ຫກປຊ ຈະຂຶ້ນທະບຽນແຮງງານໃໝ່ 340 ຫົວໜ່ວຍ

  ຫ້ອງການກອງທຶນປະກັນສັງປະກັນສັງຄົມແຫ່ງຊາດ (ຫກປຊ) ກໍານົດເປົ້າໝາຍສູ້ຊົນຂຶ້ນທະບຽນຫົວໜ່ວຍແຮງງານໃໝ່ໃນປີ 2020 ໃຫ້ໄດ້ 340 ຫົວໜ່ວຍ ແລະຂຶ້ນທະບຽນຜູ້ປະກັນຕົນທີ່ເຂົ້າໃນລະບົບຫົວໜ່ວຍແຮງງານໃໝ່ໃຫ້ໄດ້ 42 ພັນຄົນ, ຂະນະທີ່ໃນປີຜ່ານມາການຂຶ້ນທະບຽນຫົວໜ່ວຍແຮງງານໃໝ່ໄດ້ພຽງ 64 % ແລະການຂຶ້ນທະບຽນຜູ້ປະກັນຕົນໃໝ່ໄດ້ 70% ຂອງແຜນການປີ.

  ອີງຕາມບົດສະຫຼຸບການຈັດຕັ້ງປະຕິບັດວຽກງານໃນປີ 2019 ຂອງຫ້ອງການກອງທຶນປະກັນສັງຄົມແຫ່ງຊາດໃຫ້ຮູ້ວ່າ: ປີ2019 ຜ່ານມາ ຫກປຊ ໄດ້ເອົາໃຈໃສ່ໃນການຈັດຕັ້ງປະຕິບັດໜ້າທີ່ຂອງຕົນຢ່າງຕັ້ງໜ້າໃນນັ້ນໄດ້ຈັດກອງປະຊຸມສໍາມະນາວຽກງານກອງທຶນປະກັນສັງຄົມໃຫ້ແກ່ບັນດາອົງການຈັດຕັ້ງຂອງລັດ, ຫົວໜ່ວຍແຮງງານ ແລະພາກສ່ວນທີ່ກ່ຽວຂ້ອງໄດ້ 70 ຄັ້ງທຽບໃສ່ແຜນການລື່ນຄາດໝາຍ 63%; ລົງເຄື່ອນໄຫວໂຄສະນາປະຊາສຳພັນໃນຂອບເຂດທົ່ວປະເທດໄດ້ 665 ຄັ້ງເທົ່າກັບ 81% (ສຳນັກງານໃຫຍ່ 178 ຄັ້ງ ແລະສູນບໍລິການ 487 ຄັ້ງ).

  ຂຶ້ນທະບຽນຫົວໜ່ວຍແຮງງານໃໝ່ໄດ້ 216 ຫົວໜ່ວຍ ເທົ່າກັບ 64% ແຜນການປີ, ຂຶ້ນທະບຽນຜູ້ປະກັນຕົນໃໝ່ໄດ້33,1 ພັນຄົນ ເທົ່າກັບ 70% ແຜນການປີໃນນີ້ພາກລັດໄດ້ 4,1 ພັນຄົນ ພາກວິສາຫະກິດໄດ້ 26,5 ພັນຄົນ ແລະມີຜູ້ປະກັນຕົນສະໝັກໃຈໃໝ່ 2.448 ຄົນ ເທົ່າກັບ 98% ຂອງແຜນການ, ຮອດປະຈຸ ບັນມີຜູ້ປະກັນຕົນທັງໝົດ 3,1 ແສນຄົນ, ຍິງ 1,4 ແສນຄົນ ໃນນີ້ພາກລັດ 1,8 ແສນຄົນ, ພາກວິສາຫະກິດ 1,1 ແສນຄົນ ແລະ ຜູ້ສະໝັກໃຈ 10,07 ພັນຄົນ, ມີຜູ້ເກີດສິດປິ່ນປົວສຸຂະພາບທັງໝົດ 7,2 ແສນຄົນ, ຍິງ 3,7 ແສນຄົນ ເປັນພາກລັດ 4,7 ແສນຄົນ, ພາກວິສາຫະກິດ ແລະສະໝັກໃຈ 2,5 ແສນຄົນ.

 ນອກຈາກນັ້ນ ຫກປຊ ຍັງໄດ້ດໍາເນີນການກວດສອບການຈັດຕັ້ງປະຕິບັດອຸດໜູນປະກັນສັງຄົມພາກສະໝັກໃຈຢູ່ສູນກາງແລະສູນບໍລິການຂັ້ນທ້ອງຖິ່ນໄດ້ 17 ແຂວງ, ໄດ້ພິມບັດປະກັນສັງຄົມໃຫ້ກັບຜູ້ປະກັນຕົນໃໝ່, ບັດເສຍ ແລະແຕກຫັກທັງໝົດ 83,9 ພັນບັດ, ພາກວິສາ ຫະກິດ ແລະ ສະໝັກໃຈ 42,4 ພັນບັດ ແລະພາກລັດ 41,5 ພັນບັດ ປະຈຸບັນ ຫກປຊ ມີພະນັກງານທັງໝົດ 362 ຄົນ, ຍິງ 203 ຄົນ, ເປັນລັດຖະກອນ 80 ຄົນ ໃນນີ້ ຫກປຊ ສູນກາງ ມີ 117 ຄົນ, ຍິງ 71 ຄົນ ແລະສູນບໍລິການກອງທຶນປະກັນສັງຄົມທ້ອງຖິ່ນມີ 245 ຄົນ, ຍິງ 132 ຄົນ.

   ສ່ວນທິດທາງແຜນການປີ 2020, ຫກປຊ ຈະສືບຕໍ່ປະຊາສຳພັນໃຫ້ແກ່ບັນດາອົງການຈັດຕັ້ງຂອງລັດ, ຫົວໜ່ວຍວິສາຫະກິດ ແລະ ເປົ້າໝາຍສະໝັກໃຈໃຫ້ໄດ້ 820 ຄັ້ງໃນນີ້ສູນກາງ 200 ຄັ້ງ, ສູນບໍລິການແຂວງ 620 ຄັ້ງ; ຈັດກອງປະຊຸມເຜີຍແຜ່ກົດໝາຍວ່າດ້ວຍການປະກັນສັງຄົມ (ສະບັບປັບປຸງ) ໃຫ້ໄດ້ 43 ຄັ້ງ; ສູ້ຊົນຂຶ້ນທະບຽນໃຫ້ຫົວໜ່ວຍແຮງງານເຂົ້າໃໝ່ໃຫ້ໄດ້ 340 ຫົວໜ່ວຍ, ຂຶ້ນທະບຽນຜູ້ປະກັນຕົນທີ່ເຂົ້າໃນລະບົບຫົວໜ່ວຍແຮງງານໃໝ່ໃຫ້ໄດ້ 42 ພັນຄົນ, ຜູ້ປະກັນຕົນລະບົບສະໝັກໃຈໃໝ່ໃຫ້ໄດ້ 3 ພັນຄົນ ແລະ ຂຶ້ນທະບຽນຜູ້ປະກັນຕົນພາກລັດໃຫ້ໄດ້ 3,5 ພັນຄົນ; ຄາດຄະເນມີຜູ້ເກີດສິດປິ່ນປົວສຸຂະພາບທີ່ໄດ້ຮັບການຄຸ້ມຄອງຈາກລະບົບປະກັນສັງຄົມທັງໝົດ 9,3 ແສນຄົນ, ໃນນີ້ ພາກລັດ 6,1 ແສນຄົນ, ພາກວິສາຫະກິດ ແລະສະໝັກໃຈ 3,2 ແສນຄົນ.

----------------

ຂຽນໂດຍ: ແປ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์