ເປີດບັ້ນສຳຫຼວດເສດຖະກິດ ແລະສະຖິຕິກະສິກຳທົ່ວປະເທດ ຄັ້ງທີ III

  ກອງປະຊຸມເປີດບັ້ນການສໍາຫຼວດເສດຖະກິດທົ່ວປະເທດ ຄັ້ງທີ III ປີ 2020 ແລະການສຳຫຼວດສະຖິຕິກະສິກຳທົ່ວປະເທດຄັ້ງທີ III ປີ 2019- 2020 ພາຍໃຕ້ຄໍາຂວັນ “ໃຫ້ຂໍ້ມູນຖືກຕ້ອງຕາມຄວາມຈິງຄົບຖ້ວນທຸກຄໍາຖາມຊັດເຈນທຸກຄໍາຕອບຄືພັນທະ ແລະ ໜ້າທີ່ຂອງທຸກຄົນ” ໄດ້ຈັດຂຶ້ນໃນວັນທີ 9 ມັງກອນ 2020 ໂດຍການເປັນປະທານຂອງ ທ່ານ ສົມດີ ດວງດີ ຮອງນາຍົກລັດຖະມົນຕີ,ລັດຖະມົນຕີກະຊວງການເງິນທັງເປັນຫົວໜ້າຊີ້ນໍາລະດັບຊາດການສໍາຫຼວດເສດຖະກິດ ແລະການສໍາຫຼວດສະຖິຕິກະສິກໍາທົ່ວປະເທດຄັ້ງທີ III, ມີບັນດາຮອງເຈົ້າແຂວງ, ຕົວແທນຫ້ອງການສະຖິຕິໃນທົ່ວປະເທດ ແລະພາກສ່ວນກ່ຽວຂ້ອງເຂົ້າຮ່ວມ.

  ທ່ານ ສົມດີ ດວງດີ ໄດ້ກ່າວວ່າ: ການສໍາຫຼວດສະຖິຕິກະສິກໍາ ແລະການສໍາຫຼວດເສດຖະກິດທົ່ວປະເທດຄັ້ງທີ III ນີ້ເປັນເຄື່ອງມືອັນສໍາຄັນຂອງລັດຖະບານໃນການລົງໄປໃກ້ຊິດຕິດແທດ,ໄປສອບຖາມການເປັນຢູ່, ການຜະລິດຕົວຈິງໃນຂະແໜງກະສິກໍາ, ການຜະລິດ ແລະ ບໍລິການວ່າເຂົາເຈົ້າຜະລິດໄດ້ແນວໃດ,ນໍາໃຊ້ເຄື່ອງມື ແລະເຕັກນິກອັນໃດແດ່, ເຂົາຫຍຸ້ງຍາກຄືແນວໃດ, ການເຂົ້າເຖິງແຫຼ່ງທຶນ ແລະອື່ນໆ ການສໍາຫຼວດນີ້ຈະສະແດງເປັນຂໍ້ມູນພື້ນຖານໃຫ້ລັດຖະບານໄດ້ຮູ້ໄດ້ສົມທຽບໃນຂອບ ເຂດທົ່ວປະເທດ, ເປັນຂໍ້ມູນທີ່ມີຄ່າຫຼາຍຊຶ່ງລັດຖະບານເຮົາໄດ້ເອົາໃຈໃສ່ສຸມເຫື່ອແຮງ, ລົງທຶນຮອນໃຫ້ໄດ້ຈັດຕັ້ງການສໍາຫຼວດຄັ້ງນີ້, ໃນໄລຍະຜ່ານມາພວກເຮົາໄດ້ປະຕິ

ບັດທຸກໆ 5 ປີ ແລະ10 ປີ ຕາມກົດໝາຍວ່າດ້ວຍສະຖິຕິໃນການສໍາຫຼວດໃນປີ 2020 ນີ້ຈະໄດ້ລົງສໍາພາດຕົວຈິງຢູ່ພາກສະໜາມໂດຍນໍາໃຊ້ພະນັກງານວິຊາການຈາກບັນດາພະແນກການ, ຂະແໜງການ, ຫ້ອງການຂັ້ນເມືອງ, ພະນັກງານໃນບ້ານຈໍານວນຫຼາຍພັນຄົນ,ລົງໄປແຕ່ລະຄົວເຮືອນທີ່ຖືກຄັັດເລືອກເປັນຕົວແທນ, ຫົວໜ່ວຍທຸລະກິດຫ້າງຮ້ານທີ່ເປັນຕົວແທນ, ເພື່ອສໍາພາດລົງເລິກສະພາບການຜະລິດກະສິກໍາ, ສະພາບການຜະລິດສິນຄ້າ ແລະ ການບໍລິການອື່ນໆ ສຳລັບການສຳຫຼວດເສດ ຖະກິດທົ່ວປະເທດຈະລົງສໍາພາດຜູ້ປະກອບການພໍ່ຄ້າຊາວຂາຍ ແລະຫົວໜ່ວຍທຸລະກິດຕົວຈິງໃນລະຫວ່າງເດືອນກຸມພາຫາເດືອນມີນາ, ສ່ວນການສໍາຫຼວດສະຖິຕິກະສິກໍາທົ່ວປະເທດຈະລົງສໍາພາດພໍ່ແມ່ປະຊາຊົນໃນລະຫວ່າງເດືອນມີນາຫາເດືອນເມສາ 2020.

-------

 ພ້ອມນີ້ທ່ານຮອງນາຍົກລັດຖະມົນຕີຍັງໄດ້ຮຽກຮ້ອງໃຫ້ປະຊາຊົນລາວບັນດາເຜົ່າ, ບຸກຄົນ, ນິຕິບຸກຄົນ, ພໍ່ຄ້າຊາວຂາຍ, ນັກທຸລະກິດ ແລະວິສາຫະກິດຫ້າງຮ້ານໃນຂອບເຂດທົ່ວປະເທດໃຫ້ຄວາມຮ່ວມມືອໍານວຍຄວາມສະດວກໃຫ້ແກ່ນັກເດີນສໍາຫຼວດໂດຍການໃຫ້ສໍາພາດຕາມຄວາມເປັນຈິງ, ສ່ວນພໍ່ແມ່ປະຊາຊົນຊາວກະສິກອນກໍຂໍໃຫ້ຢູ່ບ້ານ, ຢູ່ເຮືອນໃນໄລຍະເດືອນມີນາຫາເມສານີ້ຊຶ່ງເປັນຊ່ວງໄລຍະແລ້ວໄຮ່ແລ້ວນາຖ້າຜູ້ໃດຍັງຂ້ອງຄາການຜະລິດກໍ່ຂໍໃຫ້ກັບມາຫານັກເດີນສຳຫຼວດສາກ່ອນເພື່ອຊ່ວຍໃຫ້ການສຳຫຼວດ ແລະເກັບສະຖິຕິດັ່ງກ່າວໃຫ້ໄດ້ຂໍ້ມູນຕາມຄາດໝາຍທີ່ວາງໄວ້.

____________

ຂຽນໂດຍ: ແພງຕາ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์