ຈີດີພີເຄ ສຶກສາສຳຫຼວດບົວລະບັດຮັກສາຕົ້ນແປກ ທີ່ໄຊຍະ

  ໃນວັນທີ 14 ມັງກອນ 2020 ທີ່ພະແນກແຜນການ ແລະການລົງທຶນ ແຂວງໄຊຍະບູລີ ໄດ້ຈັດພິທີເຊັນບົດບັນທຶກຄວາມເຂົ້າໃຈ (MOU) ໂຄງການສຶກສາ ແລະສໍາຫຼວດຄວາມເປັນໄປໄດ້ໃນການລົງທຶນບົວລະບັດຮັກສາສົ່ງເສີມປະຊາຊົນປູກຕົ້ນໄມ້ແປກໃນເຂດເນື້ອທີ່ດິນປ່າຊຸດໂຊມ, ປ່າປອກໂລ້ນຢູ່ ແຂວງໄຊຍະບູລີ ໂດຍເຂົ້າຮ່ວມ ເປັນສັກຂີພິຍານຂອງທ່ານ ເພັງນິລັນ ຄໍາພັນເພັງ ຮອງເຈົ້າແຂວງໄຊຍະບູລີ, ມີຫົວໜ້າພະແນກການ, ເຈົ້າເມືອງທີ່ກ່ຽວຂ້ອງພ້ອມດ້ວຍວິຊາການທັງສອງຝ່າຍເຂົ້າ ຮ່ວມ.

  ໃນໂຄງການນີ້ ແຂວງໄຊຍະບູລີມີ ຄວາມປາຖະໜາດີໃນການພັດທະນາເສດຖະກິດ-ສັງຄົມ ປະຈຸບັນເຫັນວ່າ ແຂວງໄຊຍະບູລີມີໂອກາດ ແລະທ່າແຮງທີ່ດີ, ທາງກຸ່ມບໍລິສັດມີຕະຫຼາດຮອງຮັບຜະລິດຕະພັນຈາກຢາງແປກທີ່ໝັ້ນຄົງເພື່ອຍົກລະດັບກຳລັງການຜະລິດ, ຫັນປ່ຽນຈາກການຜະລິດແບບເກົ່າ, ຄອງເດີມຫັນໄປແບບທັນສະ ໄໝດ້ວຍເຕັກໂນໂລຊີທີ່ກ້າວໜ້າເປັນລະບົບອຸດສາຫະກໍາຜະລິດໄດ້ປະລິມານ ແລະຄຸນນະພາບສ້າງມູນຄ່າເພີ່ມສູງຂຶ້ນອີກຢ່າງໜຶ່ງເພື່ອສ້າງວຽກເຮັດງານທໍາໃຫ້ແກ່ປະຊາຊົນ ແລະສ້າງລາຍຮັບໃຫ້ແກ່ຄອບຄົວດີຂຶ້ນເທື່ອລະກ້າວເພື່ອຫຼຸດພົ້ນອອກຈາກຄວາມທຸກຍາກແນໃສ່ສ້າງຄວາມພ້ອມໃນການເຂົ້າປະຊາຄົມເສດຖະກິດອາຊຽນ.

   ຂອບເຂດເນື້ອທີ່ໂຄງການສຶກສາສໍາຫຼວດຕົ້ນແປກຢູ່ແຂວງໄຊຍະບູລີ ແມ່ນກວມເອົາ 5 ເມືອງຄື: ເມືອງຄອບ, ຫົງສາ, ໄຊຍະບູລີ, ໄຊສະຖານ ແລະເມືອງທົ່ງມີໄຊ ເຊິ່ງຈະເລີ່ມລົງສໍາຫຼວດແຕ່ເດືອນມັງກອນຫາເດືອນທັນວາປີ 2020 ໂດຍຈະເລັ່ງໃສ່ເກັບກໍາຂໍ້ມູນເນື້ອທີ່, ຈໍານວນຕົ້ນໄມ້ແປກ, ເນື້ອທີ່ປ່າຊຸດໂຊມ ແລະປ່າປອກໂລ້ນ, ຄວາມຄ້ອຍຊັນ, ແຫຼ່ງນໍ້າ ແລະຂໍ້ມູນອື່ນໆ.

   ສຶກສາ ແລະ ເກັບກໍາຂໍ້ມູນບ້ານເປົ້າໝາຍແຮງງານທີ່ຈະເຂົ້າຮ່ວມໂຄງການ, ເຕັກນິກການບົວລະບັດຮັກສາ, ເຕັກນິກການປາດ ແລະຕັດຕົ້ນໄມ້ແປກ, ເຕັກນິກການປູກ, ຮູບແບບການເກັບຊື້ລາຄາຊື້ນໍ້າມັນໄມ້ແປກຕົ້ນໄມ້ແປກທໍາມະຊາດ, ຕົ້ນໄມ້ແປກທີ່ປະຊາຊົນປູກໄວ້ກ່ອນແລ້ວ ແລະໄມ້ແປກທີ່ສົ່ງເສີມໃຫ້ປະຊາຊົນປູກ ຫຼືປະຊາຊົນລົງທຶນປູກເອງ, ສ້າງບົດວິພາກເສດຖະກິດ-ເຕັກນິກ (FS), ບົດປະເມີນຜົນຕໍ່ສັງຄົມ (SIA), ບົດປະເມີນຜົນກະທົບຕໍ່ສິ່ງແວດລ້ອມ (EIA), ແຜນຄຸ້ມຄອງ ແລະຕິດຕາມກວດກາດ້ານສິ່ງແວດລ້ອມ(EMMP) ແລະແຜນຄຸ້ມຄອງຕິດຕາມກວດກາດ້ານສັງຄົມ(SMMP) ຂອງໂຄງການໂດຍສອດຄ່ອງກັບມາດຕະຖານສາກົນ ແລະກົດໝາຍທີ່ກ່ຽວຂ້ອງຂອງ ສປປ ລາວ ກໍານົດໄວ້.

  ຈາກນັ້ນຕາງໜ້າອົງການປົກຄອງ ແຂວງໄຊຍະບູລີ ທ່ານນາງ ຄໍາມີ ຈັນ ທິບ ຫົວໜ້າພະແນກແຜນການ ແລະການລົງທຶນແຂວງ ແລະທ່ານ ນາງ ສຸກສະຫວັນ ສຸລິໃຈ ໃນນາມຜູ້ຈັດການບໍລິສັດ ຈີດີພີເຄ ມາຍນິ້ງ ຈໍາກັດຜູ້ດຽວ ໄດ້ຮ່ວມກັນເຊັນບົດບັນທຶກຄວາມເຂົ້າໃຈໂຄງການສຶກສາ ແລະສໍາຫຼວດຄວາມເປັນໄປໄດ້ໃນການລົງທຶນບົວລະບັດຮັກສາ ແລະສົ່ງເສີມປະຊາຊົນປູກຕົ້ນແປກໃນ 5 ເມືອງຂອງ ແຂວງໄຊຍະບູລີຢ່າງເປັນທາງການ.

______________

ຂຽນໂດຍ: ບຸນທີ      
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

ບໍລິການໂຄສະນາທາງເຟສບຸກ ແລະເວັບໄຊ

ໂທ: 021 313645, 316511

แชร์