1 ປີຜ່ານມາ ແຂວງສາລະວັນ ສາມາດຍາດໄດ້ຜົນສຳເລັດຫຼາຍດ້ານ

 ທ່ານ ບົວທອງ ຄຸນຍອດປັນຍາ ຮອງເລຂາພັກແຂວງຮອງເຈົ້າແຂວງສາລະວັນລາຍງານຮ່າງຕີລາຄາການນຳພາຮອບດ້ານຂອງຄະນະບໍລິຫານງານພັກແຂວງຕໍ່ກອງປະ ຊຸມຄົບຄະນະບໍລິຫານງານພັກ ແຂວງສາລະວັນ ເປີດກວ້າງຄັ້ງທີ 11 ສະໄໝທີ 8 ໃຫ້ຮູ້ວ່າ: ເຖິງແມ່ນວ່າໃນໜຶ່ງປີຜ່ານມາແຂວງສາລະວັນໄດ້ຮັບຜົນກະທົບຢ່າງໜັກໜ່ວງຈາກໄຟນໍ້າຖ້ວມ ແລະພະຍາດອະຫິວາອາຟຣິກາ, ລະບາດຢ່າງໜັກກໍ່ຕາມຄະນະພັກແຕ່ລະຂັ້ນກໍ່ໄດ້ເອົາໃຈໃສ່ສືບຕໍ່ປະຕິບັດໜ້າທີ່ຢ່າງຕັ້ງໜ້າດ້ວຍຄວາມຮັບຜິດ ຊອບສູງເອົາໃຈໃສ່ຊີ້ນຳໆພາການຝຶກອົບຮົມ, ເຜີຍແຜ່ເຊື່ອມຊຶມວຽກງານ ປກຊ-ປກສ ໃຫ້ແກ່ປະຊາຊົນ, ກຳລັງກອງຫຼອນ, ປກສ ບ້ານຕິດພັນກັບການສ້າງບ້ານປ້ອງ ກັນຊາດ-ປ້ອງກັນຄວາມສະຫງົບ, ຫັນເອົາກຳລັງ ປກຊ-ປກສ ຂັ້ນແຂວງ,ຂັ້ນເມືອງລົງກໍ່ສ້າງຮາກຖານບ້ານທີ່ມີຄວາມຫຍຸ້ງຍາກ-ຫຼໍ່ແຫຼມ, ດຳເນີນການແກ້ໄຂບັນຫາຢາເສບຕິດ, ຂີ້ລັກງັດແງະ ແລະປາກົດການຫຍໍ້ທໍ້ອື່ນໆຕໍ່ກັບສະພາບການດັ່ງກ່າວໄດ້ເຮັດໃຫ້ສັງຄົມມີຄວາມສະຫງົບ ແລະເປັນຮຽບຮ້ອຍໂດຍພື້ນຖານ.

 ວຽກງານການລົງທຶນປະຕິບັດໄດ້ 1 ພັນກວ່າຕື້ກີບ ໃນນັ້ນການລົງທຶນຂອງລັດປະຕິບັດໄດ້ 49,76 ຕື້ກີບ, ເທົ່າກັບ 100%, ທຶນ ຊ່ວຍເຫຼືອ-ກູ້ຢືມ 9,91 ລ້ານໂດ ລາ, ເທົ່າກັບ 74,12% ຂອງ ແຜນການປີ, ທຶນເອກະຊົນພາຍ ໃນ ແລະຕ່າງປະເທດປະຕິບັດໄດ້ 616,72 ຕື້ກີບ ເທົ່າກັບ 82,22% ຂອງແຜນການປີ ແລະທຶນປະ ຊາຊົນສົມທົບ 79,32 ຕື້ກີບ, ເທົ່າກັບ 93%, ຈັດເກັບລາຍຮັບເຂົ້າງົບປະມານປະຕິບັດໄດ້ 165,66 ຕື້ກີບ ແລະລາຍຈ່າຍປະຕິບັດໄດ້ 417 ຕື້ກີບ, ນອກຈາກນັ້ນກໍ່ຍັງໄດ້ສ້ອມແປງຄອງເໝືອງ-ຊົນລະປະທານທີ່ໄດ້ຮັບຜົນກະທົບຈາກໄພນໍ້າຖ້ວມມູນຄ່າ 3,7 ຕື້ກີບ ຈຳນວນ 31 ໂຄງການ, ການຂະຫຍາຍຕາຄ່າຍໄຟຟ້າລົງສູ່ເຂດຊົນນະບົດ, ຫ່າງໄກສອກຫຼີກ.

 ມາຮອດປະຈຸບັນທົ່ວແຂວງໄດ້ຊົມໃຊ້ໄຟຟ້າກວມ 92,7% ຂອງຫຼັງຄາເຮືອນທັງໝົດ, ຂົງເຂດວັດທະນະທຳ-ສັງຄົມກໍ່ໄດ້ເອົາໃຈໃສ່ໃນການຍົກລະດັບການຮຽນ-ການສອນໃຫ້ແກ່ຄູ ແລະ ນັກຮຽນເຮັດໃຫ້ອັດຕາການສອບເສັງຈົບຊັ້ນປະຖົມບັນລຸ 95%, ມັດທະຍົມຕົ້ນ 97% ແລະ ມັດທະຍົມຕອນປາຍ  ບັນລຸ 96%, ການສັກຢາກັນພະຍາດກວມ 65%, ໄດ້ເອົາໃຈໂຄສະນາດຶງດູດນັກ ທ່ອງທ່ຽວພາຍໃນ ແລະຕ່າງປະເທດໃຫ້ເຂົ້າມາທ່ຽວຊົມແຫຼງທ່ອງທ່ຽວ  ຕ່າງໆໄດ້111.790 ຄົນ ແລະສາມາາດສ້າງລາຍຮັບໄດ້ປະມານ 15,2 ລ້ານໂດລາສະຫາລັດແລະໄດ້ສຳເລັດການປັບປຸງກົງຈັກການຈັດຕັ້ງ 8 ຕົວເມືອງ, ພ້ອມທັງປະກາດບ້ານໜັກແໜ້ນເຂັ້ມແຂງໄດ 41 ບ້ານຄົ້ນຄວ້າ ແລະແກ້ໄຂຄະດີຕ່າງໆໄດ້ 152 ເລື່ອງ,ເທົ່າກັບ 91%, ສ້າງຄອບຄົວ ແລະບ້ານແບບຢ່າງປະຕິບັດກົດໝາຍໄດ້ 123 ບ້ານ, ມີ 11.983 ຄອບ ຄົວ ແລະວຽກງານ ອື່ນໆຕື່ມອີກ.

 ທິດທາງຕໍ່ໜ້າແມ່ນຈະສືບຕໍ່ເພິ່ມທະວີວຽກງານປ້ອງກັນຊາດ, ປ້ອງກັນຄວາມສະຫງົບເຮັດໃຫ້ສັງຄົມມີຄວາມສະຫງົບ, ປອດໄພ, ສູ້ຊົນເຮັດໃຫ້ເສດຖະກິດຂະຫຍາຍ ຕົວ, ຂຸດຄົ້ນລາຍຮັບເຂົ້າງົບປະມານ 3 ເດືອນໄຫ້ບັນລຸຕາມແຜນງວດ ແລະຄຸ້ມຄອງລາຍຈ່າຍໃຫ້ຖືກຕ້ອງຕາມວິໃນການເງິນ, ຍົກລະດັບການຮຽນ-ການສອນຂອງຄູ ແລະນັກຮຽນໃຫ້ມີຄຸນນະພາບ, ພ້ອມດ້ວຍໂຮງໝໍແຂວງ, ໂຮງໝໍເມືອງ ແລະສຸກສາລາ, ນຳພາຮາກຖານປະຕິບັດຕາມ 4 ເນື້ອໃນ 4 ຄາດໝາຍ ແລະ ສ້າງຕົວແບບ ບ້ານຕ່າງໆ, ແກ້ໄຂຄອບຄົວ, ບ້ານທຸກຍາກໃຫ້ໝົດໄປເທື່ອລະກ້າວ ແລະບັນຫາອື່ນໆ.

----------------

ຂຽນໂດຍ: ສິດຕາ ເພັດວົງສາ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์