ໄຊຍະບູລີ ໄຂກອງປະຊຸມ ຄົບຄະນະບໍລິຫານງານພັກຄັ້ງທີ 14

  ກອງປະຊຸມຄົບຄະນະບໍລິຫານງານພັກ ແຂວງໄຊຍະບູລີ ຄັ້ງທີ 14 ສະໄໝທີ VI ໄດ້ໄຂຂຶ້ນໃນວັນທີ 14 ມັງກອນ 2020 ທີ່ສະໂມສອນຫ້ອງວ່າການແຂວງໂດຍການເປັນປະທານຂອງສະຫາຍ ພົງສະຫວັນ ສິດທະວົງ, ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງໄຊຍະບູລີ, ມີບັນດາສະຫາຍກໍາ ມະການປະຈໍາພັກແຂວງ, ກໍາມະການພັກແຂວງ, ເລຂາພັກເມືອງ, ເຈົ້າເມືອງ 11 ເມືອງ, ເລຂາຄະນະພັກຮາກຖານ, ເລຂາໜ່ວຍພັກບັນດາພະແນກການ, ກົມກອງ, ອົງການ, ລັດວິສາຫະກິດ, ດ່ານສາກົນນໍ້າເຫືອງ, ດ່ານສາກົນນໍ້າເງິນເຂົ້າຮ່ວມ.

 ສະຫາຍ ພົງສະຫວັນ ສິດທະວົງ ກ່າວວ່າ: ກອງປະຊຸມຄັ້ງນີ້ຈະໄດ້ດໍາເນີນໄປເປັນເວລາ 5 ວັນ, ໂດຍໄດ້ແບ່ງເປັນສອງວາລະຄື: ວາລະດໍາເນີນກອງປະຊຸມເປີດກວ້າງແມ່ນຈະໄດ້ພ້ອມກັນຕີລາຄາຄືນການນໍາພາຂອງຄະນະບໍລິຫານງານພັກແຂວງຕໍ່ວຽກງານຮອບດ້ານ 1 ປີຜ່ານມາ, ພ້ອມທັງກໍານົດທິດທາງວຽກງານຈຸດສຸມປີ 2020 , ລົງເລິກຕີລາຄາກ່ຽວກັບວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ວຽກງານການຕ່າງປະເທດ, ສະຫຼຸບຕີລາຄາການນຳພາວຽກງານແນວລາວສ້າງຊາດ, ອົງການຈັດຕັ້ງມະຫາຊົນ, ອົງການນັກລົບເກົ່າ, ຜົນການດຳເນີນກອງປະຊຸມໃຫຍ່ອົງຄະນະພັກເມືອງ 7 ເມືອງຜ່ານມາ ແລະແຜນດຳເນີນກອງປະຊຸມໃຫຍ່ອົງຄະນະພັກເມືອງທີ່ຍັງເຫຼືອ, ການກະກຽມດໍາເນີນກອງປະຊຸມໃຫຍ່ສໍານັກງານ, ອົງການ-ກົມກອງອ້ອມຂ້າງແຂວງ ແລະການດຳເນີນກອງປະຊຸມໃຫຍ່ອົງການແນວລາວສ້າງຊາດ, ອົງການຈັດຕັ້ງມະຫາຊົນ, ການກະກຽມດໍາເນີນກອງປະຊຸມໃຫຍ່ຄັ້ງທີ VII ຂອງອົງຄະນະພັກແຂວງ ແລະ ວາລະທີ່ສອງເປັນກອງປະຊຸມພາຍໃນຄະນະບໍລິ ຫານງານພັກແຂວງໂດຍຈະໄດ້ພ້ອມກັນດຳເນີນຊີວິດການເມືອງ, ສຳຫຼວດການນຳພາລວມພາຍໃນຄະນະບໍລິຫານງານພັກແຂວງ.

  ຈາກນັ້ນສະຫາຍ ເພັງນິລັນ ຄໍາພັນເພັງ ຄະນະປະຈໍາພັກແຂວງ, ຮອງເຈົ້າແຂວງໄດ້ຜ່ານຮ່າງບົດສະຫຼຸບຕີລາຄາວຽກງານຮອບດ້ານປະຈຳປີ 2019 ແລະ ທິດທາງແຜນວຽກງານຈຸດສຸມປະຈຳປີ 2020, ບາງຕອນທ່ານໄດ້ໃຫ້ຮູ້ວ່າ: ໜຶ່ງປີຜ່ານມາເສດຖະກິດຂອງແຂວງຂະຫຍາຍຕົວຢູ່ໃນລະດັບ 8%, ຫຼຸດແຜນທີ່ວາງໄວ້ 0,7% , ມູນຄ່າຜະລິດຕະພັນພາຍໃນ GDP ບັນລຸໄດ້ 10.229 ຕື້ກີບ, ສະເລ່ຍຕໍ່ຫົວຄົນໄດ້ 27,70 ລ້ານກີບ ຫຼືເທົ່າກັບ 3.113 ໂດລາສະຫະລັດ,ໂຄງປະກອບເສດຖະ ກິດໄດ້ຫັນປ່ຽນໃນທິດຕັ້ງໜ້າກະສິກຳຂະຫຍາຍຕົວ 3,2%,ກວມເອົາ 29%ຂອງ GDP, ອຸດສາຫະກຳຂະຫຍາຕົວ12,6%, ກວມເອົາ 36% ຂອງGDP ແລະ ຂົງເຂດການບໍລິການຂະຫຍາຍຕົວ 5,2%,ກວມເອົາ 35% ຂອງ GDP,ສາມາດຈັດຕັ້ງປະຕິບັດລາຍຮັບໄດ້ 913,43 ຕື້ກີບ,ເທົ່າກັບ 94,98% ຂອງແຜນການປີ, ທຽບໃສ່ເວລາດຽວກັນຂອງປີຜ່ານມາເພີ່ມຂຶ້ນ 5,81%. ກອງປະຊຸມດັ່ງກ່າວບັນດາຜູ້ເຂົ້າຮ່ວມຈະໄດ້ພ້ອມກັນປະກອບຄໍາຄິດຄໍາເຫັນໃສ່ບົດຕ່າງໆ ແລະ ຈະໄດ້ດໍາເນີນກອງປະຊຸມໄປຈົນຮອດວັນທີ 18 ມັງກອນ ຈຶ່ງຈະສໍາເລັດ.

_____________

ໜັງສືພິມເສດຖະກິດ-ສັງຄົມ

แชร์