ເອກະຊົນຈະລົງທຶນ 102 ຕື້ກວ່າກີບ ສົ່ງເສີມປູກໄມ້ໃຫ້ໝາກຢູ່ວ່າປີ

   ໃນທ້າຍອາທິດຜ່ານມານີ້ຢູ່ພະແນກແຜນການ ແລະການລົງທຶນແຂວງສາລະວັນ ໄດ້ຈັດພິທີເຊັນສັນຍາໂຄງການສົ່ງເສີມປະຊາຊົົນປູກໄມ້ໃຫ້ໝາກ 15 ຊະນິດ ຢູ່ 3 ບ້ານເມືອງວາປີລະຫວ່າງຝ່າຍຄະນະກຳມະການສົ່ງເສີມ ແລະຄຸ້ມຄອງການລົງທຶນແຂວງເຊັນໂດຍທ່ານ ໂພສີແກ້ວ ສີພັນດອນ ຫົວໜ້າພະແນກແຜນການ ແລະການລົງທຶນແຂວງ, ທ່ານ ບຸນຍູ້ ຈັນທະລັງສີ ເຈົ້າເມືອງໆວາປີ, ທ່ານ ກິພະຈັນ ໂພສາລີ ຮອງຫົວໜ້າພະແນກກະສິກຳ ແລະ ປ່າໄມ້ ແລະ ຝ່າຍບໍລິສັດເຊັນໂດຍ ທ່ານ ຫວູ ຈຽນວູ ປະທານ ບໍລິສັດ ພອນທິບ ຈຽນຕາ ການກະເສດຈຳກັດຜູ້ດຽວໂດຍຊ້ອງໜ້າທ່ານ ວິຊຽນ ນະວິກຸນ ຮອງເຈົ້າແຂວງໆ ສາລະວັນພ້ອມດ້ວຍພາກສ່ວນຕ່າງໆທີ່ກ່ຽວຂ້ອງເຂົ້າຮ່ວມ.

  ໂຄງການສົ່ງເສີມປະຊາຊົນປູກໄມ້ໃຫ້ໝາກ 15 ຊະນິດໃນ 3 ບ້ານຄື: ບ້ານໜອງໂພ, ຈອງ ແລະບ້ານດົງມອນ ເມືອງວາປີເປັນການລົງທຶນໃນຮູບແບບ 2+3 ຊຶ່ງໝາຍເຖິງປະຊາຊົນເປັນເຈົ້າຂອງເນື້ອທີ່ດິນ, ແຮງງານ ແລະ ບໍລິສັດຮັບ ຜິດຊອບທຶນ, ແນວພັນ, ເຕັກນິກ, ວິຊາການ ແລະເກັບຊື້ຜົນຜະລິດຕາມສັນຍາຄໍ້າປະກັນຂອງບໍລິສັດແນໃສ່ສົ່ງເສີມປະຊາຊົນໃຫ້ມີວຽກເຮັດງານທຳ, ມີລາຍໄດ້ທີ່ໝັ້ນຄົງເຮັດໃຫ້ປະຊາຊົນມີສ່ວນຮ່ວມໃນການປູກໄມ້ໃຫ້ໝາກ ແລະເກັບກຳບົດຮຽນ, ປະສົບ ການຕະຫຼອດຮອດການຂາຍ.

   ເນື້ອທີ່ເປົ້າໝາຍທຳການຜະລິດ 735 ເຮັກຕາ ນອນຢູ່ໃນ 3 ບ້ານ, ມີ 210 ຄອບຄົວ ປະເພດໄມ້ໃຫ້ໝາກທີ່ນຳມາປູກຄື: ໝາກກ້ວຍ, ລຳໄຍ, ໝາກເງາະ, ຖົ່ວລຽນ, ໝາກຂາມ, ໝາກມ່ວງ, ໝາກມີ້, ໝາກມັງຄຸດ ແລະອື່ນໆ ທີ່ເໝາະສົມກັບດິນຕິດພັນກັບການປູກໄມ້ຮັກສາປ່າມີ: ໄມ້ດູ່ ແລະໄມ້ແຄນ ສ່ວນການບຸກເບີກເນື້ອທີ່, ໄຖຄາດຫຼືກະກຽມດິນບໍລິສັດເປັນຜູ້ຮັບຜິດຊອບໂດຍບໍ່ໄດ້ເສຍຄ່າ ແລະມອບແນວພັນ 2.400 ຕົ້ນຕໍ່ເຮັກຕາ.

  ນອກນັ້ນການປູກແມ່ນສາມາດປູກໄດ້ 2.400 ຕົ້ນຕໍ່ເຮັກຕາ, ຕົ້ນໜຶ່ງສາມາດໃຫ້ຜົນຜະລິດໄດ້ 25 ກິໂລ ແລະ ບໍລິສັດຈະເກັບຊື້ 410 ກີບຕໍ່ກິໂລ ບໍລິສັດມີນະໂຍ ບາຍຈ່າຍເງິນລ່ວງໜ້າໃຫ້ປະຊາ ຊົນກ່ອນ 7 ແສນກີບຕໍ່ເຮັກຕາຕໍ່ເດືອນ ໃນ ເວລາເຮັດວຽກໃນສວນເມື່ອຮອດເວລາເກັບກ່ຽວບໍລິສັດຈະຫັກເອົາເງິນທີ່ຈ່າຍລ່ວງໜ້ານັ້ນຄືນສຳລັບໄມ້ຮັກສາປ່າ ແລະໄມ້ໃຫ້ໝາກຕົ້ນໃຫຍ່ສາມາດປູກໄດ້ ໃນເນື້ອທີ່ 1 ເຮັກຕາ ບໍ່ໃຫ້ຫຼຸດ 150 ຕົ້ນ ຕໍ່ເຮັກຕາ.

  ໂຄງການດັ່ງກ່າວໄດ້ດຳເນີນເປັນເວລາ 30 ປີ ແຕ່ປີ 2020-2050 ນັບແຕ່ມື້ລົງລາຍເຊັນເປັນຕົ້ນໄປມູນຄ່າການລົງທຶນທັງໝົດ 102 ຕື້ກວ່າກີບ ແລະໃນຕໍ່ໜ້າ ບໍລິສັດຈະສືບຕໍ່ຂະຫຍາຍພື້ນທີ່ການ ປູກຢູ່ແຂວງສາລະວັນໃຫ້ໄດ້ 20 ພັນເຮັກຕາ ໃນເມືອງເປົ້າໝາຍຄື: ເມືອງວາປີ, ເລົ່າງາມ, ຄົງເຊໂດນ ແລະເມືອງຕຸ້ມລານ.

_____________

ຂຽນໂດຍ: ທິດລານີ ໂຄດໂຍທາ      
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์