ປີ 2019 ດ່ານພາສີສາກົນຂົວມິດຕະພາບ III ເກັບລາຍຮັບໄດ້ລື່ນແຜ່ນການ 4,54%

  ທ່ານ ສົມຫວັງ ສົມຈິນດາ ຫົວໜ້າດ່ານພາສີສາກົນຂົວມິດຕະພາບ III ຄຳມ່ວນ-ນະຄອນພະນົມ ໄດ້ໃຫ້ສຳພາດກ່ຽວກັບການຈັດເກັບລາຍຮັບເຂົ້າງົບປະມານປະຈຳ ປີ 2019 ຕໍ່ສື່ທ້ອງຖິ່ນໃຫ້ຮູ້ວ່າ: ໃນປີ 2019 ດ່ານພາສີຂົວມິດຕະພາບ III ໄດ້ຮັບຕົວເລກມອບໝາຍເກັບລາຍຮັບເຂົ້າງົບປະມານທັງໝົດ 252 ຕື້ກວ່າກີບ,ທຽບໃສ່ປີ 2018 ແມ່ນເພີ່ມຂຶ້ນ 5,73% ກວມເອົາ 63% ການເກັບລາຍຮັບຂອງພູດພາສີພາຍໃນແຂວງ, ຜ່ານການຈັດຕັ້ງປະຕິບັດໝົດປີສາມາດເກັບລາຍຮັບໄດ້ທັງໝົດ 264 ຕື້ກວ່າກີບ ເທົ່າກັບ 104,54% ຂອງແຜນການ, ໃນນັ້ນສະເພາະດ່ານພາສີສາກົນຂົວມິດຕະພາບ III ແມ່ນປະຕິບັດໄດ້262,4 ຕື້ກວ່າກີບ, ດ່ານປະ ເພນີເຮືອໂດຍສານ ທ່າແຂກ 773 ລ້ານກວ່າກີບ, ດ່ານທ້ອງຖິ່ນບ້ານດ່ານເມືອງໜອງບົກ 820 ລ້ານກວ່າກີບ, ດ່ານທ້ອງຖິ່ນປາກນໍ້າຫີນບູນ 157 ລ້ານກວ່າກີບ ແລະດ່ານທ້ອງຖິ່ນບ້ານປາກເປັ່ງ 6 ລ້ານກວ່າກີບ.

   ສາເຫດທີ່ເຮັດໃຫ້ການເກັບລາຍຮັບຂອງດ່ານພາສີຂົວມິດຕະພາບ III ບັນລຸ ແລະ ລື່ນແຜນການແມ່ນຍ້ອນສິນຄ້າໃນບາງປະເພດແມ່ນມີການເພີ່ມຂຶ້ນໂດຍສະເພາະ ແມ່ນຄ່າຊັກພິເສດສົ່ງອອກຫີນເພີ່ມຂຶ້ນ 7,24% ຖ້າທຽບໃສ່ປີຜ່ານມາ, ວັດສະດຸກໍ່ສ້າງເພີ່ມຂຶ້ນ 7,69%, ເຄື່ອງໃຊ້ໄຟຟ້າເພີ່ມຂຶ້ນ 5,20%, ເຄື່ອງອຸປະໂພກ-ບໍ ລິໂພກເພີ່ມຂຶ້ນ 15,43%, ສິນ ຄ້າຕາມສັນຍາອາຊຽນ 40,02%, ສິນຄ້ານຳເຂົ້າເພື່ອສົ່ງອອກ 12,87%, ຄ່າທຳນຽມຜ່ານແດນສາກົນ 8,83%, ຄັງແຮນໍ້າ ມັນເຊື້ອໄຟ 4,9% ແລະອື່ນໆ.

  ຫົວໜ້າດ່ານພາສີສາກົນຂົວມິດຕະພາບ III ໃຫ້ຮູ້ຕື່ມວ່າ: ສໍາລັບແຜນການໃນປີ 2020 ແມ່ນໄດ້ຮັບການມອບໝາຍຕົວເລກຈັດເກັບລາຍຮັບຈຳນວນ 293 ຕື້ກີບ, ທຽບໃສ່ແຜນປີ 2019 ແມ່ນເພີ່ມຂຶ້ນ 15,95% ຫຼື ເທົ່າກັບ 40,3 ຕື້ກີບ ໃນນັ້ນແມ່ນໄດ້ແບ່ງໃຫ້ດ່ານຂົວມິດຕະພາບ III ຈຳນວນ 290 ຕື້ກີບ, ດ່ານທ່າເຮືອໂດຍສານ 1,75 ຕື້ກີບ, ດ່ານປາກນໍ້າຫີນບູນ 200 ລ້ານກີບ, ດ່ານທ້ອງຖິ່ນບ້ານດ່ານ 1 ຕື້ກີບ ແລະດ່ານປາກເປັ່ງ 50 ລ້ານກີບ.

  ເພື່ອເຮັດໃຫ້ການເກັບລາຍຮັບໃຫ້ບັນລຸຕາມແຜນການທີ່ໄດ້ຮັບມອບໝາຍນັ້ນດ່ານພາສີຂົວມິດຕະພາບ III ແມ່ນໄດ້ວາງມາດຕະການເຊັ່ນ: ການສຶກສາອົບຮົມທາງດ້ານການເມືອງ-ແນວຄິດໃຫ້ແກ່ພະນັກງານພາຍໃນດ່ານ, ພະນັກງານແຕ່ລະສະຫາຍຕ້ອງມີສະຕິຕໍ່ລະບຽບກົດໝາຍສູງ, ຄຸ້ມຄອງ, ກວດກາ, ຕິດຕາມການປະຕິບັດໜ້າທີ່ວຽກງານວິຊາສະເພາະຢ່າງເປັນປົກກະຕິ, ເຂັ້ມງວດ ແລະທົ່ວເຖິງ, ສະຫຼຸບລາຍງານແຕ່ລະຂັ້ນແມ່ນຕ້ອງທັນກັບເວລາ ແລະຊັດເຈນ, ປັບປຸງແບບແຜນວິທີເຮັດວຽກຕາມໜ່ວຍງານດ່ານບໍລິການໃຫ້ມີຄວາມສະດວກ, ວ່ອງໄວ, ສາມາດກວດສອບໄດ້ ແລະຮັບປະກັນຄວາມຖືກຕ້ອງຕາມລະບຽບກົດໝາຍ, ແບ່ງຄວາມຮັບຜິດຊອບໃຫ້ພະນັກງານໃຫ້ສົມຄູ່ກັບຄວາມຮູ້ຄວາມສາມາດທີ່ມີຢູ່ໃນປະຈຸບັນ.

___________

ຂຽນໂດຍ: ກອງຄຳ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์