ອຸດົມໄຊ ເລັ່ງສ້າງເສັ້ນທາງເຂົ້າຖໍ້າຈອມອອງ ດຽວນີ້ຄືບໜ້າ 81,35%

  ວັນທີ 3 ມັງກອນຜ່ານມາຄະນະຮັບຜິດຊອບຊີ້ນໍາໂຄງການກໍ່ສ້າງເສັ້ນທາງເຂົ້າຫາຖໍ້າຈອມອອງເມືອງໄຊ ແຂວງອຸດົມໄຊ ຮ່ວມກັບພາກສ່ວນກ່ຽວຂ້ອງໂດຍສະເພາະແມ່ນຄະນະຮັບຜິດຊອບໂຄງການ, ບໍລິສັດທີ່ປຶກສາ, ບໍລິສັດຜູ້ຮັບເໝົາໂຄງການກໍ່ສ້າງໄດ້ລົງເຄື່ອນໄຫວຕິດຕາມກວດກາ ແລະ ສຳຫຼວດໂຄງການດັ່ງກ່າວເຫັນວ່າມີຄວາມຄືບໜ້າພໍສົມຄວນ.

 ທ່ານ ບຸນກວມ ມິດເມືອງໄຊ ຮອງຫົວໜ້າພະແນກ ຖວທ ແຂວງອຸດົມໄຊ ທັງເປັນຫົວໜ້າໂຄງການກໍ່ສ້າງເສັ້ນທາງ ແລະສິ່ງອຳນວຍຄວາມສະດວກຖໍ້າຈອມອອງກ່າວວ່າ: ໂຄງການກໍ່ສ້າງເສັ້ນທາງດັ່ງກ່າວແມ່ນໜຶ່ງໃນໂຄງການພັດທະນາພື້ນຖານໂຄງລ່າງຂອງວຽກງານທ່ອງທ່ຽວຢູ່ແຂວອຸດົມໄຊຊຶ່ງໄດ້ຮັບທຶນກູ້ຢືມຈາກທະນາຄານພັດ ທະນາອາຊີ ຫຼື ADB ແລະໄດ້ເລີ່ມຕົ້ນລົງມືກໍ່ສ້າງມາຕັ້ງແຕ່ເດືອນກຸມພາ 2018 ເປັນຕົ້ນມາໂດຍແມ່ນບໍລິສັດຈິດຈະເລີນກໍ່ສ້າງເປັນຜູ້ຮັບເໝົາກໍ່ສ້າງໂດຍສະເພາະແມ່ນເສັ້ນທາງຊ່ວງທີ 1 ແຕ່ບ້ານຫ້ວຍອຸ່ນຫາຖໍ້າຈອມອອງມີຄວາມຍາວທັງໝົດ 40 ກິໂລແມັດ ແລະ ສິ່ງອຳນວຍຄວາມສະດວກອື່ນໆ ຊຶ່ງອີງຕາມສັນຍາແມ່ນ 27 ເດືອນແຕ່ການກໍ່ສ້າງຕົວຈິງໃນແຕ່ລະໜ້າວຽກມາຮອດປະຈຸບັນ.

 ເປັນຕົ້ນແມ່ນທາງປູງຢາງ 2 ຊັ້ນ ສຳເລັດແລ້ວ 20 ກິໂລແມັດ, ຮ່ອງລະບາຍນໍ້າສຳເລັດ 61%, ຈຸດຂາຍເຄື່ອງ ແລະວາງສະແດງສິນຄ້າ, ເຄື່ອງທີ່ລະນຶກ,ຫ້ອງນໍ້າ, ທາງຍ່າງເຂົ້າຫາປາກຖໍ້າ, ຂັ້ນໄດສຳເລັດ 100%, ສ່ວນທາງຍ່າງຈາກປາກຖໍ້າເຂົ້າພາຍໃນຖໍ້າປະມານ 800 ແມັດແລະສ້າງສຳເລັດແລ້ວ 300 ກວ່າແມັດ ສະຫຼຸບລວມແລ້ວການກໍ່ສ້າງທັງໝົດແມ່ນສໍາເລັດແລ້ວ 81,35%.

  ສ່ວນການກໍ່ສ້າງເສັ້ນທາງເຂົ້າຫາຖໍ້າຈອມອອງຊ່ວງທີ 2 ແຕ່ທາງແບ່ງກິໂລແມັດທີ 24 ບ້ານນໍ້າບໍ່ຕາໄກ່ຫາບ້ານຈອມອອງທີ່ມີຄວາມຍາວ16 ກິໂລແມັດ ໃນມູນຄ່າການກໍ່ສ້າງທັງໝົດ 4 ລ້ານກວ່າໂດລາ ແມ່ນກໍາລັງດຳເນີນການກໍ່ສ້າງຕາມຍັນຍາແມ່ນກຳນົດ 13 ເດືອນກໍຄືຈະໃຫ້ສຳເລັດໃນປີ 2021 ນີ້.

__________

ຂຽນໂດຍ:  ຄານມະນີ ຮຽນດໍຈັນ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์