ຫຼວງນໍ້າທາ ຫາລືວຽກງານຄຸ້ມຄອງການທ່ອງທ່ຽວ

  ຕາມການລາຍງານຂອງທ່ານ ລິນທອນ ສຸວັນທອນ ຮອງຫົວໜ້າຂະແໜງທ່ອງທ່ຽວພະແນກ ຖວທ ແຂວງຫຼວງນໍ້າທາ ໄດ້ລາຍງານຫຍໍ້ກ່ຽວກັບການຈັດຕັ້ງເຄື່ອນ ໄຫວວຽກງານຄຸ້ມຄອງການທ່ອງທ່ຽວຢູ່ແຂວງຫຼວງນໍ້າທາ, ໃນກອງປະຊຸມປຶກສາຫາລືລະຫວ່າງພາກລັດ ແລະພາກທຸລະກິດກ່ຽວກັບວຽກງານການຄຸ້ມຄອງ-ບໍລິຫານທຸລະກິດບໍລິການທ່ອງທ່ຽວໃນວັນທີ 8 ມັງກອນ 2020 ວ່າ: ທົ່ວແຂວງຫຼວງນໍ້າທາມີບໍລິສັດ,ສາຂາບໍລິສັດທ່ອງທ່ຽວ 8 ຫົວໜ່ວຍ,ໜ່ວຍບໍລິການນໍາທ່ຽວ 21 ຫົວ ໜ່ວຍ, ໂຮງແຮມ, ຣີສອດ 10  ຫົວ ໜ່ວຍ, ເຮືອນພັກ 95 ຫົວໜ່ວຍ, ພັດຕະຄານ, ຮ້ານອາຫານ, ສວນອາຫານ 97 ຫົວໜ່ວຍ, ຮ້ານບັນ ເທີງ 9 ຫົວໜ່ວຍ,

ຮ້ານກິນດື່ມ  81 ຫົວໜ່ວຍ, ລວມມູນຄ່າການ ລົງທຶນທັງໝົດ 181 ຕື້ກວ່າກີບ, ໄດ້ສົມທົບກັບພາກສ່ວນທີ່ກ່ຽວ ຂ້ອງລົງກວດກາ, ຕິດຕາມ ແລະຊູ້ຍູ້ພາກທຸລະກິດທ່ອງທ່ຽວປັບປຸງ ຂອດບໍລິການ, ຄຸນນະພາບຂອງ ຜະລິດຕະພັນ, ໄດ້ເອົາໃຈໃສ່ເຜີຍ ແຜ່ກົດໝາຍ ແລະນິຕິກໍາພາຍໃຕ້ ກົດໝາຍທີ່ຕິດພັນກັບການຄຸ້ມຄອງວຽກງານທ່ອງທ່ຽວ, ມີການປັບປຸງ ແລະສ້າງນິຕິກຳທີ່ຈຳເປັນເພື່ອເປັນເຄື່ອງມືໃນການຄຸ້ມຄອງວຽກງານທ່ອງທ່ຽວໃຫ້ສອດຄ່ອງກັບສະພາບພັດທະນາເສດຖະກິດ-ສັງຄົມໃນປະ ຈຸບັນເປັນຕົ້ນແມ່ນ, ລະບຽບການຄຸ້ມຄອງກຸ່ມໂຮງແຮມ, ເຮືອນພັກ ແລະ ຣີສອດ, ລະບຽບການຄຸ້ມຄອງກຸ່ມຮ້ານອາຫານ, ຮ້ານກິນດື່ມ, ຮ້ານບັນເທີງ ແລະ ຄາຣາໂອເກະ, ໄດ້ຜັນຂະຫຍາຍນະໂຍບາຍຕ່າງໆ ມາເປັນລະບຽບການຕ່າງລະບຽບການຄຸ້ມຄອງສະມາຄົມທຸລະກິດທ່ອງທ່ຽວ, ລະບຽບການຄຸ້ມຄອງກຸ່ມພະນັກງານນໍາທ່ຽວ, ມາດຕະຖານພະນັກງານ ນໍາທ່ຽວແຂວງຫຼວງນໍ້າທາ ລະ ບຽບການຄຸ້ມຄອງການຍ່າງປ່າ, ມາດຕະຖານການຍ່າງປ່າ, ລະບຽບການຄຸ້ມຄອງການລ່ອງເຮືອ.

  ນອກນີ້ຍັງໄດ້ມີບົດບັນທຶກກອງປະຊຸມວິຊາການເພື່ອແກ້ໄຂບັນຫາການບໍລິການສົ່ງແຂກຂອງພະນັກງານນໍາທ່ຽວຂັ້ນບ້ານ; ບົດບັນທຶກກອງປະຊຸມປຶກສາຫາລືລະບຽບການບໍລິການລ່ອງເຮືອ, ເງື່ອນໄຂ ຍົກລະດັບໜ່ວຍບໍລິການທ່ອງທ່ຽວ ຂຶ້ນເປັນບໍລິສັດທ່ອງທ່ຽວ, ການປະເມີນພະນັກງານນໍາທ່ຽວຂັ້ນແຂວງ ແລະການຈັດຕັ້ງກຸ່ມລົດຂົນສົ່ງນັກທ່ອງທ່ຽວ, ບົດບັນທຶກກອງປະຊຸມປຶກສາຫາລືການນໍາໃຊ້ເສັ້ນທາງທ່ອງທ່ຽວ, ຄ່າໃຊ້ຈ່າຍຕ່າງໆພາຍ ໃນບ້ານທ່ອງທ່ຽວ, ການນໍາໃຊ້ກິດຈະກຳທ່ອງທ່ຽວຢູ່ບ້ານນາລັນເໜືອ ແລະບັນດາບ້ານເປົ້າໝາຍທ່ອງທ່ຽວ.

 ຈາກນັ້ນໃນກອງປະຊຸມໄດ້ມີການແລກປ່ຽນບົດຮຽນຮ່ວມກັນເປັນຕົ້ນແມ່ນຫົວໜ່ວຍທຸລະກິດສ່ວນຫຼາຍແມ່ນບໍລິການແບບຄອບຄົວ, ຍັງບໍ່ທັນໄດ້ມາດຕະຖານ, ລະດັບຄຸນນະພາບ ແລະການບໍລິການ ຍັງຕໍ່າຖ້າທຽບເທົ່າກັບມາດຕະຖານລະດັບຊາດ ຫຼື ສາກົນບໍ່ສາມາດຕອບສະໜອງຄວາມຕ້ອງການໃຫ້ຜູ້ມາໃຊ້ບໍລິການ, ຍ້ອນເງື່ອນໄຂສະພາບແວດລ້ອມຫຼາຍດ້ານບໍ່ເອື້ອອຳນວຍຈຶ່ງເຮັດໃຫ້ພາກທຸລະກິດ ລົງທິນຍັງບໍ່ໄດ້ຄົບຕາມເງື່ອນໄຂຕ່າງໆ ທີ່ກຳນົດໄວ້, ບັນຫາສ່ວນໃຫຍ່ທີ່ເກີດຈາກທຸລະກິດບໍລິການບັນເທີງກໍ່ແມ່ນມົນລະພິດທາງດ້ານສຽງເປັນບັນຫາຫຍໍ້ທໍ້ໃນສັງຄົມເຮັດໃຫ້ຄະນະຮັບຜິດຊອບລົງກວດຕິດຕາມຫຼາຍຄັ້ງ ແລະ ຈະໄດ້ພ້ອມກັນແກ້ໄຂ. ກອງປະຊຸມດັ່ງກ່າວໄດ້ຈັດຂຶ້ນຢູ່ທີ່ສູນຝຶກອົບຮົມຖະແຫຼງຂ່າວ, ວັດທະນະທຳ ແລະທ່ອງທ່ຽວແຂວງຫຼວງນໍ້າທາ ເຂົ້າຮ່ວມໂດຍທ່ານ ສີວິໄລ ປັນແກ້ວ ຫົວຫນ້າພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວ, ທ່ານ ພັນໂທ ສຸກສະໝອນ ເພັດງາຄຳ ຫົວໜ້າພະແນກຕຳຫຼວດທ່ອງທ່ຽວ, ມີບໍລິສັດທ່ອງທ່ຽວ, ໜ່ວຍບໍລິການນໍາທ່ຽວ, ໂຮງແຮມ, ຣີສອດ, ເຮືອນ ພັກ, ພັດຕະຄານ, ຮ້ານອາຫານ, ສວນອາຫານ, ຮ້ານບັນເທີງ, ຮ້ານກິນດື່ມ ແລະພະນັກງານວິຊາການທີ່ກ່ຽວຂ້ອງພາກລັດ.

__________

ຂຽນໂດຍ:  ອຸ້ມ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์