ລາວ-ຫວຽດນາມ ແລກປ່ຽນວັດທະນະທໍາ

ກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວ (ຖວທ)ຮ່ວມກັບສະມາຄົມຜູ້ສູງອາຍຸ ສສ ຫວຽດນາມ ໄດ້ຈັດການສະແດງສິລະປະວັດທະນະທຳຂອງຄະນະ 19 ພຶດສະພາ ສສ ຫວຽດນາມ ຂຶ້ນໃນວັນທີ 6 ມັງກອນ ທີ່ໂຮງຮຽນສິລະປະດົນຕີແຫ່ງຊາດເພື່ອເປັນການແລກປ່ຽນວັດທະນະທຳທັງເປັນການຕ້ອນຮັບປີໃໝ່ສາກົນ ແລະ ປີໃໝ່ປະຈຳຊາດຫວຽດນາມທີ່ໝູນວຽນມາອີກຄັ້ງໜຶ່ງໂດຍມີ ທ່ານ ບົວເງິນ ຊາພູວົງ ຮອງລັດຖະມົນຕີກະຊວງ ຖວທ ແລະ ທ່ານ ໂດ ຄັດ ທຽນ ຫົວໜ້າຄະນະສິລະ ປະ 19 ພຶດສະພາ ສສ ຫວຽດນາມ ພ້ອມດ້ວຍການນຳກະຊວງ ແລະພະນັກງານຈາກຂະແໜງການຕ່າງໆເຂົ້າຮ່ວມ.

 ທ່ານ ດວງຈຳປີ ວຸທິສັກ ຮອງຫົວໜ້າກົມສິລະປະການສະແດງກະຊວງ ຖວທ ກ່າວວ່າ: ລາວ ຫວຽດນາມ ເຄີຍມີມູນເຊື້ອແຫ່ງຄວາມສາມັກຄີມິດຕະພາບແບບພິເສດມາໄດ້ຫຼາຍຍຸກຫຼາຍສະໄໝ ເຄີຍອຸ້ມຊູຍູ້ໜູນເຊິ່ງກັນ ແລະກັນ ໃນການຕໍ່ສູ້ຍາດເອົາຄວາມເປັນ ເອກະລາດ ແລະອິດສະລະພາບ ມາສູ່ມາຕຸພູມຂອງຕົນກໍຄືໃນການປົກປັກຮັກສາ ແລະສ້າງສາພັດທະນາປະເທດຊາດໃນະຈຸບັນ.ສໍາລັບການມາສະແດງຂອງຄະນະສິລະປະ 19 ພຶດສະພາ ແຫ່ງ ສສ ຫວຽດນາມ ຄັ້ງນີ້ຈະເປັນການປະກອບສ່ວນເພີ່ມພູນຄູນສ້າງຄວາມສາມັກຄີອັນຍິ່ງໃຫຍ່ມິດຕະພາບແບບພິເສດ ແລະການຮ່ວມມືຮອບດ້ານລະຫວ່າງປະຊາຊົນສອງຊາດໃຫ້ນັບມື້ນັບແຕກດອກອອກຜົນຍິ່ງໆຂຶ້ນ, ທັງເປັນການແລກປ່ຽນຮຽນຮູ້ວັດທະນະທຳເຊິ່ງກັນ ແລະກັນອີກດ້ວຍ.

 ການສະແດງຄັ້ງນີ້, ປະກອບມີການຮ້ອງເພງ, ຟ້ອນ, ເສບ ແລະອື່ນໆລວມທັງໝົດ 18 ລາຍການຊຶ່ງແຕ່ລະລາຍການແມ່ນສ້າງໄດ້ຄວາມເບີກບານມ່ວນຊື່ນລື່ນເລີງ ໃຫ້ແກ່ຜູ້ເບິ່ງຜູ້ຊົມໄດ້ເປັນຢ່າງດີ, ນອກຈາກນີ້ໃນຄໍ່າຄືນວັນທີ 7 ມັງກອນ ຄະນະສິລະປະ 19 ພຶດສະພາ ແຫ່ງ ສສ ຫວຽດນາມ ໄດ້ສືບຕໍ່ການສະແດງທີ່ສູນວັດທະ ນະທຳ ສສ ຫວຽດນາມ ປະຈຳລາວຕື່ມອີກ.

____________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์