ສາລະວັນປະກາດ 26 ບ້ານ ເປັນບ້ານໜັກແໜ້ນເຂັ້ມແຂງ

  ເມືອງສາລະວັນ ໄດ້ປະກາດ 26 ບ້ານ ເປັນໜັກແໜ້ນເຂັ້ມແຂງ ແລະ 5 ບ້ານວັດທະນະທຳໃໝ່ຄື: ບ້ານໂພນທັນ, ເລີນສຳພັນ, ຕົ້ງວິໄລ,ນາດອນຂວາງ,ໂຄກໃໝ່, ໝາກນາວໃຫຍ່, ຄັນຈົມ, ສອງຄອນ, ໂຄກເກົ່າ, ແກ້ງເມືອງລາວ, ດົງໜ້ອງ, ນາທານກ້ວຍ, ສະໂປນ, ໂພນຕານ, ກະຊະໃຫຍ່, ສູງ, ໂພນບົກ, ລະວາງ, ນາແພງໃຫຍ່, ຄຽງໂຄ້ງ, ນາຕຶມ, ນາໄຊນ້ອຍ, ດອນຂາວ, ແສນວັງນ້ອຍ, ນາທ່ອນ ແລະບ້ານແບ່ງອຸດົມ, ຂຶ້ນໃນວັນ ທີ 7 ມັງກອນ 2020 ຢູ່ທີ່ບ້ານກະຊະໃຫຍ່ໂດຍ ເປັນປະທານຂອງທ່ານ ບຸນມາກ ພອນທິບສະຫວັດ ປະທານກວດກາພັກ-ລັດເມືອງ, ທ່ານນາງ ບຸນຖັນ ແກ້ວມາລາ ຫົວໜ້າຫ້ອງການພາຍໃນເມືອງ, ມີຫົວໜ້າພະແນກຮອງພະແນກ, ທ່ານຫົວໜ້າຫ້ອງການ-ຮອງຫ້ອງການອ້ອມຂ້າງເມືອງ, ເລຂາໜ່ວຍພັກ-ນາຍບ້ານຕະຫຼອດຮອດການຈັດຕັ້ງບ້ານ 26 ບ້ານເຂົ້າຮ່ວມ.

  ທ່ານ ແສງສຸລະຈັນ ພິມມະວັນ ເລຂາໜ່ວຍພັກ-ນາຍບ້ານກະຊະໃຫຍ່ຕາງໜ້າອົງການປົກຄອງບ້ານທັງ 26 ບ້ານ ໄດ້ລາຍງານການຈັດຕັ້ງປະຕິບັດບ້ານໜັກແໜ້ນເຂັ້ມແຂງໃນໄລຍະຜ່ານມາແມ່ນໄດ້ເອົາໃຈໃສ່ປະຕິບັດແຕ່ລະບາດກ້າວ, ຂັ້ນຕອນ, ໂດຍການໂຄສະນາ, ສຶກສາອົບຮົມການເມືອງແນວຄິດ, ປຸກລະດົມຂົນຂວາຍຢ່າງເປັນຂະບວນ ແລະ ຕໍ່ເນື່ອງຕາມ 3 ທິດນຳ ແລະ 10 ມາດຖານຂອງການສ້າງບ້ານໜັກແໜ້ນເຂັ້ມແຂງເປັນຕົ້ນ: ຮັບປະກັນຄວາມເປັນເອກະພາບຖືກຕ້ອງຕາມກົດໝາຍ ແລະລະບຽບການ, ຮັກສາໄດ້ຄວາມສະຫງົບ, ຄວາມເປັນລະບຽບຮຽບຮ້ອຍ ແລະຄວາມສາມັກຄີ, ຈັດຕັ້ງປະຕິບັດໃຫ້ມີລັກສະນະຕໍ່ເນື່ອງ ແລະມີສະຖຽນລະພາບ, ອົງ ການປົກຄອງບ້ານມີ  5 ໜ່ວຍງານຊ່ວຍວຽກບ້ານ, ມີການປະກອບບຸກຄະລາກອນຕາມລະບຽບການ, ມີລະບຽບວິໄນການຄຸ້ມຄອງບ້ານ, ມີ ຫ້ອງການບ້ານຖາວອນ, ການປະຈຳການຂອງອົງການປົກຄອງບ້ານເປັນປົກກະຕິ,ມີແຜນພັດທະນາຂອງບ້ານ, ມີລາຍຮັບສາມາດຈ່າຍຄ່າບໍລິຫານປົກກະຕິ, ມີການເຊື່ອມທະບຽນການເກີດຢ່າງ ໜ້ອຍ 80% ແລະມີການບໍລິການຂອງອົງການປົກຄອງບ້ານ.

 ຈາກນັ້ນໃນພິທີກໍ່ໄດ້ຜ່ານຂໍ້ຕົກລົງສະບັບເລກທີ 05/ຈມ.ສວ ສາລະວັນ, ລົງວັນທີ 6 ມັງກອນ 2020 ວ່າດ້ວຍການອະນຸມັດປະກາດ 26 ບ້ານເປັນບ້ານໜັກແໜ້ນເຂັ້ມແຂງ ປີ 2019 ແລະ ຜ່ານຂໍ້ຕົກລົງມອບໃບຢັ້ງຢືນບ້ານວັດທະນະທຳ 5 ບ້ານ ພ້ອມທັງມອບໃບຢັ້ງຢືນໃຫ້ແກ່ 26 ບ້ານເປັນບ້ານໜັກແໜ້ນເຂັ້ມແຂງ, ໂດຍເປັນກຽດມອບໃບຢັ້ງຢືນຂອງທ່ານ ບຸນມາກ ພອນທິດສະຫວັດ ປະທານກວດກາພັກ-ລັດເມືອງ ແລະທ່ານນາງ ບຸນຖັນ ແກ້ວມາລາ ຫົວໜ້າຫ້ອງການພາຍໃນເມືອງ.

______________

ຂຽນໂດຍ:  ທິດລານີ ໂຄດໂຍທາ  
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์