ປີນີ້ເຊກອງຈະສູ້ຊົນໃຫ້ບັນລຸຄາດໝາຍ 11 ຕົວຊີ້ວັດ

  ທ່ານ ຄໍາໄຫຼ ສັນຕິພູມ ຮອງຫົວໜ້າພະແນກສາທາລະນະສຸກ ແຂວງເຊກອງ ລາຍງານໃນກອງປະຊຸມສະຫຼຸບວຽກງານສາທາລະນະສຸກປະຈໍາປີ 2019 ໃນວັນທີ 8 ມັງກອນຜ່ານມານີ້ວ່າ: ໃນປີ 2020 ຄະນະນໍາ-ຄະນະພະແນກພວກເຮົາຈະຕັ້ງໜ້າເອົາໃຈໃສ່ສືບຕໍ່ຊີ້ນໍາໆພາ ວຽກງານຢ່າງແຂງແຮງ ເພື່ອໃຫ້ບັນລຸຕາມຄາດໝາຍ 11 ຕົວຊີ້ວັດ ທີ່ວາງໄວ້ ຊຶ່ງໄດ້ວາງເປົ້າໝາຍວຽກທີ່ເປັນບູລິມະສິດທີ່ຕ້ອງສຸມໃສ່ເປັນຕົ້ນແມ່ນເປັນເຈົ້າການຈັດຕັ້ງປະຕິບັດຍຸດທະສາດແມ່ ແລະເດັກ ແລະ ໂພຊະນາການໃຫ້ກວ້າງຂວາງ ແລະທົ່ວເຖິງທ້ອງຖິ່ນຮາກຖານທີ່ຢູ່ເຂດຫ່າງໄກສອກຫຼີກ, ສືບຕໍ່ປະຕິບັດນະໂຍບາຍປິ່ນປົວໃຫ້ສອດຄ່ອງກັບການ ຈັດຕັ້ງປະຕິບັດຕົວຈິງ, ປັບປຸງຍົກລະດັບສະຖານທີ່ບໍລິການທຸກຂັ້ນໃຫ້ມີ ຄຸນນະພາບ, ສຸມໃສ່ແກ້ໄຂສຸກເສີນກະທັນຫັນຜ່າຕັດຊ່ວຍເກີດຢູ່ຂັ້ນເມືອງ ແລະສຸກສາລາໃຫ້ຊ່ວຍເກີດທໍາມະດາໄດ້, ປັບປຸງ ແລະຍົກລະດັບຄວາມ ສາມາດພະນັກງານແພດໝໍ ໃຫ້ມີຄວາມຮູ້ຄວາມສາມາດ ແລະຊໍານານງານ ຕິດພັນກັບມີຈັນຍາບັນ, ຈັນຍາທໍາມີທັດສະນະຮັບໃຊ້ທີ່ດີ, ມີນໍ້າໃຈຮັບ ຜິດຊອບໃນການໃຫ້ບໍລິການຄົນເຈັບ, ເອົາໃຈໃສ່ຕິດຕາມກວດກາຄຸນນະ ພາບອາຫານ ແລະຢາໃຫ້ປອດໄພ, ສົ່ງເສີມການຜະລິດພາຍໃນ ແລະມາດ ຕະການຕໍ່ຜູ້ລະເມີດ.

  ພ້ອມນີ້ ຕ້ອງໄດ້ປັບປຸງວຽກງານສາທາລະນະສຸກຂັ້ນພື້ນຖານຢູ່ຂັ້ນ ບ້ານໃຫ້ທົ່ວເຖິງ, ເລັ່ງລັດຈັດຕັ້ງປະຕິບັດຍຸດທະສາດປະຕິຮູບສາທາລະນະສຸກໃຫ້ປາກົດຜົນເປັນຈິງ, ສືບຕໍ່ປຸກລະດົມທົ່ວປວງຊົນເປັນເຈົ້າການຮັກສາສຸຂະພາບຂອງຕົນດ້ວຍການເພີ່ມການໂຄສະນາສຸຂະສຶກສາເຊັ່ນ: ອະນາໄມ 3 ສະອາດ, ຫຼັກໂພຊະນາການຫັນລົງສູ່ຮາກຖານ ໂດຍຖືເອົາຂະບວນການສ້າງບ້ານສາທາລະນະສຸກແບບຢ່າງໃຫ້ຫຼາຍຂຶ້ນ, ເພີ່ມການ ເຝົ້າລະວັງ ແລະກະກຽມຕອບໂຕ້ການລະບາດຂອງພະຍາດຮ້າຍແຮງ ຕ່າງໆຢ່າງທັນການ, ຊຸກຍູ້ສົ່ງເສີມ ແລະຄຸ້ມຄອງພາກເອກະຊົນໃຫ້ມີບົດ ບາດການປະກອບສ່ວນບໍລິການສຸຂະພາບໃຫ້ໄດ້ມາດຖານ, ທັນສະໄໝ ແລະຍຸດຕິທໍາແກ່ສັງຄົມ.

  ນອກນີ້ ຕ້ອງໄດ້ຕິດຕາມ ແລະ ຕີລາຄາຄວາມຄືບໜ້າຂອງຕົວຊີ ວັດໃນການບັນລຸຄາດໝາຍສູ້ຊົນ LDC, UHC, SDG , ຊຶ່ງຄາດ ໝາຍສູ້ຊົນ 11 ຕົວຊີ້ວັດໃນປີ 2020 ມີຄື: ອັດຕາເດັກນ້ອຍລຸ່ມ 5 ປີ ທີ່ມີນໍ້າໜັກຕໍ່າກວ່າມາດຕະຖານໃຫ້ຫຼຸດລົງຈາກ 23,8% ຍັງ ເຫຼືອ 21% ຂອງປະຊາກອນກຸ່ມ ເປົ້າໝາຍ, ອັດຕາເດັກນ້ອຍລຸ່ມ 5 ປີ ທີ່ມີລວງສູງບໍ່ໄດ້ມາດຕະຖານໃຫ້ຫຼຸດ ລົງຈາກ 32% ຍັງເຫຼືອ 30% ຂອງປະຊາກອນກຸ່ມເປົ້າໝາຍ, ອັດຕາການຕາຍຂອງເດັກນ້ອຍລຸ່ມ 1 ປີ ໃຫ້ຫຼຸດລົງຈາກ 21/1.000 ຍັງເຫຼືອ 19/1.000 ຄົນ ຂອງເດັກເກີດມີຊີວິດ, ອັດຕາການຕາຍຂອງເດັກນ້ອຍ ລຸ່ມ 5 ປີ ໃຫ້ຫຼຸດລົງຈາກ 23/1.000 ຍັງເຫຼືອ 21/1.000 ຄົນຂອງເດັກເກີດມີຊີວິດ, ອັດຕາການຕາຍຂອງແມ່ໃຫ້ຫຼຸດລົງຈາກ 57/1.000 ຍັງເຫຼືອ55/1.000 ຄົນ ຂອງເດັກເກີດມີຊີວິດ, ອັດຕາການເກີດມີແພດ ຊ່ວຍເພີ່ມຈາກ 52% ມາເປັນ 60% ຂອງຈໍານວນປະຊາກອນກຸ່ມເປົ້າໝາຍ, ອັດຕາການສັກຢາກັນພະຍາດເພີ່ມຈາກ 78% (ເປົ້າໝາຍ ຕົວຈິງ) ໃຫ້ບັນລຸ 90% ຂອງຈໍານວນປະຊາກອນກຸ່ມເປົ້າໝາຍ, ອັດຕາຊົມໃຊ້ນໍ້າສະອາດເພີ່ມຈາກ 80,8% ໃຫ້ບັນລຸ 90% ຂອງຈໍານວນ ຄອບຄົວທັງໝົດ, ອັດຕາການຊົມໃຊ້ວິດຖ່າຍ ເພີ່ມຈາກ 76% ໃຫ້ບັນລຸ 90% ຂອງຈໍານວນຄອບຄົວທັງໝົດ, ອັດຕາການປົກຄຸມປະກັນສຸຂະພາບ ເພີ່ມຈາກ 100% ໃຫ້ບັນລຸໄດ້ 100% ຂອງຈໍານວນປະຊາກອນທັງໝົດ, ອັດຕາການຮັບຮອງ ແລະປະກາດເປັນບ້າສາທາລະນະສຸກແບບຢ່າງເພີ່ມຈາກ 60% ໃຫ້ບັນລຸ 80% ຂອງຈໍນວນບ້ານທັງໝົດ.

 

ຂ່າວ: ພຸດທະສອນ

แชร์