ມອບ-ຮັບໂຮງຮຽນປະຖົມສົມບູນຫຼັງໃໝ່ ບ້ານກັນດອນ

  ພິທີມອບ-ຮັບໂຮງຮຽນປະຖົມຫຼັງໃໝ່ໃຫ້ບ້ານກັນດອນ ເມືອງທ່າແຕງ ແຂວງເຊກອງ ຈັດຂຶ້ນໃນວັນທີ 7 ມັງກອນ ຜ່ານມາທີ່ໂຮງຮຽນດັ່ງກ່າວລະຫ່ວາງທ່ານ ມີຊາເອວເດືອກ ປະທານໃຫ່ຍມູນນິທິສະມິດປະເທດເຢຍລະມັນເປັນຜູ້ມອບ ແລະ ທ່ານ ອຸດົມໄຊ ດອມສະຫັວນ ຮອງຫົວໜ້າຫ້ອງການສຶກສາທິການ ແລະ ກີລາເມືອງທ່າແຕງ ເປັນຜູ້ຮັບໂດຍມີທ່ານ ຄຳຜາຍ ສຸນີວັນ ຄະນະພະແນກສຶກສາທິການ ແລະກີລາແຂວງ,ທ່ານ ສຸກັນ ຈັນສີປະເສີດ ຫົວໜ້າຫ້ອງວ່າການປົກຄອງເມືອງພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

 ທ່ານ ຈັນທະລາ ສຸລິນທອງ ຜູ້ອຳນວຍການໂຮງຮຽນປະຖົມສົມບູນບ້ານກັນດອນກ່າວວ່າ: ໂຮງຮຽນປະຖົມສົມບູນຫຼັງໃໝ່ບ້ານກັນດອນໃຊ້ເວລາການກໍ່ສ້າງທັງໝົດ 3 ເດືອນ ຊຶ່ງເປັນໂຄງສ້າງເບຕົງເສີມເຫຼັກຖາວອນຊັ້ນດຽວມຸງດ້ວຍກະເບື້ອງ, ມີລວງຍາວ 21 ແມັດ, ກວ້າງ 8 ແມັດ, ມີ 3 ຫ້ອງຮຽນ ແລະ 2 ຫ້ອງນໍ້າປະກອບດ້ວຍເຟິນີເຈີຄົບຊຸດລວມມູນຄ່າກໍ່ສ້າງທັງໝົດ 169 ລ້ານກວ່າກີບໂດຍແມ່ນໂຄງການສະມາຄົມເຢຍລະມັນ-ລາວເປັນຜູ້ສະໜອງທຶນໃນຂະນະທີ່ປະຊາຊົນປະກອບສ່ວນ ແຮງງານຄິດເປັນມູນຄ່າ 25 ລ້ານກີບ ທັງນີ້ໃນໄລຍະຜ່ານມາໂຮງຮຽນປະຖົມສົມບູນບ້ານກັນດອນເປັນອາຄານຮຽນແບບປະຖົມປະຖານມີ 5 ຫ້ອງຮຽນໃນການຮອງຮັບນັກຮຽນທີ່ເຂົ້າມາຮຽນຈຳນວນ 200 ກວ່າຄົນ ໂດຍສົ່ງຜົນເຮັດໃຫ້ການຮຽນ-ການສອນພົບຄວາມຫຍຸ້ງຍາກ.

  ໂອກາດມອບ-ຮັບໂຮງຮຽນປະຖົມສົມບູນຫຼັງໃໝ່ຄັ້ງນີ້ທ່ານ ມີຊາເອວເດືອກ ປະທານໃຫ່ຍມູນ ນິທິສະມິດໄດ້ມອບອຸປະກອນກີລາໃຫ້ແກ່ໂຮງຮຽນຕື່ມອີກ, ຂະນະດຽວ ກັນຕາງໜ້າການນໍາຂອງເມືອງໄດ້ກ່າວສະແດງຄວາມຂອບໃຈ ແລະ ຮູ້ບຸນຄຸນຢ່າງສູງຕໍ່ຜູ້ໃຫ້ທຶນໃນການປະກອບສ່ວນພັດທະນາເສດຖະກິດ-ສັງຄົມເພື່ອຮັບປະກັນຄຸນ ນະພາບການຮຽນ-ການ ສອນໃຫ້ດີຂຶ້ນເທື່ອລກ້າວໆ.

__________

ຂຽນໂດຍ: ລັດຕະນະ ຄຳສົມພູ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์