ສະຫະພັນກຳມະບານສຶກສາສະຫວັນນະເຂດ ສຳເລັດກອງປະຊຸມໃຫຍ່

  ວັນທີ 9 ມັງກອນ ຜ່ານມາທີ່ຫ້ອງປະຊຸມພະແນກສຶກສາທິການ ແລະກີລາແຂວງສະຫວັນນະເຂດ ໄດ້ຈັດກອງປະຊຸມໃຫຍ່ຄັ້ງທີ 5 ຂອງສະຫະພັນກຳມະບານພະ ແນກສຶກສາທິການ ແລະ ກີລາແຂວງໂດຍການເຂົ້າຮ່ວມຂອງ ທ່ານ ສົມໃຈ ສີສົມພອນ ຮອງປະທານຄະນະບໍລິຫານງານກຳມະບານແຂວງ, ທ່ານ ຖາວອນ ອິນສີຊຽງໃໝ່ປະທານສະຫະພັນກຳມະບານພະແນກສຶກສາທິການ ແລະກີລາ, ມີບັນດາທ່ານສະມາຊິກສະຫະພັນກຳມະບານທັງ 7 ຮາກຖານກຳມະບານຄື: ກຳມະບານຮາກ ຖານພະແນກສຶກສາ, ກີລາກາຍຍະກໍາ, ໂຮງຮຽນສາມັນກິນນອນຊົນເຜົ່າ, ໂຮງຮຽນ ມສ ສະຫວັນ, ມປາຍ ໂພນສະຫວັນ, ມສ ອຸດົມວິໄລ ແລະກຳມະບານຮາກຖານໂຮງຮຽນສົງເຂົ້າຮ່ວມ.

   ທ່ານ ຖາວອນ ອິນສີຊຽງໃໝ່ ໄດ້ຜ່ານບົດລາຍງານການເມືອງຕໍ່ກອງປະຊຸມໃຫຍ່ຄັ້ງທີ 5 ແລະທິດທາງແຜນການ 5 ປີຕໍ່ໜ້າ, ສະຫະພັນກຳມະບານພະແນກສຶກ ສາທິການ ແລະກີລາແຂວງປະກອບມີ 7 ຮາກຖານ ແລະ ມີສະມາຊິກທັງໝົດ 412 ສະຫາຍ, ຍິງ 249 ສະຫາຍ, ຄະນະສະຫະພັນກໍາມະບານພະແນກສຶກສາທິ ການ ແລະ ກີລາໄດ້ເອົາໃຈໃສ່ເຄື່ອນໄຫວຊີ້ນໍາໆພາໃນຄວາມຮັບຜິດຊອບຂອງຕົນໃຫ້ສອດຄ່ອງກັບຄວາມເປັນຈິງ ແລະເຂັ້ມແຂງຮອບດ້ານຕໍ່ກັບການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າຄະນະສະຫະພັນກໍາມະບານໄດ້ລົງຕິດຕາມກວດກາຊຸກຍູ້ໃນແຕ່ຮາກຖານໃຫ້ປະຕິບັດຕາມຂັ້ນຕອນຂອງການຈັດຕັ້ງປະຕິບັດເນື້ອໃນ 5 ເປັນເຈົ້າເຊັ່ນໃຫ້ມີການເກັບກຳຂໍ້ມູນ, ວາງແຜນ, ເຜີຍແຜ່ເນື້ອໃນຂໍ້ແຂ່ງຂັນ 5 ເປັນເຈົ້າ, ເປີດຂະບວນກາແຂ່ງຂັນ, ປຸກລະດົມຊຸກຍູ້ຕິດຕາມຕີລາຄາປະເມີນຜົນຂະບວນ ການແຂ່ງຂັນປະຈຳປີໃຫ້ສຳເລັດ ແລ້ວສັງລວມບົດສະຫຼຸບຜົນການຈັດຕັ້ງປະຕິບັດ-ວາງທິດທາງແຜນ ການໆແຂ່ງຂັນປີຕໍ່ປີສະເໜີສະຫະພັນກຳມະບານຂັ້ນເທິງເພື່ອຂໍອະນຸມັດໃບຢັ້ງຢືນ 5 ເປັນເຈົ້າປະຈໍາປີໃນຂັ້ນຕອນຕໍ່ໄປຊຶ່ງໄດ້ເຮັດໃຫ້ແຕ່ລະກຳມະບານຮາກຖານໃນ 7 ຮາກຖານໄດ້ຮັບໃບຢັ້ງຢືນກຳມະບານຮາກຖານ 5 ເປັນເຈົ້າ 3 ປີຊ້ອນຄືປີ 2017,2018 ແລະ2019 ສໍາລັບທິດທາງແຜນການໃນຕໍ່ໜ້າແມ່ນຕ້ອງໄດ້ຈັດຕັ້ງເຜີຍແຜ່ບົດສະຫຼຸບ ແລະ ແຜນການໃຫ້ກັບພາກສ່ວນທີ່ກ່ຽວຂ້ອງໃຫ້ກວ້າງຂວາງ ແລະໃຫ້ມີການຊຸກຍູ້,ຕິດຕາມ,ກວດກາປະເມີນ, ສະຫຼຸບ, ວາງແຜນການຖອດຖອນບົດຮຽນໃນວຽກງານ 5 ເປັນເຈົ້າ ໃນທຸກ 3 ເດືອນ, 6ເດືອນ, ເປັນປີໃຫ້ເປັນປົກກະຕິ.

  ຈາກນັ້ນໃນກອງປະຊຸມກໍ່ຍັງມອບທຸງໄຊ ແລະໃບຢັ້ງຢືນກຳມະບານຮາກຖານ 5 ເປັນເຈົ້າໃຫ້ສະຫະພັນກໍາມະບານພະແນກສຶກສາທິການ ແລະ ກີລາແຂວງ, ມອບໃບຍ້ອງຍໍ, ຊົມເຊີຍໃຫ້ກັບ 7 ຮາກຖານກໍາມະບານທີ່ມີຜົນງານດີ່ເດັ່ນ ແລະ ໄດ້ລົງປະຊາມະຕິເລືອກຕັ້ງເອົາຄະນະກຳມະບານຊຸດໃໝ່ຊືງມີຜູ້ລົງສະໝັກທັງໝົດ 9 ສະ ຫາຍ, ຍິງ 3 ສະຫາຍ,ເລືອກເອົາ 7 ສະຫາຍຜົນຂອງກອງປະຊຸມຄັ້ງປະຖົມມະລຶກເລືອກໄດ້ສະຫາຍ ອະນຸສອນ ສຸດທິວົງ ເປັນປະທານກຳມະບານຮາກຖານຊຸດໃໝ່, ສະຫາຍ ສະຫງວນຮັກ ທົງພັກດີ ເປັນຮອງປະທານທັງເປັນປະທານກວດກາ ແລະອີກ 5 ສະຫາຍ ເປັນຄະມະກຳມະການ.

  ໃນໂອກາດເຂົ້າຮ່ວມກອງປະຊຸມ ທ່ານ ສົມໃຈ ສີສົມພອນ ກໍ່ໄດ້ມີຄໍາເຫັນຍ້ອງຍໍຊົມເຊີຍບັນດາສະມາຊິກກຳມະບານທີ່ຍາດຜົນງານໃນຫຼາຍດ້ານໃຫ້ເອົາໃຈໃສ່ສືບຕໍ່ໃນການສຶກສາອົບຮົມພະນັກງານສະມາຊິກກຳມະບານໃຫ້ ເຊື່ອມຊຶມບັນດາແນວທາງນະໂຍ ບາຍຂອງພັກ-ລະບຽບຫຼັກການ ຂອງລັດຍົກສູງທັດສະນະຫຼັກໝັ້ນໃຫ້ໜັກແໜ້ນມີຈິດໃຈຮັກຊາດຮັກ ບ້ານເກີດເມືອງນອນກຽມພ້ອມທັງມ້າງທຸກກົນອຸບາຍຫັນປ່ຽນໂດຍສັນຕິຂອງສັດຕູ, ສະມາຊິກກໍາມະບານທຸກສະຫາຍຕ້ອງເອົາໃຈໃສ່ຍົກລະດັບຄວາມຮູ້ຄວາມສາມາດຂອງຕົນຢ່າງບໍ່ຢຸດຢັ້ງ.

_____________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์