ຮສສ ອູດົມໄຊ ຕີລາຄາວຽກງານຜ່ານມາ

 ກອງປະຊຸມວິຊາການວຽກງານແຮງງານ ແລະສະຫວັດດີການສັງຄົມປະຈໍາປີ 2019 ແລະການກໍານົດທິດທາງແຜນການ 2020 ຂອງພະແນກ ຮສສ ແຂວງອຸດົມໄຊ ໄດ້ຈັດຂຶ້ນໃນຕອນເຊົ້າວັນທີ 10 ມັງກອນ 2020 ຢູ່ທີ່ຫ້ອງປະຊຸມຂອງພະແນກດັ່ງກ່າວໂດຍການເປັນປະທານຂອງທ່ານ ສົມຟອງ ແສງຈັນທະລາ ຫົວໜ້າພະ ແນກ ຮສສ ແຂວງ, ມີຄະນະພະແນກ, ຫົວໜ້າຫ້ອງການ ຮສສ 7 ເມືອງ, ຫົວໜ້າສູນບໍລິການ ແລະ ຫົວໜ້າຂະແໜງພາຍໃນພະແນກ ຮສສ ເຂົ້າຮ່ວມ.

 ໃນກອງປະຊຸມໄດ້ຮັບຟັງການລາຍງານກ່ຽວກັບຜົນສໍາເລັດໃນການຈັດຕັ້ງປະຕິບັດວຽກງານ ຮສສ ໃນຕະຫຼອດໄລຍະ1 ປີຜ່ານມາ ໃນນັ້ນໄດ້ຍົກໃຫ້ເຫັນເຖິງວຽກງານແຕ່ລະດ້ານໂດຍສະເພາະແມ່ນ ວຽກງານດ້ານການເມືອງແນວຄິດ ເຊິ່ງໄດ້ເອົາໃຈໃສ່ຊີ້ນຳນຳພາຢ່າງ ເປັນປົກກະຕິເຮັດໃຫ້ພະນັກງານ ລັດຖະກອນມີຫຼັກໝັ້ນ, ສິນທໍາປະຕິວັດ, ເຊື່ອໝັ້ນຕໍ່ແນວທາງຂອງພັກ ແລະປະຕິບັດກົດລະບຽບຂອງລັດຢ່າງເຂັ້ມງວດ,ວຽກງານແຮງງານໂດຍສະເພາະແມ່ນການພັດທະນາສີມືແຮງງານໄດ້ທັງໝົດ 4 ພັນກວ່າຄົນ, ຍິງ1.398 ຄົນ ທຽບໃສ່ແຜນການປະຕິບັດໄດ້ລື່ນແຜນ 18%; ການຈັດຫາງານໃຫ້ແຮງງານລາວທັງພາຍໃນ ແລະຕ່າງປະເທດໄດ້ທັງໝົດ 3 ພັນ ກວ່າຄົນ, ຍິງ 1 ພັນ 393 ຄົນ, ການຄຸ້ມຄອງແຮງງານໄດ້ຈັດຕັ້ງປະຕິບັດທັງໝົດ 612 ຄັ້ງ, ເຊິ່ງມີຫົວໜ່ວຍແຮງງານໄດ້ຮັບການກວດກາທັງຫມົດ 612 ຫົວ ໜ່ວຍ, ວຽກງານປະກັນສັງຄົມໄດ້ແຈ້ງເພິີ່ມພະນັກງານບໍານານໃໝ່ຈຳນວນ 106 ທ່ານ,ໄດ້ຮັບຂໍ້ຕົກລົງນະໂຍບາຍ ອຸດໜູນສະມາຊິກຄອບຄົວຈຳນວນ 837 ທ່ານ, ການບໍລິການກອງທຶນ ປະກັນສັງຄົມໄດ້ລົງເຄື່ອນໄຫວ ປະຊາສຳພັນທັງໝົດ 22 ຄັ້ງ, ຂະຫຍາຍອັດຕາການປົກຄຸມປະ ກັນສັງຄົມໄດ້ 337 ຄົນ; ວຽກງານ ອົງການກາແດງໄດ້ປະຕິບັດການ ຊ່ວຍເຫຼືອສຸກເສີນບັນເທົາທຸກ 2 ບ້ານ, ມີ 78 ຄົນ, ຈັດຕັ້ງປະຕິບັດ ວຽກງານສົ່ງເສີມສຸຂະພາບຊຸມ ຊົນໄດ້ 36%, ກໍ່ສ້າງນ້ຳລິນສະອາດໄດ້ 38%, ລະດົມການບໍລິຈາກເລືອດໄດ້ 46 ຄັ້ງ ໄດ້ຮັບການບໍລິຈາກເລືອດທັງໝົດ 1.328 ຖົງ.

   ສ່ວນວຽກງານອື່ນໆໂດຍສະເພາະແມ່ນວຽກງານບໍລິຫານ ແລະແຜນການສັງລວມ, ວຽກງານຈັດຕັ້ງ- ກວດກາກໍໄດ້ເຄື່ອນໄຫວຈັດຕັ້ງປະຕິບັດຕາມພາລະບົດບາດ, ສິດ, ໜ້າທີ່ຂອງຕົນ ເຮັດໃຫ້ມີຜົນ ສຳເລັດຕາມລະດັບຄາດໝາຍ.ຄ່ຽງຄູ່ກັບຜົນງານດັ່ງກ່າວນັ້ນ ເຫັນ ວ່າຍັງມີບາງດ້ານທີ່ຍັງຄົງຄ້າງ ແລະບໍ່ສາມາດຈັດຕັ້ງປະຕິບັດໄດ້ຕາມແຜນການທີ່ກຳນົດໄວ້ ດັ່ງນັ້ນ ກອງປະຊຸມຈຶ່ງໄດ້ຜ່ານຮ່າງທິດ ທາງແຜນການປະຈຳປີ 2020 ແລະໄດ້ພ້ອມກັນມີຄຳຄິດຄຳເຫັນໃສ່ແຜນດັ່ງກ່າວເພື່ອເຮັດໃຫ້ມີເນື້ອສົມບູນຄົບຖ້ວນ ແລະສາມາດນໍາໄປຈັດຕັ້ງປະຕິບັດໃນການປັບປຸງແກ້ໄຂວຽກງານໃນຕໍ່ໜ້າໄດ້ຢ່າງມີປະສິດທິພາບ ແລະໄດ້ຮັບຜົນສໍາເລັດຕາມລະດັບຄາດໝາຍ.

  ນອກຈາກນັ້ນກອງປະຊຸມຍັງໄດ້ສະຫຼຸບຕີລາຄາຜົນສໍາເລັດການຈັດຕັ້ງປະຕິບັດວຽກງານ ຮສສ ແຕ່ລະດ້ານ ໃນໄລຍະ 5 ປີ ຄັ້ງທີ 4 ປີ 2016-2020 ແລະ ຜ່ານຮ່າງທິດທາງແຜນການ 5 ປີຄັ້ງທີ 5 ປີ 2020-2025 ຕື່ມອີກ. 

_____________

ຂຽນໂດຍ: ຄານມະນີ ຮຽນດໍຈັນ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

 

แชร์