ໜ່ວຍພັກຫ້ອງການ ສກຂ ຫຼວງພະບາງ ເລືອກຄະນະບໍລິຫານງານຊຸດໃໝ່

  ວັນທີ 3 ມັງກອນ ຜ່ານມາໜ່ວຍພັກຫ້ອງການພະແນກສຶກສາທິການ ແລະກີລາແຂວງຫຼວງ ພະບາງຈັດກອງປະຊຸມໃຫຍ່ຄັ້ງທີ IX ເພື່ອສະຫຼຸບຕີລາຄາຄືນການຈັດ ຕັ້ງປະຕິບັດວຽກງານໃນໄລຍະ 5 ປີຜ່ານມາ ແລະຜ່ານທິດທາງແຜນການ 5 ປີ ຕໍ່ໜ້າພ້ອມທັງຄັດເລືອກຄະນະບໍລິຫານງານໜ່ວຍພັກຫ້ອງການຊຸດໃໝ່ໂດຍພາຍໃຕ້ການເປັນປະທານຂອງສະຫາຍ ເອິງ ລໍສະຫວັນ ເລຂາຄະນະພັກຮາກຖານພະແນກສຶກສາທິການ ແລະກີລາແຂວງຫຼວງພະບາງ, ມີສະຫາຍເລຂາ-ຮອງເລຂາຄະນະ ພັກຮາກຖານ, ເລຂາໜ່ວຍພັກໂຮງຮຽນອ້ອມຂ້າງພ້ອມດ້ວຍຕາງໜ້າຄະນະຈັດຕັ້ງແຂວງ, 3 ອົງການຈັດຕັ້ງມະຫາຊົນຄື: ຊາວໜຸ່ມ, ແມ່ຍິງ,ກຳມະບານ ແລະ ສະ ມາຊິກພັກສົມບູນ-ສຳຮອງຈຳນວນ 76 ສະຫາຍ, ຍິງ 26 ສະຫາຍເຂົ້າຮ່ວມ.

  ໃນກອງປະຊຸມໄດ້ເຫັນດີເປັນ ເອກະພາບຮັບຮອງເອົາບົດລາຍ ງານການເມືອງ ແລະແຜນພັດທະນາການສຶກສາແຕ່ປີ 2020-2024 ຄື: ຕີລາຄາຄືນການຈັດຕັ້ງປະຕິບັດວຽກງານຮອບດ້ານໃນໄລຍະ 5 ປີຜ່ານມາ ເຫັນວ່າຢູ່ພາຍໃນໜ່ວຍພັກມີຄວາມເປັນເອກະພາບ ທາງດ້ານແນວຄິດ-ການເມືອງໜັກແໜ້ນ, ມີຄວາມສະຫງົບ, ມີຄວາມສາມັກຄີ ແລະເປັນລະບຽບ ຮຽບຮ້ອຍດີ, ຕັ້ງໜ້າພັດທະນາ ຊັບພະຍາກອນມະນຸດ,ປັບປຸງຄຸນ ນະພາບທາງດ້ານການສຶກສາ,ຍົກສູງສີມືແຮງງານພ້ອມທັງສືບຕໍ່ສູ້ຊົນໃຫ້ບັນລຸຕາມຄາດໝາຍ,ຈັດຕັ້ງຜັນຂະຫຍາຍທິດທາງແຜນການຂອງໜ່ວຍພັກເພື່ອໃຫ້ໜ່ວຍ ພັກາຍເປັນໜ່ວຍພັກປອດໃສເຂັ້ມແຂງໜັກແໜ້ນພ້ອມກັນນັ້ນ ຍັງໄດ້ຮັບຟັງການປະກອບຄຳຄິດຄຳເຫັນຂອງບັນດາສະຫາຍຜູ້ແທນຢ່າງກົງໄປກົງມາໂດຍໄດ້ຍົກໃຫ້ເຫັນເຖິງຜົນງານການຈັດຕັ້ງປະຕິບັດມະຕິກອງປະຊຸມ ແລະແຜນພັດ ທະນາໃນໄລຍະຜ່ານມາກໍ່ຄືຄວາມບຸກບືນ, ຕີລາຄາສູງຕໍ່ຄວາມພະຍາຍາມໃນການປະຕິບັດໜ້າທີ່ຂອງໜ່ວຍພັກຊຸດທີ  VIII  ໃນການຊີ້ນຳ-ນຳພາຈັດຕັ້ງປະຕິບັດວຽກງານ ຮອບດ້ານ ແລະປະສົບຜົນສຳເລັດເປັນຢ່າງດີ.

 ນອກຈາກນີ້, ກອງປະຊຸມຍັງໄດ້ມີການປ່ອນບັດເລືອກຕັ້ງເພື່ອຄັດເລືອກເອົາຄະນະບໍລິຫານງານຂອງໜ່ວຍພັກຫ້ອງການຊຸດໃໝ່ໂດຍມີຜູ້ລົງສະໝັກເລືອກຕັ້ງທັງໝົດຈຳນວນ 5 ສະຫາຍ, ຍິງ 1ສະຫາຍ, ຜ່ານການປ່ອນບັດ ແລະ ນັບຄະແນນຕົວຈິງຜົນປະກົດວ່າ ສາມາດເລືອກໄດ້ສະຫາຍ ວັນທອງ ແພງສະຫັວດ ເປັນເລຂາໜ່ວຍພັກຫ້ອງການພະແນກສຶກສາທິການ ແລະກີລາແຂວງຊຸດໃໝ່, ສະຫາຍ ມີນາ ຈັນມະນີ ເປັນຮອງເລຂາໜ່ວຍພັກຫ້ອງການທັງເປັນປະທານກວດກາ, ສະຫາຍ ອຳພອນ ສີປະເສີດ ເປັນຄະນະ ແລະສະຫາຍ ເຊັບ ບຸນທັນ ເປັນຮອງປະທານກວດກາ.

------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์