ເມືອງພຽງ ຈັດງານເທສະການບຸນກອງເຂົ້າໃຫຍ່ປະຈໍາປີ

  ງານເທສະການບຸນກອງເຂົ້າໃຫຍ່ ເມືອງພຽງ ແຂວງໄຊຍະບູລີ ໄດ້ຈັດຂຶ້ນໃນລະຫວ່າງວັນທີ 9-12 ມັງກອນ 2020 ຢູ່ທີ່ບ້ານສົມສະຫວັນ ເມືອງພຽງ, ໃຫ້ກຽດ ເຂົ້າຮ່ວມມີທ່ານ ຍັນຍົງ ສີປະເສີດ ຮອງເຈົ້າແຂວງໄຊຍະບູລີ, ມີການນໍາຂອງແຂວງ ຂອງເມືອງ, ແຂກພາຍໃນ ແລະ ຕ່າງປະເທດພ້ອມດ້ວຍນັກທຸລະກິດຜູ້ປະກອບການ ແລະພໍ່ແມ່ປະຊາຊົນບັນດາເຜົ່າຊາວເມືອງພຽງເຂົ້າຮ່ວມ.

 ທ່ານ ເສີດ ແສງສຸລິນ ເຈົ້າເມືອງໆພຽງ ໄດ້ກ່າວເປີດງານວ່າ: ການຈັດງານເທສະການບຸນກອງເຂົ້າໃຫຍ່ປີ 2020 ນີ້ຖື ວ່າເປັນຄັ້ງທີ 10, ເວົ້າລວມກໍ່ເພື່ອເປັນການຈັດຕັ້ງປະຕິບັດໂຄງການດໍາເນີນງານຂອງຄະນະບໍລິຫານງານພັກເມືອງ ປີ 2020 ໂດຍໄດ້ຕິດພັນກັບຍຸດທະສາດຂອງເມືອງພຽງທີ່ວ່າ: “ສ້າງເມືອງພຽງເປັນເມືອງຜະລິດສະບຽງອາຫານ, ຕິດພັນກັບການປຸງແຕ່ງສົ່ງອອກ, ພັດທະນາການບໍລິການທາງຜ່ານ ແລະການທ່ອງທ່ຽວທີ່ເປັນມິດກັບສິ່ງແວດລ້ອມ” ອີກດ້ານໜຶ່ງກໍ່ເພື່ອເປັນການປັບປຸງ ແລະເສີມຂະ ຫຍາຍມູນເຊື້ອວັດທະນະທໍາຮີດ ຄອງປະເພນີອັນດີງາມຂອງຊາດ, ຂອງທ້ອງຖິ່ນ, ສ້າງໃຫ້ເປັນໜຶ່ງ ເມືອງໜຶ່ງຜະລິດຕະພັນໃຫ້ມີຫຼາກຫຼາຍກິດຈະກໍາເພື່ອດຶງດູດນັກທ່ອງທ່ຽວ,ປຸກລະດົມແນວຄິດຂອງປະຊາຊົນບັນດາເຜົ່າໃນການພັດທະນາ, ສົ່ງເສີມການຜະລິດເປັນສິນ ຄ້າ, ສ້າງໂອກາດ ແລະຊື່ສຽງ ຂອງເມືອງພຽງເພື່ອເຮັດໃຫ້ງານເທສະການກອງເຂົ້າໃຫຍ່ນີ້ຍົກລະດັບຂຶ້ນໄປຄຽງຄູ່ກັບຄວາຮຽກຮ້ອງຕ້ອງການຂອງການພັດທະນາເສດຖະກິດ-ສັງຄົມໃນໄລຍະໃໝ່ໃນປະເທດເຮົາ.

ງານຄັ້ງນີ້ມີຫຼາກຫຼາຍກິດຈະກໍາເຊັ່ນ: ຂະບວນແຮ່ເຂົ້າເປືອກເຂົ້າສານ ແລະຖວາຍສັງຄະທານ, ສູດປະລິຕະມຸງຄຸນສູ່ຂວັນເຂົ້າ, ການປະກວດທິດາກອງເຂົ້າໃຫຍ່, ການສະແດງສີລະປະວັນນະຄະດີບັນດາເຜົ່າພາຍໃນເມືອງ,ປະກວດນັກຮ້ອງສຽງດີ,ຂະບວນແຮ່ກ້ອນກໍາລັງມວນຊົນບັນດາເຜົ່າມີ 25 ກ້ອນມີຈໍານວນພົນທັງໝົດ 4.000 ກວ່າຄົນ, ການວາງສະແດງສິນຄ້າຈາກລາວ, ຫວຽດນາມ, ໄທ 39 ຮ້ານ, ຜະລິດຕະພັນກະສິກໍາ-ຫັດຖະກໍາຈາກປະຊາຊົນຈໍານວນ 18 ຮ້ານ, ນອກນີ້ໃນງານບຸນດັ່ງກ່າວຍັງໄດ້ມອບໃບຢັ້ງຢືນໃຫ້ບ້ານພັດທະນາສີມືແຮງງານ ແລະ ສະຫວັດດີການສັງຄົມດີຈໍານວນ 5 ບ້ານທີ່ຖືກຮັບຮອງໃໝ່ຄື: ບ້ານນາບວມ, ນາຕານ, ນາຊິງ, ໂພນສະອາດ ແລະບ້ານໂພນຫີນ.

__________

ຮຽບຮຽງໂດຍ: ບຸນທີ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์