ເທັນນິດ ນວ ພ້ອມລ່າ 3 ຫຼຽນຄຳ ຊຽງຂວາງ ເກມ 2020

  ສະຫະພັນເທັນນິດນະຄອນຫຼວງວຽງຈັນ (ນວ) ພ້ອມສົ່ງທັບ ນັກກີລາເທັນນິດລູກຫຼານເຈົ້າຟ້າງຸ່ມຈຳນວນ 12 ຄົນ, ຍິງ 6 ຄົນຫຼັງເກັບຕົວຝຶກຊ້ອມຕັ້ງແຕ່ເດືອນ ສິງຫາ 2019 ນັບມາຮອດປະຈຸບັນມີຄວາມພ້ອມເຖິງ 90% ພ້ອມຕັ້ງເປົ້າໝາຍຈະລ່າ 3 ຫຼຽນຄຳ ຫວັງທວງຕຳແໜ່ງແຊັມເຈົ້າຫຼຽນຄຳໃຫ້ທັບນັກກີລານະຄອນ ຫຼວງວຽງຈັນ ກັບມາຍິ່ງໃຫຍ່ອີກຄັ້ງ ໃນງານມະຫາກໍາກີລາແຫ່ງຊາດ ຄັ້ງທີ Xl ຫຼື ຊຽງຂວາງ ເກມ ທີ່ ແຂວງຊຽງຂວາງ ຮັບກຽດເປັນ ເຈົ້າພາບລະຫວ່າງວັນທີ 22 ມີນາ ຫາ 1 ເມສາ 2020.

  ເມື່ອວັນທີ 4 ມັງກອນ ຜ່ານມາທີ່ສະໂມສອນເທັນນິດຄອບຄົວ ບຸນທະລາ ບ້ານປາກທ້າງ ເມືອງສີໂຄດຕະບອງ  ນະຄອນຫຼວງວຽງຈັນ ທ່ານ ຕຸ້ຍ ບຸນທະລາ ປະທານ ສະຫະພັນເທັນນິດ ນວ ໄດ້ໃຫ້ສຳພາດຕໍ່ສື່ມວນຊົນວ່າ: ທັບນັກກີລາ ເທັນນິດ ນວ ຊຸດນີ້ ເປັນຊຸດລູກຫຼານຂອງຊາວນະຄອນຫຼວງຢ່າງແທ້ຈິງສາມາດຄັດເລືອກໄດ້ທັງ ໝົດ 12 ຄົນ, ຍິງ 6 ຄົນ ໄດ້ມີການເກັບຕົວຝຶກຊ້ອມມາແຕ່ເດືອນສິງຫາ 2019 ຜ່ານມາທີ່ສະໂມສອນກີລາເທັນນິດເຈົ້າອານຸວົງ ແລະຈຳນວນໜຶ່ງແມ່ນໄດ້ເກັບຕົວ ແລະເຄື່ອນໄຫວເຂົ້າຮ່ວມແຂ່ງຂັນ ທີ່ປະເທດເພື່ອນບ້ານນັບມາຮອດ ປະຈຸບັນມີຄວາມພ້ອມເຖິງ 90% ແລ້ວ ແລະໃນອີກ 2 ເດືອນຕໍ່ໜ້າ ນີ້ເພື່ອເປັນການເສີມຄວາມແຂງ ແກ່ນໃຫ້ນັກກີລາສາມາດຮັບປະກັນທີ່ສະຫະພັນເທັນນິດນະຄອນ ຫຼວງ ຕັ້ງເປົ້າໝາຍໄວ້ສູງຈະລ່າ 3 ຫຼຽນຄຳ ໃນຊຽງຂວາງ ເກມໃຫ້ໄດ້ສະນັ້ນຈຶ່ງໄດ້ຂຶ້ນແຜນຈະ ພານັກກີລາທັງໝົດ 12 ຄົນ, ຍິງ 6 ຄົນ ອອກເດີນທາງໄປເຄື່ອນ ໄຫວເກັບຕົວຝຶກຊ້ອມ ແລະແຂ່ງຂັນທີ່ປະເທດໄທຕື່ມອີກ.

  ຂະນະທີ່ທ່ານ ອາລັນຄູຝຶກ ເທັນນິດນະຄອນຫຼວງວຽງຈັນ ຊາວອົດສະຕາລີບອກວ່າ: ນັກກີລາເທັນນິດລາວກໍຄືຂອງນະຄອນຫຼວງວຽງຈັນ ທຸກຄົນພິເສດຫຼາຍມີການພັດທະນາໄປໄກພໍສົມຄວນ ຖ້າຫາກຢາກເຫັນນັກກີລາເທັນນິດ ລາວ ສາມາດກ້າວໄປເຖິງລະດັບ ມືອາຊີບໄດ້ນັ້ນສິ່ງສຳຄັນທຸກຄົນ ຕ້ອງໄດ້ມີການຝຶກຊ້ອມຢ່າງຕໍ່ເນື່ອງຕ້ອງໄດ້ເອົາໃຈໃສ່ຕໍ່ການ ຮຽນຮູ້ທາງດ້ານທັກສະ, ເທັກນິກ ແລະຈິດຕະວິທະຍາໃຫ້ຫຼາຍເຊື່ອວ່າອະນາຄົດໄປໄກທີ່ຫວັງສ່ວນ ການກະກຽມຄວາມພ້ອມຂອງທັບນັກກີລາເທັນນິດນະຄອນຫຼວງ ຮ່ວມຊຽງຂວາງ ເກມ 2020 ນີ້ ນັກກີລາພວກເຮົາມີໂອກາດເປັນໄປໄດ້ສູງທີ່ຈະສາມາດສ້າງຜົນງານຄວ້າ 3 ຫຼຽນຄຳມາຄອງຊຶ່ງມີເວລາອີກ 2 ເດືອນ ສະນັ້ນຈະພະຍາຍາມເນັ້ນການຝຶກຊ້ອມໃຫ້ນັກກີລາມີຄວາມທົນ, ມີຄວາມແຂງແກ່ນ ແລະປະສິດທິພາບໃນການຮ່ວມກັນຫຼິ້ນແບບທີມເວີກຮັບປະກັນໂລດວ່າ 3 ຫຼຽນຄຳ ບໍ່ຫຼຸດໄປໃສແນ່ນອນ.

  ຊຽງຂວາງ ເກມ 2020 ຈະມີການແຂ່ງຂັນທັງໝົດ 28 ປະເພດກີລາ, ໃນນັ້ນກີລາເທັນນິດມີການ ຊີງໄຊເຖິງ 7 ລາຍການ ປະກອບມີປະເພດດ່ຽວຍິງ, ດ່ຽວຊາຍ, ທີມຄູ່ຍິງ, ທີມຄູ່ຊາຍ, ທີມຊຸດຍິງ, ທີມຊຸດຊາຍ ແລະທີມປະສົມ.

____________

ໜັງສືພິມເສດຖະກິດ-ສັງຄົມ

แชร์