ກສຕສ ສະພາແຫ່ງຊາດ ສ້າງຄວາມເຂັ້ມແຂງດ້ານວິຊາການໃຫ້ບຸກຄະລາກອນ

  ໃນລະຫວ່າງວັນທີ 28-29 ມັງກອນ 2019 ທີ່ເມືອງວັງວຽງ ແຂວງວຽງຈັນ, ກຳມາທິການເສດຖະກິດເຕັກໂນໂລຊີ ແລະສິ່ງແວດລ້ອມ (ກສຕສ) ສະພາແຫ່ງຊາດໄດ້ຈັດກອງປະຊຸມເຝິກອົບຮົມສ້າງຄວາມເຂັ້ມແຂງດ້ານວິຊາການໃຫ້ແກ່ບຸກຄະລາກອນຂອງ ກສຕສ ໂດຍເປັນປະທານຂອງ ທ່ານ ບຸນປອນ ສີສຸລາດ ປະທານ ກສຕສ; ມີຮອງປະທານຫົວໜ້າ-ຮອງຫົວໜ້າກົມທີ່ສັງກັດ ກສຕສ, ຮອງເລຂາທິການສະພາປະຊາຊົນ ແຂວງວຽງຈັນ, ຫົວໜ້າ-ຮອງຫົວ ໜ້າພະແນກ, ລັດຖະກອນວິຊາການພາຍໃນກຳມາທິການດັ່ງກ່າວ ແລະ ວິຊາການຂອງສະພາປະຊາຊົນແຂວງວຽງຈັນເຂົ້າຮ່ວມ.

   ທ່ານ ບຸນປອນ ສີສຸລາດ ກ່າວວ່າ: ເພື່ອປະຕິບັດຕາມທິດຊີ້ນຳ ແລະແຜນການສ້າງຄວາມເຂັ້ມແຂງຍົກລະດັບຂີດຄວາມສາມາດທາງດ້ານວິຊາການໃຫ້ແກ່ພະນັກງານ-ລັດຖະກອນຂອງສະພາແຫ່ງຊາດ ແລະສະພາປະຊາຊົນຂັ້ນແຂວງໃນຂອບເຂດທົ່ວປະເທດ, ເພື່ອສືບຕໍ່ຈັດຕັ້ງປະຕິບັດຕາມແຜນ 5 ປີ ຂອງ ກສຕສ ໃຫ້ປາກົດຜົນເປັນຈິງທັງເປັນການສ້າງຄວາມເຂັ້ມແຂງ ແລະ ສ້າງຂີດຄວາມສາມາດທາງດ້ານວິຊາການໃຫ້ແກ່ພະນັກງານ-ລັດຖະກອນທີ່ເປັນເສນາ ທິການຊ່ວຍວຽກໃຫ້ ກສຕສ ສະພາແຫ່ງຊາດ ແລະສະພາປະຊາຊົນຂັ້ນແຂວງກອງປະຊຸມໄດ້ຮັບຟັງການສະເໜີບົດຮຽນຈາກ ທ່ານ ດາວອນ ຫວ່າງວິຈິດ ອະ ດີດປະທານກຳມາທິການກົດໝາຍສະພາແຫ່ງຊາດກ່ຽວກັບການປະກອບຄຳເຫັນຕໍ່ການສ້າງ ແລະປັບປຸງກົດໝາຍຂົງເຂດເສດຖະກິດເຕັກໂນໂລຊີ ແລະ ສິ່ງ ແວດລ້ອມ, ການສ້າງ ແລະປັບປຸງກົດໝາຍໃນຂົງເຂດເສດຖະກິດເຕັກໂນໂລຊີ ແລະ ສິ່ງແວດລ້ອມ ແລະວິທີການຄົ້ນຄວ້າແກ້ໄຂຄຳຮ້ອງຂໍເປັນທຳ.

  ນອກຈາກນີ້, ຕາງໜ້າໃຫ້ທັງ 3 ກົມທີ່ສັງກັດພາຍໃນ ກສຕສ ໄດ້ນຳສະເໜີບົດຄົ້ນຄວ້າຄື: ຕາງໜ້າກົມຊັບພະຍາກອນທຳມະຊາດ ແລະສິ່ງແວດລ້ອມ ໄດ້ລາຍງານກ່ຽວກັບການປັບປຸງກົດໝາຍວ່າດ້ວຍທີ່ດິນ (ສະບັບປັບປຸງ), ຕາງໜ້າກົມເສດຖະກິດການຜະລິດລາຍງານກ່ຽວກັບການປັບປຸງກົດໝາຍວ່າດ້ວຍປ່າໄມ້ສະບັບປັບປຸງ ແລະ ຕາງໜ້າໃຫ້ກົມເສດຖະກິດບໍລິການລາຍງານກ່ຽວກັບການປັບປຸງກົດໝາຍວ່າດ້ວຍໂທລະຄົມມະນາຄົມ; ພ້ອມດຽວກັນນີ້, ສຳມະນາກອນທີ່ເຂົ້າຮ່ວມກອງປະຊຸມຍັງໄດ້ຮ່ວມກັນຄົ້ນຄວ້າເຮັດບົດເຝິກຫັດ, ຂຶ້ນສະເໜີບົດຄົ້ນຄວ້າ ແລະປະກອບຄຳຄິດຄຳເຫັນໃສ່ຫົວຂໍ້ຕ່າງໆທີ່ນຳສະ ເໜີເຫັນຢ່າງກົງໄປກົງມາເຮັດໃຫ້ມີຄວາມເຂົ້າໃຈຕໍ່ບົດຮຽນຫຼາຍຂຶ້ນ.

แชร์