ສຳເລັດບຸນນະມັດສະການ ພະທາດພະບາດ-ໂພນສັນ

 ບຸນນະມັດສະການພະທາດພະບາດ-ໂພນສັນ ປະຈໍາປີ 2020  ໄດ້ຈັດຂຶ້ນໃນລະຫວ່າງວັນ ທີ 6-9 ມັງກອນ ຢູ່ບ້ານພະບາດ ເມືອງທ່າພະບາດ ດ້ວຍຫຼາຍກິດຈະກໍາສໍາຄັນເປັນຕົ້ນການເຮັດບຸນໃສ່ບາດຢາດນໍ້າ, ຖວາຍສັງຄະທານ, ການແຂ່ງຂັນສິລະປະ-ວັນນະຄະດີ ແລະການວາງສະແດງສິນຄ້າໂອດັອບ ແລະອື່ນໆ.

  ວັດພະທາດພະບາດ-ໂພນສັນ ເປັນວັດເກົ່າແກ່ສັກສິດ ແລະມີສື່ສຽງເປັນມໍລະດົກມິ່ງບ້້ານມິ່ງເມືອງ ຂອງແຂວງບໍລິຄໍາໄຊ, ວັດດັ່ງກ່າວສ້າງຂຶ້ນແຕ່ປີ ພສ 902 ຕາມການສັນນິຖານຢູ່ສິມຮ້າງ ແລະຊາກອຸບມຸງກວາມຮອຍພະບາດ, ມີເນື້ອທີ່ປະມານ 1.200 ເຮັກຕາ, ຕັ້ງຢູ່ແຄມທາງເລກທີ 13 ໃຕ້ ຢູ່ເມືອງທ່າພະບາດ ແຂວງບໍລິຄຳໄຊ ເປັນວັດທີ່ມີຄວາມໝາຍຄວາມສຳຄັນທາງດ້ານປະຫວັດສາດ, ວັດທະນະທຳມາແຕ່ດົນນານ, ເປັນສູນລວມຈິດໃຈ ແລະ ເປັນບ່ອນເຄົາລົບບູຊາກາບໄຫ້ວຂອງປະຊາ ຊົນລາວບັນດາເຜົ່າຊຶ່ງໃນເດືອນມັງກອນຂອງທຸກໆປີກໍຈະມີພິທີກຳທາງສາສະໜາກໍຄືບຸນນະມັດສະການພະທາດພະບາດ-ໂພນສັນ ເພື່ອໃຫ້ມວນຊົນທັງພາຍໃນ ແລະຕ່າງປະເທດໄດ້ມາເຕົ້າໂຮມກັນກາບໄຫ້ວສັກກະລະບູຊາ ແລະອື່ນໆ.

  ນອກຈາກນີ້ວັດພະທາດພະບາດ-ໂພນສັນ ຍັງເປັນແຫຼ່ງທ່ອງທ່ຽວທາງວັດທະນະທຳທີ່ສາມາດດຶງດູດນັກທ່ອງທ່ຽວທັງພາຍໃນ ແລະຕ່າງປະເທດເຂົ້າມາທ່ອງທ່ຽວ ສປປ ລາວ ກໍຄືເມືອງທ່າພະບາດ ແຂວງບໍລິຄຳໄຊ ເປັນຈຳນວນຫຼວງຫາຍ, ເປັນສະຖານທີ່-ທີ່ມີຄຸນຄ່າອັນໂດດເດັ່ນທາງດ້ານວັດທະນະທຳ ແລະເປັນຈຸດກຳເນີດທາງດ້ານພຸດທະສາສະໜາໂດຍມີຮອຍພະບາດ ແລະໂພນສັນບ່ອນນັ່ງສັນເພນຂອງພະພຸດທະເຈົ້າເປັນຫຼັກຖານຢັ້ງຢືນ.

  ສໍາລັບການຈັດງານບຸນນະມັດສະການພະທາດພະບາດ-ໂພນສັນ ປະຈໍາປີ 2020 ນີ້ແມ່ນມີຫຼາຍກິດຈະກໍາທີ່ໜ້າສົນໃຈເປັນຕົ້ນການເຮັດບຸນໃສ່ບາດຢາດນໍ້າ, ຖວາຍ ສັງຄະທານໂດຍມີພະສົງ, ສຳມະເນນ 700 ກວ່າອົງ, ມີການແຂ່ງຂັນສິລະປະ-ວັນນະຄະດີ ແລະການວາງສະແດງສິນຄ້າໂອດັອບຫຼາຍກວ່າ 60 ຮ້ານທີ່ມາຈາກຫຼາຍ ພາກສ່ວນ, ພ້ອມນີ້ກໍຍັງມີວົງດົນຕີທີ່ມີຊື່ສຽງມາຄອຍໃຫ້ຄວາມມ່ວນຊື່ນນໍາອີກ, ທັງນີ້ກໍເພື່ອເປັນການສືບສານວັດທະນະທໍາຮີດຄອງປະເພນີທີ່ເຄີຍປະຕິບັດກັນມາທັງເປັນການຜັນຂະຫຍາຍ ແລະສົ່ງເສີມການທ່ອງທຽ່ວໃຫ້ກວ້າງຂວາງຂຶ້ນກວ່າເກົ່າ.

______________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์