ອາລິຍາ ຄວ້າແຊັມສະໜາມທຳອິດຢູ່ກຳປູເຈຍ

 ຫຼັງຈາກສ້າງຜົນງານຢ່າງໂດດເດັ່ນສາມາດຄວ້າຫຼຽນເງິນ ຈາກງານມະຫາກຳກີລາຊີເກມຄັ້ງທີ XXX ຟິລິບປິນ 2019 ມາໃໝ່ໆໝາດໆ “ອະລິຍາ ພູນສະ ຫວັດ” ຍັງຄົງຮ້ອນແຮງຄວບລົດຖີບຄູ່ໃຈເຂົ້າເສັ້ນໄຊເປັນອັນດັບທີໜຶ່ງຄວ້າແຊັມການແຂ່ງຂັນ ລົດຖີບສະເຕດທີ 1 ໃນລາຍການ “(Combodia Bay Cycling Tour 2020)  ທີ່ປະເທດກໍາປູເຈຍ ເພື່ອສະສົມຄະແນນເຂົ້າແຂ່ງຂັນ ໂອລິມປິກ ປີ 2020 ທີ່ປະເທດຍີ່ ປຸ່ນ ໃນກາງປີນີ້.

  ອີງຕາມການລາຍງານຂອງ ທ່ານ ກາບຊ້ອນ ສຸວັນນະຣາຊ, ເລຂາທິການສະຫະພັນລົດຖີບ ແຫ່ງຊາດລາວ ໃຫ້ຮູ້ວ່າ:ເມື່ອລະຫວ່າງວັນທີ 4-6 ມັງກອນ ຜ່ານມາ ເປັນການແຂ່ງຂັນໃນສະໜາມ ທີ 1 (Stage 1) ຊຶ່ງມີນັກກີລາ ເຂົ້າຮ່ວມຊີງໄຊທັງໝົດ 93 ຄົນຈາກ 10 ປະເທດອາຊີ ໂດຍເລີ່ມ ປ່ອຍຕົວເວລາ 11:00 ໂມງ ທ່າມ ກາງອາກາດຮ້ອນພໍສົມຄວນຈາກ ເມືອງດາລາຊາກໍ (Dala Sa kor) ຫາເມືອງໂກະກອງ (Kohkong) ໄລຍະທາງ 153 ກິໂລ ແມັດ ຊຶ່ງການແຂ່ງຂັນໃຊ້ເວລາ 4 ຊົ່ວໂມງກວ່າ ທ້າວ ອະລິຍາພູນສະຫວັດ ນັກກີລາລົດຖີບທີມ ຊາດລາວສາມາດຄວບລົດຄູ່ໃຈເຂົ້າເສັ້ນໄຊເປັນເຈົ້າພູເຂົາ (KOM) ທັງ 2 ຈຸດ ແລະໄດ້ແຊັມສະໜາມ ທີ 1 ມາຄອງແຊງນັກກີລາຈາກ ມາເລເຊຍ ເຖິງ 2 ນາທີ ກັບ 19 ວິນາທີ ແລະຫ່າງອັນດັບສາມຈາກ ນັກກີລາຈາກຮົງກົງ 2 ນາທີ 25 ວິນາທີ.

 ຂະນະທີ່ທ້າວ ຖາວອນ ພົນອາສາ ແມ່ນເຂົ້າມາເປັນ ອັນດັບທີ 15 ແລະອີກນັກກີລາລາວເພື່ອນຮ່ວມ ທີມແມ່ນເຂົ້າມານໍາກຸ່ມຫຼັງປະກອບດ້ວຍທ້າວ ສຸດທິສັກ ວັນດີລາ, ທ້າວ ລໍາເງິນ ວັນນະສຸກ ແລະ ທ້າວ ທະວີສັກ ສຸວັນນະຣາຊ ຊຶ່ງ ໃນນີ້ຍັງມີນັກກີລາທີ່ບໍ່ສາມາດຖີບ ບໍ່ຈົບຕາມເວລາການແຂ່ງຂັນເຖິງ 17 ຄົນ.

  ແນວໃດກໍ່ຕາມ, ນັກກີລາທີມ ຊາດລາວທັງ 5 ຄົນ ຍັງມີຄິວທີ່ລົງແຂ່ງຂັນອີກໃນສະເຕດທີ 2 ແລະສະເຕດທີ 3 ຊຶ່ງຈະລວບ ລວມເອົາຄະແນນທັງສາມສະເຕດ ມາໂຮມກັນເພື່ອສະສົມຄະແນນ ແລະຫາແຊັມໃນລາຍການດັ່ງ ກ່າວເພື່ອສະສົມຄະແນນກຽມຮ່ວມແຂ່ງຂັນໂອລິມປິກ 2020 ທີ່ປະເທດຍີ່ປຸ່ນ ໃນກາງປີນີ້ສ່ວນ ຄວາມຄືບໜ້າຜົນການແຂ່ງຂັນຈະ ເປັນແນວໃດນັ້ນຈະຂໍລາຍງານ ໃຫ້ຊາບຕື່ມອີກ.

ໃນການເດີນທາງເຂົ້າຮ່ວມ ແຂ່ງຂັນລາຍການນີ້ແມ່ນໄດ້ຮັບ ການອຸປະຖໍາຫຼັກການເດີນທາງ ແລະຄ່າໃຊ້ຈ່າຍທັງໝົດຈາກທ່ານ ສຸກສາຄອນ ໃສທິລາດ ປະທານ ບໍລິສັດໃສທິລາດກຣຸບ ທັງເປັນປະ ທານສະຫະພັນລົດຖີບນະຄອນ ຫຼວງວຽງຈັນ ຈຳນວນເງິນ 24 ລ້ານກີບ.

----------

ໂດຍ: ບຸນນິກ

แชร์