ໂຮງຮຽນ ມສ ຫວ້ຍຂຸມ ບໍລິຈາກເລືອດ

  ວັນທີ 9 ມັງກອນ ຜ່ານມາທີມງານອົງການກາແດງ ແຂວງອຸດົມໄຊ ນໍາໂດຍທ່ານ ສັງທອງ ສັນຕິສຸກ ຫົວໜ້າສູນເລືອດປະຈຳ ແຂວງອຸດົມໄຊ ໄດ້ລົງເຄື່ອນໄຫວຮັບບໍລິຈາກເລືອດທີ່ໂຮງຮຽນມັດທະຍົມສົມບູນຫ້ວຍຂຸມ ເມືອງໄຊ ແຂວງອຸດົມໄຊ ຊຶ່ງມີທ່ານ ທອງຈັນ ໄຊລືຕາ ຫົວໜ້າອົງການກາແດງ ແຂວງອຸດົມໄຊ, ຄະນະອໍານວຍການໂຮງຮຽນ, ຄູ-ອາຈານ ແລະນ້ອງນັກຮຽນພາຍໃນໂຮງຮຽນດັ່ງກ່າວເຂົ້າຮ່ວມ.

ການລົງເຄື່ອນໄຫວຮັບບໍລິຈາກເລືອດໃນຄັ້ງນີ້ກໍເພື່ອຈັດຕັ້ງປະຕິບັດຕາມພາລະບົດບາດ,ສິດໜ້າທີ່ ແລະທິດທາງແຜນການຂອງຕົນກໍຄືຈຳນວນຕົວເລກລວມຂອງເລືອດທີ່ສະພາປະຊາຊົນ ແຂວງ ແລະສູນເລືອດແຫ່ງຊາດ ໄດ້ກຳນົດໄວ້ໃຫ້ສຳເລັດຕາມລະດັບຄາດໝາຍ, ນອກນັ້ນຍັງເປັນການຕອບສະໜອງເລືອດໃຫ້ກັບ ບັນດາຄົນເຈັບຢູ່ໂຮງໝໍທີ່ຕ້ອງ ການໃສ່ເລືອດໃຫ້ພຽງພໍ, ສ່ວນ ການບໍລິຈາກເລືອດຂອງນ້ອງນັກຮຽນກໍເພື່ອປະກອບສ່ວນສຳຄັນ ໃນການຊ່ວຍເຫຼືອຊີວິດຂອງເພື່ອນມະນຸດດ້ວຍກັນໃນສັງຄົມທັງເປັນການສ້າງບຸນກຸສົນທີ່ຍິ່ງໃຫຍ່ ແລະ ເຫັນຜົນຕົວຈິງຕື່ມອີກ, ໃນນັ້ນມີນັກຮຽນທີ່ສົນໃຈ ແລະເຂົ້າສະໝັກຮັບບໍລິຈາກເລືອດທັງໝົດ 15 ຄົນ, ຍິງ 4 ຄົນ ແຕ່ຜ່ານມາດຖານເງື່ອນໄຂ, ການກວດເຊັກສຸຂະພາບຂອງທ່ານໝໍ ແລະໄດ້ ບໍລິຈາກຕົວຈິງຈຳນວນ 14 ຄົນ, ຍິງ 3 ຄົນ ແລະໄດ້ເລືອດ 14 ຖົງ.

 ໂອກາດດັ່ງກ່າວກໍໄດ້ມີພິທີມອບໃບຍ້ອງຍໍໃຫ້ກັບກົມກອງລວມໝູ່ກໍຄືມອບໃຫ້ໂຮງຮຽນ ມສ ຫວ້ຍຂຸມ ທີ່ໄດ້ປະກອບສ່ວນໃນການອຳນວຍຄວາມສະດວກໃຫ້ກັບອົງການກາແດງລົງເຄື່ອນໄຫວຮັບບໍລິຈາກເລືອດ ແຕ່ລະຄັ້ງລວມທັງມອບໃຫ້ກັບບຸກຄົນທີ່ໄດ້ຮ່ວມບໍລິຈາກເລືອດໂດຍຕະຫຼອດມາ, ຊຶ່ງໃຫ້ກຽດມອບໂດຍທ່ານ ທອງຈັນ ໄຊລືຕາຫົວໜ້າອົງການກາແດງແຂວງອຸດົມໄຊ.

____________

ຂຽນໂດຍ: ຄານມະນີ ຮຽນດໍຈັນ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์