ເຜົ່າບຣູຈະສະຫຼອງ “ກະບອງໃຫຍ່” ຕົ້ນເດືອນກຸມພາ

   ງານສະເຫຼີມສະຫຼອງບຸນກະບອງໃຫຍ່ເປັນກິດຈະກຳທີ່ສຳຄັນຂອງເຜົ່າບຣູທີ່ໄດ້ປະຕິບັດ ແລະສືບທອດກັນມາແຕ່ດົນນານ, ໂດຍໃນປີນີ້ຈະຈັດຂຶ້ນໃນລະຫວ່າງວັນທີ 5-7 ກຸມພາ 2019 ທີ່ຈະມາເຖິງນີ້ຢູ່ເຂດໂພນງາມເມືອງອາດສະພອນແຂວງສະຫວັນນະເຂດ, ຊຶ່ງຈະມີການຕັກບາດຖວາຍແດ່ພຣະສົງສາ ມະເນນ, ຂະບວນແຫ່ກະບອງໃຫຍ່ ແລະຮັບຊົມການສະແດງສິລະປະວັນນະຄະດີຕ່າງໆ.

   ເຜົ່າບຣູແມ່ນໜຶ່ງໃນ 50 ຂອງບັນດາຊົນເຜົ່າທີ່ອາໄສ ແລະດໍາລົງຊີວິດຢູ່ ສປປ ລາວ, ຖືກຈັດຢູ່ໃນກຸ່ມຊົນເຜົ່າຍ່ອຍທີ 33 ທີ່ນອນຢູ່ໃນໝວດພາສາມອນ-ຂະແມ ແລະເປັນຊົນເຜົ່າທີ່ມີວັດທະນະທຳຮີດຄອງປະເພນີທີ່ເປັນເອກະລັກສະເພາະຕົວຊຶ່ງອັນສຳຄັນທີ່ໂດດເດັ່ນທີ່ສຸດຂອງຊົນເຜົ່ານີ້ກໍ່ຄືຕຳນານກະບອງໃຫຍ່. ພໍເຖິງເດືອນສາມລາວຂຶ້ນສາມຄໍ່າໃນທຸກໆປີເຜົ່າບຣູຈະມີການຈັດງານສະເຫຼີມສະຫຼອງກະບອງໃຫຍ່ຊຶ່ງເປັນກິດຈະກຳທີ່ສຳຄັນຂອງເຜົ່າທີ່ໄດ້ປະຕິບັດ ແລະສືບທອດກັນມາແຕ່ດົນນານແລ້ວ. ສະນັ້ນ, ກ່ອນຈະຮອດມື້ສະຫຼອງເຖົ້າແກ່ຫຼືຜູ້ອາວຸໂສພ້ອມດ້ວຍລູກຫຼານຈະພາກັນສ້າງກິດຈະກຳຕ່າງໆຢູ່ສວນວັດທະນະທຳເຜົ່າບຣູໃຫ້ສວຍງາມເພື່ອກຽມໃສ່ງານບຸນກະບອງໃຫຍ່ເຊິ່ງເປັນປະເພນີຂອງຊົນເຜົ່າ.

   ສຳລັບປີນີ້ແມ່ນຈະຈັດຂຶ້ນໃນລະຫວ່າງວັນທີ 5-7 ກຸມພາ 2019 ທີ່ຈະມາເຖິງນີ້ຢູ່ເຂດໂພນງາມເມືອງອາດສະພອນແຂວງສະຫວັນນະເຂດ, ໂດຍໃນຕອນເຊົ້າມືດຂອງວັນທີ 7 ກຸມພາເປັນມື້ຈູດກະບອງໃຫຍ່ ແລະເວລາປະມານ 7 ໂມງເຊົ້າຈະມີການຕັກບາດຖວາຍແດ່ພຣະສົງສາມະເນນ, ພາຍໃນງານຈະມີຂະບວນແຫ່ກະບອງໃຫຍ່, ໄດ້ຮັບຊົມການສະແດງສິລະປະວັນນະຄະດີເປັນຕົ້ນແມ່ນການຟ້ອນ, ຂັບລຳ, ການສະແດງລົງຂວ່າງເຂັນຝ້າຍ, ຕ່ຳຫູກ, ຕຳເຂົ້າ ແລະອື່ນໆ.

   ຕຳນານກະບອງໃຫຍ່ແມ່ນເອກະລັກໜຶ່ງທີ່ບົ່ງບອກເຖິງຕົ້ນກຳເນີດ ແລະຄວາມເປັນມາຂອງຊົນເຜົ່າບຣູຊຶ່ງເປັນໜຶ່ງກິດຈະກຳປະຈຳເຜົ່າທີ່ຈະຕ້ອງໄດ້ຈັດຂຶ້ນໃນທຸກໆປີ, ທັງນີ້ກໍ່ເພື່ອເປັນການສະແດງໃຫ້ເຫັນວີຖີຊີວິດຂອງຊົນເຜົ່າ, ການອະນຸລັກຮັກສາ ແລະສືບສານວັດທະນະທຳຮີດຄອງປະເພນີອັນດີງາມຂອງເຜົ່າໄວ້. ນອກນັ້ນ, ຍັງແມ່ນການອະນຸລັກຮັກສາປ່າໄມ້ທໍາມະຊາດໃຫ້ສົມດູນກັບລະບົບນິເວດໂດຍສະເພາະຕົ້ນຍາງຊຶ່ງເປັນແຫຼ່ງກຳເນີດຂອງນ້ຳມັນຍາງເພື່ອ ເຮັດກະບອງ, ທັງເປັນການເຕົ້າໂຮມຄວາມສາມັກຄີປະຊາຊົນພາຍໃນບ້ານ ແລະບ້ານອ້ອມຂ້າງໃຫ້ແໜ້ນແຟ້ນຍິ່ງຂຶ້ນ.

แชร์