ດ່ານສາກົນວັງເຕົ່າເກັບລາຍຮັບໄດ້ 658 ຕື້ກວ່າກີບ

  ໃນສົກປີ 2019 ຜ່ານມາຖືເປັນປີທີ່ມີໝາກຜົນສໍາເລັດຢ່າງງາມສໍາລັບດ່ານສາກົນວັງເຕົ່າ ເມືອງໂພນທອງ ແຂວງຈໍາປາສັກ ທີ່ສາມາດຈັດຕັ້ງປະຕິບັດໜ້າທີ່ໃນການຈັດເກັບລາຍຮັບເຂົ້າງົບປະມານໄດ້ 658 ຕື້ກວ່າກີບ ແລະຖືວ່າເປັນການຈັດຕັ້ງປະຕິບັດທີ່ມີໝາກຜົນສໍາເລັດຕາມແຜນການທີ່ວາງໄວ້.

   ທ່ານ ບຸນຍະເດດ ທອງສະຫວັນ ຫົວໜ້າດ່ານສາກົນວັງເຕົ່າ ເມືອງໂພນທອງ ແຂວງຈໍາປາສັກ, ໄດ້ເປີດເຜີຍຕໍ່ນັກຂ່າວໜັງສືພິມເສດຖະກິດ-ສັງຄົມ ປະຈໍາແຂວງເມື່ອບໍ່ດົນມານີ້ໃຫ້ຮູ້ວ່າ: ດ່ານສາກົນວັງເຕົ່າແມ່ນອົງຄະນະພັກໜຶ່ງທີ່ຢູ່ພາຍໃຕ້ການຊີ້ນໍາໆ ນໍາພາຂອງແຂວງຈໍາປາສັກ, ຊຶ່ງຜ່ານມາໄດ້ເອົາໃຈໃສ່ຊີ້ນໍາໆພາຊີ້ນໍາວຽກ ງານທຸກຂົງເຂດ, ໂດຍສະເພາະແມ່ນວຽກງານປ້ອງກັນຊາດ-ປ້ອງກັນຄວາມສະຫງົບຊຶ່ງໄດ້ເອົາໃຈໃສ່ຕະຫຼອດມາ, ໂດຍສະເພາະແມ່ນໃນໄລຍະກອງປະຊຸມໃຫຍ່ 3 ຂັ້ນຂອງແຂວງ,ໃນນາມເປັນສະຖານທີ່ເຂົ້າ-ອອກຂອງຜູ້ຄົນ ແລະສິນຄ້າ, ຊຶ່ງໄດ້ມີການເປີດກອງປະຊຸມປຶກສາຫາລືກັນເພື່ອເຮັດໃຫ້ທຸກຂົງເຂດພາຍໃນດ່ານເອົາໃຈໃສ່ຕໍ່ໜ້າວຽກດັ່ງກ່າວຮັບປະກັບຄວາມສະຫງົບໃຫ້ໄດ້ 100%.

  ຄຽງຄູ່ກັບວຽກງານດັ່ງກ່າວດ່ານຍັງໄດ້ເອົາໃຈໃສ່ຕໍ່ວຽກງານການຈັດເກັບລາຍຮັບເຂົ້າງົບປະມານ, ຊຶ່ງເຫັນວ່າມາຮອດປະຈຸບັນຂະແໜງທີ່ກ່ຽວຂ້ອງແມ່ນໄດ້ເອົາໃຈໃສ່ຈັດຕັ້ງປະຕິບັດເກັບລາຍຮັບເຂົ້າງົບປະມານແຫ່ງລັດໄດ້ຢ່າງສະໝໍ່າສະເໝີແລະເປັນປົກກະຕິພ້ອມທັງໄດ້ມີການຊຸກຍູ້ບັນດາຜູ້ປະກອບການ, ຫ້າງຮ້ານໃຫ້ພ້ອມພຽງກັນມອບພັນທະເຂົ້າງົບປະມານໃຫ້ຖືກຕ້ອງຕາມລະບຽບກົດໝາຍ,ຊຶ່ງມາຮອດທ້າຍເດືອນທັນວາ 2019ການຈັດເກັບລາຍຮັບແມ່ນສາມາດຈັດຕັ້ງປະຕິບັດໄດ້ກວ່າ97%, ທຽບເປັນມູນຄ່າເຂົ້າງົບປະມານທັງໝົດ 658 ຕື້ກວ່າກີບ, ຄາດວ່າໝົດປີ 2019 ການຈັດຕັ້ງປະຕິບັດການຈັດເກັບລາຍຮັບເຂົ້າງົບປະມານດ່ານສາກົນວັງເຕົ່າແມ່ນສາ ມາດປະຕິບັດໄດ້ຕາມແຜນການທີ່ກໍານົດໄວ້,ຊຶ່ງລາຍຮັບສ່ວນໃຫຍ່ໄດ້ມາຈາກການນໍາເຂົ້ານໍ້າມັນເຊື້ອໄຟ,ຍານພາຫະນະ,ວັດຖຸກໍ່ສ້າງ ແລະສິນຄ້າອື່ນໆອີກຈໍານວນໜຶ່ງ.

  ຫົວໜ້າດ່ານສາກົນວັງເຕົ່າເມືອງໂພນທອງ ແຂວງຈໍາປາສັກ ໄດ້ໃຫ້ຮູ້ຕື່ມວ່າ: ເພື່ອອໍານວຍຄວາມສະດວກສະບາຍໃຫ້ແກ່ສັງຄົມທາງດ່ານແມ່ນໄດ້ເອົາໃຈໃສ່ໃນການສ້ອມແປງຖະໜົນຫົນທາງໃຫ້ດີຂຶ້ນ, ພັດທະນາສະຖານທີ່ໃຫ້ບໍລິການມີຄວາມທັນສະໄໝ, ວ່ອງໄວເພື່ອເອື້ອອໍານວຍຄວາມສະດວກໃນການໄປມາຫາສູ່ຂອງປະຊາຊົນ, ການຂົນສົ່ງສິນຄ້າ, ການຊື້-ຂາຍໃຫ້ມີຄວາມສະດວກສະບາຍຍິ່ງຂຶ້ນ.

_____________

ຂຽນໂດຍ:  ໂພທິຣາຊ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์