ສາລະວັນເສຍຫາຍຈາກໄພພິບັດນໍ້າຖ້ວມ 730 ຕື້ກວ່າກີບ

ອີງຕາມການລາຍາງານຂອງທ່ານ ພູທົງ ຄຳມະນີວົງ ຮອງເຈົ້າແຂວງໆ ສາລະວັນ ປະທານຄະນະກຳມະທິການປ້ອງກັນ ແລະຄອບຄຸມໄພພິບັດຂັ້ນແຂວງທີ່ໄດ້ລາຍງານຕໍ່ກອງປະຊຸມຄົບຄະນະບໍລິຫານງານພັກແຂວງເປີດກວ້າງຄັ້ງທີ 11 ສະໄໝທີ VIII ນີ້ວ່າ: ແຂວງສາລະວັນປະກອບມີ 8 ເມືອງ, ມີ 579 ບ້ານ ໃນນັ້ນເສຍຫາຍ 219 ບ້ານ, ມີ 35.698 ຄອບຄົວແລະມີພົນລະເມືອງ 139.221 ຄົນ, ມີເນື້ອທີ່ນາຖືກນໍ້າຖວມ 26.447 ເຮັກຕາ, ເນື້ອທີ່ປູກພືດຖືກຖ້ວມ 6.162 ເຮັກຕາ, ໜອງປາຖືກຖວມ 3.031 ໜອງ ແລະມີສັດລ້ຽງຂອງປະຊາຊົນໄດ້ຮັບຜົນ ກະທົບຈຳນວນ 698.750 ໂຕ, ເສຍຫາຍ 135.386 ໂຕ, ຄວາຍມີ 434 ໂຕ, ງົວ 2.005 ໂຕ, ໝູ 3.139 ໂຕ, ແບ້ 711 ໂຕ ແລະສັດປີກ 129.097 ໂຕ, ພື້ນຖານໂຄງລ່າງທີ່ໄດ້ຮັບຜົນກະທົບມີຄື: ເສັ້ນທາງ 135 ເສັ້ນ, ຂົວມີ 60 ແຫ່ງ, ກັນເຈື່ອນ 9 ຈຸດ, ນໍ້າປະປາ 8 ແຫ່ງ, ຊົນລະປະທານ 118 ແຫ່ງ, ຈັກສູບນໍ້າ 51 ເຄື່ອງ, ຝານໍ້າລົ້ນ 22 ແຫ່ງ,ອ່າງເກັບນໍ້າ 11 ແຫ່ງ,ໂຮງຮຽນມີ 197 ແຫ່ງ ແລະສາທາລະ ນະສຸກມີ 9 ໂຄງການ, ລວມມູນຄ່າການ ເສຍຫາຍທັງໝົດ 730,39 ຕື້ກີບ, ໃນ ໂອກາດດຽວກັນນັ້ນກໍ່ໄດ້ຮັບການຊ່ວຍເຫຼືອຈາກພາກສ່ວນຕ່າງໆ ມີທັງໝົດ 519 ພາກສ່ວນ, ມີມູນຄ່າ 8.415 ລ້ານກວ່າກີບໃນນັ້ນເປັນເງິນສົດ 2.464 ລ້ານກວ່າກີບ, ນອກຈາກນັ້ນກໍຍັງໄດ້ຮັບການຊ່ວຍເຫຼືອຈາກປະເທດຫວຽດ ນາມ ມີມູນຄ່າ 1.350 ລ້ານດົງ.

  ທິດທາງຕໍ່ໜ້າສືບຕໍ່ຟື້ນຟູສ້ອມແປງເສັ້ນທາງ, ຂົວ, ກັນເຈື່ອນ, ນໍ້າປະປາ, ຊົນລະປະທານ ແລະປັດໄຈຕ່າງໃນການຜະລິດຂອງພໍ່ແມ່ປະຊາຊົນທາງນີ້ກໍ່ເພື່ອເຮັດໃຫ້ຊີວິດການເປັນຢູ່ດີຂຶ້ນ, ການ ໄປມາສະດວກສະບາຍ, ສືບຕໍ່ປຸກລະດົມ ສ້າງກອງທຶນໃນແຕ່ລະບ້ານ, ຂະຫຍາຍ ຄະນະກຳມະການປ້ອງກັນ ແລະຄອບຄຸມໄພພິບັດໃຫ້ທີທຸກໆບ້ານ, ບ້ານທີ່ມີຄວາມສ່ຽງ, ສ້າງຄັງເກັບມຽນອາຫານ, ວັດຖຸທີ່ຈຳເປັນແຮໄວ້ຊ່ວຍເຫຼືອໃນເວລາສຸກເສີນ ແລະປະສານສົມທົບກັບພາກສ່ວນທີ່ກ່ຽວຂ້ອງຈັດຕັ້ງຝຶກອົບຮົມໃຫ້ພໍ່ແມ່ປະຊາຊົນໃນເຂດທີ່ມີຄວາມສຽງເພື່ອຮັບປະກັນໃນເວລາເກີດໄພພິບັດຕ່າງໆ, ພ້ອມທັງຟື້ນຟູອຸປະກອນທີ່ຈຳເປັນ.

___________

ຂຽນໂດຍ: ສິດຕາ ເພັດວົງສາ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์