ VIP, ຫ້ອງປະຊຸມ ແລະຫ້ອງນໍ້າ, ລວມມູນຄ່າການກໍ່ສ້າງ ທັງໝົດ 800 ລ້ານກວ່າກີບ, ໃນນັ້ນທຶນຂອງພະແນກສາທາລະນະສຸກ ແຂວງຈຳນວນ 500 ລ້ານກວ່າກີບ ແລະທຶນສົມທົບຈາກມູນນິທິເຟຣດ ໂຣໂລປະເທດອົດສະຕາລີຈຳນວນ 250 ລ້ານກີບ.

  ທ່ານ ໂພນສະຫວັນ ໄຊຍະແສງ ຫົວໜ້າບໍລິສັດ ຈະເລີນພັດທະນາ ອິນເວັດສເມັນ ຈຳກັດ ກ່າວວ່າ: ນອກຈາກຕຶກປິ່ນປົວ ແລະຮັກສາສຸຂະພາບຕາທາງບໍລິສັດຍັງໄດ້ຮັບການອະນຸຍາດສຳປະທານ ແລະກໍ່ສ້າງຕຶກນອນພິເສດຂອງໂຮງໝໍແຂວງຄຳມ່ວນ ເປັນອາຄານ 3 ຊັ້ນ, ມີຂະໜາດ 44x15 ແມັດ, ມີ 44 ຫ້ອງນອນ ຊຶ່ງໄດ້ເລີ່ມລົງມືກໍ່ສ້າງໃນປີ 2018, ມາຮອດປະຈຸບັນການກໍ່ສ້າງປະຕິບັດໄດ້ແລ້ວປະມານ 80% ແລະຄາດວ່າຈະໃຫ້ສຳເລັດ ພ້ອມເປີດການນຳໃຊ້ໃນທ້າຍປີ 2020 ດ້ວຍ ມູນຄ່າການລົງທຶນທັງໝົດ 15 ຕື້ກີບ ຊຶ່ງເປັນການລົງທຶນຂອງບໍລິສັດ 100% ແລະມີໄລຍະການສຳປະທານ 50 ປີ.

------

ຂ່າວ: ກອງຄໍາ

แชร์