ສະຫາຍ ໄລສວນ ມິດສູວັນ ຮັບເລືອກເປັນເລຂາຄະນະບໍລິຫານງານ ພັກເມືອງລັກຈຶງ

 ກອງປະຊຸມໃຫຍ່ຄັ້ງທີ XV ອົງຄະນະພັກເມືອງດາກຈຶງ ແຂວງເຊກອງ ໄດ້ສໍາເລັດລົງຢ່າງຈົບງາມໃນວັນທີ 9 ມັງກອນຜ່ານມາທີ່ຫ້ອງປະຊຸມຂອງເມືອງດັ່ງກ່າວໂດຍການເປັນປະທານຂອງສະ ຫາຍ ໄລສວນ ມິດສຸວັນ ເລຂາຄະນະບໍລິຫານງານພັກເມືອງ,ເຈົ້າເມືອງດາກຈຶງ ແລະເຂົ້າຮ່ວມ ມີສະຫາຍ ຄໍາເຜີຍ ບຸດດາວຽງ ກໍາມະການສູນກາງພັກ,ເລຂາຄະນະບໍລິຫານງານພັກແຂວງ,ເຈົ້າແຂວງເຊກອງ,ມີຄະນະປະຈໍາພັກແຂວງ,ກຳມະການພັກແຂວງ,ຄະນະປະຈຳພັກເມືອງ, ກຳມະການພັກເມືອງ, ເລຂາຄະນະພັກຮາກຖານ-ຄະນະໜ່ວຍພັກ, ພະນັກງານອາວຸໂສບຳນານ ແລະແຂກຮັບເຊີນຈາກເມືອງອ້ອມຂ້າງ.

  ກອງປະຊຸມໄດ້ພ້ອມກັນຄົ້ນຄວ້າ ແລະເປັນເອກະພາບຮັບຮອງເອົາບົດລາຍງານການເມືອງ, ແຜນພັດທະນາເສດຖະກິດ-ສັງຄົມ ແລະ ບົດສໍາຫຼວດການນໍາພາລວມ ຂອງຄະນະບໍລິຫານງານພັກເມືອງ ຊຸດທີ XIV ໃນໄລຍະ 5 ປີຜ່ານມາ ແລະທິດທາງໜ້າທີ່ໃນຕໍ່ໜ້າ ກໍຄື ຄາດໝາຍສູ້ຊົນຂອງແຜນການ 5 ປີ (2020-2024) ເພື່ອເຮັດໃຫ້ເມືອງດາກຈຶງກ້າວຂຶ້ນດ້ວຍທ່ວງທ່າອັນໜັກແໜ້ນ, ຮອບດ້ານ, ສ້າງພື້ນຖານໃຫ້ອົງຄະນະພັກເມືອງນຳພາປະຊາຊົນບັນດາເຜົ່າຫຼຸດພົ້ນອອກຈາກຄວາມທຸກຍາກ ແລະ ດ້ອຍພັດທະນາໂດຍສູ້ຊົນເຮັດໃຫ້ ເສດຖະກິດຂອງເມືອງມີການຂະຫຍາຍຕົວຢ່າງຕໍ່ເນື່ອງ, ສະເລ່ຍ 9,6% ຕໍ່ປີ ແລະຮອດປີ 2024 ລວມຍອດລາຍຮັບພາຍໃນໃຫ້ບັນລຸ 541,35 ຕື້ກີບ,ສະເລ່ຍໃສ່ຫົວຄົນໜຶ່ງໃຫ້ໄດ້ 19 ລ້ານກວ່າກີບ ຫຼືເທົ່າກັບ 2.288 ໂດລາສະຫະລັດຕໍ່ຄົນຕໍ່ປີ,ສູ້ຊົນເກັບລາຍຮັບເຂົ້າງົບປະມານໃຫ້ໄດ້ 15 ຕື້ກີບ ແລະຄຸ້ມຄອງລາຍຈ່າຍໃຫ້ຢູ່ໃນລະດັບ 179 ຕື້ກວ່າກີບ.

  ກອງປະຊຸມໄດ້ຟັງການປະກອບຄໍາເຫັນຈາກຜູ້ຕາງໜ້າຫຼາຍພາກສ່ວນ, ຊຶ່ງສ່ວນຫຼາຍໄດ້ລົງເລິກລາຍງານຜົນສໍາເລັດແຫ່ງການຜັນຂະຫຍາຍ ແລະຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XIV ເຂົ້າໃນແຕ່ລະຂົງເຂດວຽກງານກົມກອງ, ຂະແໜງການຂອງຕົນເອງ, ອັນໄດ້ເຮັດໃຫ້ກອງປະຊຸມມີເນື້ອໃນສົມບູນຄົບຖ້ວນ ແລະໄດ້ດໍາເນີນການປ່ອນບບັດຄັດເລືອກເອົາຄະນະບໍລິຫານງານພັກເມືອງ ຊຸດທີ XV ຊຶ່ງມີຜູ້ຮັບສະໝັກທັງໝົດ 29 ສະຫາຍ, ຍິງ 2 ສະຫາຍ, ໃນນີ້ເລືອກເອົາ 25 ສະ ຫາຍ.

  ກອງປະຊຸມຄັ້ງປະຖົມມະລຶກໄດ້ຕົກລົງເລືອກເອົາສະຫາຍ ໄລສວນ ມິດສຸວັນ ເປັນເລຂາຄະນະບໍລິຫານງານພັກເມືອງ, ສະຫາຍ ເພັງນາ ຈັນທະພອນ ເປັນຮອງ ເລ ຂາ, ສະຫາຍ ໜູເພັດ ຈັນທະມາດ ເປັນຮອງເລຂາ, ທັງເປັນປະທານຄະນະກວດກາພັກເມືອງ, ເລືອກເອົາສະຫາຍ ແກ້ວໄຊ ອິນຖະໜອມ ແລະສະຫາຍ ອ່ວງສີ ອໍາໄພ ແກ້ວສົມພູເປັນຮອງປະທານ.

  ຕອນທ້າຍຂອງກອງປະຊຸມຍັງໄດ້ຮັບຟັງການໂອ້ລົມຂອງສະຫາຍເລຂາພັກແຂວງ, ຊຶ່ງສະຫາຍໄດ້ເນັ້ນໜັກໃຫ້ຄະນະບໍລິຫານງານພັກເມືອງຊຸດໃໝ່ຕ້ອງໄດ້ຄົ້ນຄວ້າ, ເຊື່ອມຊຶມກໍາແໜ້ນ ແລະຜັນຂະຫຍາຍແນວທາງນະໂຍບາຍ, ມະຕິ, ຄໍາສັ່ງ, ນິຕິກໍາຕ່າງໆຂອງຂັ້ນເທິງກໍຄືມະຕິກອງປະຊຸມໃຫຍ່ຄັ້ງທີ XV ໃຫ້ກາຍເປັນອັນລະອຽດ ແລະ ສອດຄ່ອງກັບສະພາບຄວາມເປັນຈິງ ແລະນໍາພາຈັດຕັ້ງປະຕິບັດໃຫ້ມີຜົນສໍາເລັດ, ເພີ່ມທະວີໃນການສຶກສາອົບຮົມໃຫ້ຖັນແຖວພະນັກງານ-ສະມາຊິກພັກ ແລະປະຊາຊົນບັນດາເຜົ່າໃຫ້ມີຄວາມໜັກແໜ້ນທາງດ້ານການເມືອງ, ມີຄວາມເຊື່ອໝັ້ນຕໍ່ການນໍາພາຂອງພັກ, ເສີມຂະຫຍາຍຄວາມສາມັກຄີເປັນປຶກແຜ່ນຂອງປະຊາຊົນ, ຊັ້ນຄົນບັນດາເຜົ່າ, ເຊີດຊູຈິດໃຈຮັກຊາດ, ຮັກບ້ານເກີດເມືອງນອນໃຫ້ສູງຂຶ້ນພ້ອມທັງເສີມຂະຫຍາຍຈິດໃຈເປັນເຈົ້າຕົນເອງເພິ່ງຕົນເອງສ້າງຄວາມຮັ່ງມີເຂັ້ມແຂງດ້ວຍຕົນເອງໃຫ້ເປັນຮູບປະທໍາຫຼາຍຂຶ້ນ.

 ____________

ຂຽນໂດຍ:  ສັນຍາ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์