ຫສພ ເຜີຍແຜ່ມະຕິຄຳສັ່ງຂອງກົມການເມືອງສູນກາງພັກ

 ຫ້ອງວ່າການສູນກາງພັກ (ຫສພ) ໄດ້ຈັດກອງປະຊຸມເຜີຍແຜ່ ເຊື່ອມຊຶມມະຕິ, ຄຳສັ່ງຂອງກົມ ການເມືອງສູນກາງພັກ, ຂໍ້ກຳນົດ ຂອງຄະນະເລຂາທິການສູນກາງ ພັກ ແລະຄຳແນະນຳຂອງຄະນະຈັດຕັ້ງສູນກາງພັກໃຫ້ແກ່ພະນັກ ງານ-ລັດຖະກອນໃນທົ່ວ ຫສພ ເພື່ອຮັບຮູ້ ແລະເຂົ້າໃຈຕໍ່ເນື້ອໃນ ເລິກເຊິ່ງຂອງເອກະສານການ ເມືອງທີ່ສຳຄັນດັ່ງກ່າວ.

  ກອງປະຊຸມໄດ້ຈັດຂຶ້ນໃນວັນທີ 16 ມັງກອນ 2020 ທີ່ນະຄອນຫຼວງວຽງຈັນ ໂດຍການເປັນປະທານຂອງທ່ານ ທອງສະລິດ ມັງໜໍ່ເມກ ເລຂາຄະນະພັກຫົວໜ້າຫ້ອງວ່າການສູນກາງພັກມີບັນດາພະນັກງານຫຼັກແຫຼ່ງ ແລະພະນັກງານ-ລັດຖະກອນພາຍໃນສູນກາງພັກເຂົ້າຮ່ວມ, ຊຶ່ງເອກະສານການເມືອງທີ່ນຳມາເຜີຍແຜ່ໃນຄັ້ງນີ້ ລວມມີມະຕິສະບັບເລກທີ 072/ກມສພ ລົງວັນທີ 14 ພຶດສະພາ 2019 ວ່າດ້ວຍລະບອບການຮໍ່າຮຽນທິດສະດີການເມືອງຂອງກົມການເມືອງສູນກາງພັກ; ຂໍ້ກຳນົດສະບັບເລກທີ 01/ຄລສພ ວ່າດ້ວຍການຢັ້ງຢືນລະດັບທິດສະດີການເມືອງ ຂອງຄະນະເລຂາທິການສູນກາງພັກ, ພ້ອມກັນນີ້ຍັງໄດ້ເຜີຍແຜ່ມະຕິສະບັບເລກທີ 073/ກມສພ ວ່າດ້ວຍການສ້າງແຜນກໍ່ສ້າງ-ບຳລຸງພະນັກງານນຳພາ-ຄຸ້ມຄອງຂອງກົມການເມືອງສູນກາງພັກ; ເຜີຍແຜ່ຄຳແນະນຳສະບັບເລກທີ 204/ຄຈສພ ກ່ຽວກັບການຈັດຕັ້ງປະຕິບັດມະຕິສະບັບເລກ ທີ 072/ກມສພ, 073/ກມສພ ຂອງກົມການເມືອງສູນກາງພັກ ແລະຂໍ້ກຳນົດສະບັບເລກທີ 01/ຄລສພ ຂອງຄະນະເລຂາທິການສູນກາງພັກ.

   ໃນກອງປະຊຸມດັ່ງກ່າວ ທ່ານ ຄຳຜາ ພິມມະສອນ ຄະນະປະຈຳພັກ ຮອງຫົວໜ້າ ຫສພ ຍັງໄດ້ເຜີຍແຜ່ຄຳສັ່ງເລກທີ 064 ວ່າດ້ວຍວຽກຂະຫຍາຍພັກຂອງກົມການເມືອງສູນກາງພັກ ແລະຄຳແນະນຳ ສະບັບເລກທີ 201/ຄຈສພ ກ່ຽວກັບການຈັດຕັ້ງປະຕິບັດຄຳສັ່ງ ສະບັບເລກທີ 064/ກມສພ ຂອງຄະນະຈັດຕັ້ງສູນກາງພັກ.

------

ຂ່າວ: ວົງມະນີ 

แชร์