ພູຜາຮຸ້ງແຫຼ່ງທ່ອງທ່ຽວທໍາມະຊາດທີ່ໜ້າສໍາຜັດ

   ແຂວງບໍ່ແກ້ວເປັນອີກໜຶ່ງຈຸດໝາຍປາຍທາງດ້ານການທ່ອງທ່ຽວທີ່ມີຄວາມໂດດເດັ່ນທາງດ້ານທຳມະຊາດ, ປະຫວັດສາດ ແລະວັດທະນະທໍາເພາະອຸດົມສົມບູນໄປດ້ວຍຊັບພະຍາກອນທຳມະຊາດທີ່ຫຼາກຫຼາຍສຳຄັນຍັງມີສະຖານທີ່ຄອຍໃຫ້ນັກທ່ອງທ່ຽວໄດ້ທ່ຽວຊົມບໍ່ວ່າຈະເປັນທາງວັດທະນະທຳປະຫວັດສາວ ແລະທຳມະຊາດອັນເປັນທີ່ນິຍົມຂອງຜູ້ຄົນທາງພາຍໃນ ແລະຕ່າງປະເທດໂດຍສະເພາະແມ່ນພູຜາຮຸ້ງເປັນແຫຼ່ງທ່ອງທ່ຽວທາງທຳມະຊາດມາແຕ່ໃດໆຊຶ່ງຕັ້ງຢູ່ ທ່າມກາງປ່າດົງເຍືອກເຢັນມີຕົ້ນໄມ້ ແລະຊີວະນາໆພັນທີ່ອຸດົມສົມບູນ.

   ພູຜາຮຸ້ງຕັ້ງຢູ່ຕີນພູຜາແດງ ແລະພູໂອໃກ້ກັບສາຍນ້ຳຍອນຕາມການບອກເລົ່າໃນສະໄໝກ່ອນມີພະຍາຮຸ້ງສອງຜົວເມຍມາອາໄສຢູ່ເທິງພູຜາຮຸ້ງເພື່ອອາໄສຊອກກິນສັດນ້ອຍໃຫຍ່ຢູ່ເຂດນັ້ນ, ບາງຄັ້ງກໍ່ກິນຮອດມະນຸດ, ມີນິດໄສຮ້າຍ, ເດືອດຮ້ອນຮອດພະຍາແຖນຢູ່ເທິງຟ້າ, ພະຍາແຖນຈຶ່ງເອີ້ນເອົາພະຍາຮຸ້ງສອງຜົວເມຍນັ້ນມາກ່າວເຕືອນຫຼາຍຄັ້ງແຕ່ກໍ່ບໍ່ຍອມເຊື່ອຟັງ. ພະຍາແຖນໃຈຮ້າຍຈິ່ງສາບໃຫ້ພະຍາຮຸ້ງສອງໂຕດັ່ງກ່າວໃຫ້ກາຍເປັນຫີນ. ແຕ່ເຖິງຈະເປັນຫີນກໍ່ຕາມວິນຍານຂອງພະຍາຮຸ້ງທີ່ສິງຢູ່ກໍ່ຍັງຄົງຄວາມດຸຮ້າຍ. ເມື່ອໃດມີຄວາມຫີວໂຫຍກໍ່ເປັ່ງສຽງຮ້ອງອອກມາຢ່າງແຮງຈົນໄດ້ຍິນໄປທົ່ວບໍລິເວນແລ້ວແກວ່ງຫົວໄປມາ, ເມື່ອໃດຫົວພະຍາຮຸ້ງປີ່ນໜ້າໄປທາງທິດໃດຜູ້ຄົນຢູ່ທາງທິດນັ້ນຕ້ອງມີການຕາຍເກີດຂຶ້ນ ແລະຝູງສັດທີ່ຢູ່ແຖວນັ້ນກໍ່ແຕກຕື່ນໜີໄປໝົດ, ຍ້ອນແນວນັ້ນພະຍາແຖນຜູ້ປົກປັກຮັກສາທ້ອງຖິ່ນນັ້ນຈຶ່ງເຮັດໃຫ້ເກີດມີຟ້າຜ່າໃສ່ຫີນພະຍາຮຸ້ງໂຕຜົວມຸ່ນທະລາຍລົງຕີນພູ, ຍັງຄົງເຫຼືອແຕ່ນາງຮຸ້ງຕົວເມຍຈັບງອຍຜາຫີນໂຕດຽວດ້ວຍຄວາມໂສກເສົ້າອາໄລອາວອນຫາພະຍາຮຸ້ງຜູ້ເປັນຜົວ. ຫຼັງຈາກຟ້າຜ່າພະຍາຮຸ້ງແລ້ວເຫດການທັງໝົດກໍ່ຢຸດຕິລົງ.

   ປະຈຸບັນຍັງມີຮຸ້ງນ້ອຍສອງຜົວເມຍປາກົດຢູ່ບໍລິເວນພູຜາຮຸ້ງແຫ່ງນີ້, ມັນມັກອອກມາບິນຫຼິ້ນໃນມື້ວັນສິນ, ເມື່ອປະຊາຊົນໄດ້ພົບເຫັນກໍ່ບໍ່ກ້າທຳລາຍຫຼື ນຳມາເປັນອາຫານຂອງຕົນເພາະຢ້ານກົວສິ່ງສັກສິດ. ນອກນັ້ນຈອມພູຜາຮຸ້ງເປັນຈຸດຊົມວິວທີ່ມີຄວາມສວຍງາມເວລາເຮົາເບິ່ງລົງມາຈາກມຸມສູງສາມາດເຫັນປ່າດົງກວ້າງໃຫຍ່ທີ່ຂຽວສົດງົດງາມ, ໜ່ວຍພູນ້ອຍໃຫຍ່ທີ່ສະລັບຊັບຊ້ອນກັນເປັນຫຼັນ, ມີອາຍໝອກປົກຄຸມໃນຍາມເຊົ້າ ແລະສາມາດເບິ່ງເຫັນໝູ່ບ້ານຂອງປະຊາຊົນໄດ້ເປັນຢ່າງດີ.

   ພູຜາຮຸ້ງຖືວ່າເປັນສະຖານທີ່ທ່ອງທ່ຽວທີ່ມີຊື່ສຽງ ແລະໄດ້ຮັບຄວາມນິຍົມຈາກນັກທ່ອງທ່ຽວພາຍໃນ ແລະຕ່າງປະເທດເປັນຈຳນວນຫຼວງຫຼາຍເຮັດໃຫ້ພູຜາຮຸ້ງມີຊື່ສຽງໂດງດັງ ແລະທ່ານໃດທີ່ໄດ້ໄປແຂວງບໍ່ແກ້ວກໍຢ່າລືມໄປສຳຜັດກັບທິວທັດທໍາມະຊາດອັນສວຍສົດງົດງາມຂອງພູດັ່ງກ່າວເຊື່ອວ່າທ່ານຈະປະທັບໃຈກັບບັນຍາກາດອັນສົດຊື່ນຈົນອົດບໍ່ໄດ້ທີ່ຈະຖ່າຍຮູບງາມໆເພື່ອເກັບໄວ້ເປັນທີ່ລະນຶກຢູ່ແຂວງບໍ່ແກ້ວຍັງມີສະຖານທີ່ທ່ອງທ່ຽວອີກຫຼາຍແຫ່ງທີ່ສວຍງາມ ແລະໜ້າປະທັບໃຈຊຶ່ງຈະມີແຫ່ງໃດແດ່ນັ້ນໃນຄັ້ງຕໍ່ໄປຈະນຳສະເໜີໃຫ້ທ່ານຮູ້ຈັກຕື່ມອີກ.

แชร์