ມອບ-ຮັບ ທຸງໄຊນໍາໜ້າຂະບວນການຂໍ້ແຂ່ງຂັນ 4 ບຸກ

   ວັນທີ 8 ມັງກອນ 2020 ທີ່ກະຊວງຕ່າງປະເທດໄດ້ຈັດພິທີມອບ-ຮັບ ທຸງໄຊນໍາໜ້າຂະບວນການຂໍ້ແຂ່ງຂັນ 4 ບຸກ ໃຫ້ແກ່ຄະນະຊາວໜຸ່ມປະຊາຊົນປະຕິວັດລາວກະຊວງການຕ່າງປະເທດ, ມີສະຫາຍ ທອງສະຫວັນ ພົມວິຫານ ຮອງລັດຖະມົນຕີກະຊວງການຕ່າງປະເທດ, ສະຫາຍນາງ ວິລະວອນພັນທະວົງ ປະທານກວດກາພັກ-ລັດ ຮອງເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ແລະທ່ານ ອານຸພາບ ວົງໜໍ່ແກ້ວ ເລຂາຄະນະບໍລິຫານງານຊາວໜຸ່ມກະຊວງການຕ່າງປະເທດ ແລະພາກສ່ວນກ່ຽວຂ້ອງເຂົ້າຮ່ວມ.

  ທ່ານ ອານຸພາບ ວົງໜໍ່ແກ້ວ ໃຫ້ຮູ້ວ່າ: ໃນໄລຍະຜ່ານມາຄະນະຊາວໜຸ່ມ ປປລ ກະຊວງການຕ່າງປະເທດໄດ້ປະຕິບັດຂໍ້ແຂ່ງຂັນ 4 ບຸກທີ່ສູກາງຊາວໜຸ່ມ ປປລ ວາງອອກໂດຍພາຍໃຕ້ການຊີ້ນໍາໆພາຢ່າງໃກ້ຊິດຂອງຄະນະພັກກະຊວງ ແລະຄະນະນໍາຂອງສູນກາງຊາວໜຸ່ມ ປປລ, ພ້ອມທັງປະກອບສ່ວນໃນການຜັນຂະຫຍາຍ ເນື້ອໃນມະຕິກອງປະຊຸມຜູ້ແທນຊາວໜຸ່ມທົ່ວປະເທດສະໄໝທີ VII ຄຽງຄູ່ກັບວຽກງານວິຊາສະເພາະໄດ້ໃຫ້ຄວາມສໍາຄັນການເຄື່ອນໄຫວຂອງວຽກງານຊາວໜຸ່ມເປັນຕົ້ນແມ່ນປະຕິບັດຂໍ້ແຂ່ງຂັນ 4 ບຸກຂອງຊາວໜຸ່ມປະຊາຊົນປະຕິວັດລາວ, ໃນໄລຍະການປະຕິບັດຂໍ້ແຂ່ງຂັນດັ່ງກ່າວຄະນະຊາວໜຸ່ມກະຊວງການຕ່າງປະເທດໄດ້ເອົາໃຈໃສ່ ແລະໜັກແໜ້ນໃນການແຂ່ງຂັນຈົນໄດ້ຮັບນາມມະຍົດຊາວໜຸ່ມ ປປລ 4 ບຸກ ເຖິງ 3 ສະໄໝຕິດຕໍ່ກັນ ຊຶ່ງປະກອບມີ: ບຸກດ້ານການເມືອງ-ແນວຄິດ, ບຸກດ້ານການຝຶກຝົນຫຼໍ່ຫຼອມການຮຽນ, ບຸກດ້ານການຈັດຕັ້ງ ແລະ ບຸກດ້ານວິຊາສະເພາະຕາມມາດຕະຖານ ແລະເງື່ອນໄຂຂອງສູນກາງຊາວໜຸ່ມ ປປລ ວາງອອກ, ຜົນງານດັ່ງກ່າວລ້ວນແຕ່ເປັນການປະກອບສ່ວນຂອງຊາວໜຸ່ມແຕ່ລະໜ່ວຍພ້ອມດ້ວຍສະມາຊິກທຸກຄົນທີ່ມີຄວາມສາມັກຄີເປັນເອກະພາບກັນປະຕິບັດຂໍ້ແຂ່ງຂັນ 4 ບຸກຢ່າງຕັ້ງໜ້າ.

 ໂອກາດດັ່ງກ່າວສະຫາຍ ທອງສະຫວັນ ພົມວິຫານ ໄດ້ຮຽກຮ້ອງໃຫ້ຊາວໜຸ່ມໃນຂະແໜງການຕ່າງປະເທດເອົາໃຈໃສ່ເຮັດວຽກງານການເມືອງ-ແນວຄິດໃຫ້ເຂັ້ມ ແຂງຂຶ້ນເພື່ອສຶກສາອົບຮົມໃຫ້ສະມາຊິກຊາວໜຸ່ມໃຫ້ກໍາແໜ້ນເຊື່ອມຊຶມແນວທາງປ່ຽນແປງໃໝ່ອັນຖືກຕ້ອງ ແລະມີຫຼັກການຂອງພັກ,ເສີມຂະຫຍາຍນໍ້າໃຈຮັກຊາດເປັນເຈົ້າຕົນເອງບົນພື້ນຖານຍືດໝັ້ນເສັ້ນທາງກ້າວຂຶ້ນສັງຄົມນິຍົມ, ເພີ່ມທະວິຄວາມສາມັກຄີເອກະພາບພາຍໃນພັກ ແລະການຈັດຕັ້ງທຸກຂັ້ນ, ຮັບປະກັນຄວາມສະຫງົບ ແລະມີສະຖຽນລະພາບໃນທຸກດ້ານ,ສືບຕໍ່ສ້າງບາດກ້າວບຸກທະລຸຢ່າງແຂງແຮງກວ່າເກົ່າ ແລະສືບຕໍ່ປັບປຸງກົນຈັກການຈັດຕັ້ງ, ແບບແຜນການຊີ້ນໍາໆພາຂອງຄະນະບໍລິຫານງານຊາວໜຸ່ມກະຊວງຕ່າງປະເທດໂດຍເຮັດໃຫ້ເປັນລະບົບ, ເຂັ້ມແຂງ ແລະສາມາດຊີ້ນໍາການເຄື່ອນໄຫວວຽກງານຊາວໜຸ່ມໄດ້ຢ່າງເໝາະສົມ, ມີປະສິດທິພາບ ແລະຕອບສະໜອງໄດ້ຄວາມຮຽກຮ້ອງຕ້ອງການຕົວຈິງຂອງໜ້າທີ່ການເມືອງຂະແໜງການຕ່າງປະເທດ.

_____________

ຂຽນໂດຍ: ວົງມະນີ   
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์